Dhormdutancho Itihas
14 Paulu ani Barnabas atam Ikoniumant Judevanchea sobha-ghorant bhitor sorle ani thoim te itle bore bhaxen uloile ki zaitea Judev ani Grik lokamnim bhavarth dovorlo. 2 Punn, jea Judevamnim bhavarth dovrunk na tannim Judev nhoi tea lokank uksaile ani bhavanchea add tanchea monant koddsann bhorli. 3 Taka lagon, Paulun ani Barnabasan thoim zaito vell sarlo. Ani Jehova* Devan tankam odhikar dilʼlo dekhun te bhienastana tachem utor porgottit gele. Devachea favo naslolea doiecho zo sondex te porgott kortale, to khorench Deva thaun asa dekhun Dev tanchea koddlean vizmitam ani ojapachim kamam korit ravlo. 4 Punn xarantlea lokam modem futt poddli. Thodde Judevanchea vatten zale ani thodde apostlanchea vatten zale. 5 Judev nhoi tea lokamnim ani Judevamnim aplea odhikaream borabor mellon Paulu ani Barnabasacho opman korpacho ani tankam fatramnim marun uddoupacho proitn kelo. 6 Punn Pauluk ani Barnabasak hi khobor kollʼlli dekhun te Likaonia, Listra, ani Derbechea xaramnim ani bhonvtonnchea vattarant pollon gele. 7 Thoim te bori khobor porgottit ravle.
8 Listrant tankam ek munis boslolo dislo zo paim-amnim opong aslo. To zolma thaun longddo aslo ani kednanch cholonk naslo. 9 Ho munis Pauluchim utram dhean diun aikotalo. Paulun taka bore bhaxen polloilo, ani tea munxak bhavarth asa ani to boro zatolo oxi taka khatri asa tem polloilem. 10 Dekhun Paulun taka mottʼttea avazan mhunnttlem: “Tujea paim-ancher ubo rav.” Tednam to munis rokddoch utthon ubo ravlo ani cholonk laglo. 11 Paulun kitem kelem tem lokamnim polloilem tednam te Likaonia bhaxent mottʼttean bob marunk lagle: “Dev munis zaun amchea modem aileat!” 12 Te Barnabasak Zeus dev ani Pauluk Hermes dev mhunnonk lagle, karonn Paulu ulounk fuddakar ghetalo. 13 Xarachea mukhar Zeus devachem mondir aslem. Tacho pujari, boil ani fulanche har* gheun darvonttea lagim ailo. To lokam sangata mellon Paulu ani Barnabasa mukhar iodn bhettounk sodhtalo.
14 Punn Barnabas ani Paulu, hea apostlamnim hem aikolem tednam tannim aple kopdde pinzle ani lokam modem dhanvon vochon bob marun oxem mhunnttlem: 15 “Lokamno, tumi oxem kiteak kortat? Ami-i tumchea bhaxen sadharonn munis. Tumi heo upeog nasloleo vostu soddun, mollob ani prithum ani tachea bhitor asloleo sogleo vostu rochlolea jivea Deva lagim ieunchem mhunn ami tumkam bori khobor porgott kortat. 16 Poilinchea kallar soglea raxttranchea lokank Devan ap-aple vatten cholonk dilem. 17 Tori astana, to tumkam borem korit ravlo ani aplea vixim govai di-it ravlo. To tumkam mollbar thaun paus ani follam zatat tosle dis dita. To tumkam pottbhor khaunk dita ani tumchem kalliz khuxal korit ravta.” 18 Hem soglem sanglea uprant ani khub proitn kelea uprant tannim lokank iodn bhettoupache addaile.
19 Punn Antiok ani Ikoniuma thaun Judev aile ani tannim lokank aple vatten kele. Taka lagon, lokamnim Pauluk fatramnim marlo ani to mela mhunn somzon taka voddun xarachea bhair vhelo. 20 Punn xis tache bhonvtonnim ektthaim zale tednam to utthlo ani xarant gelo. Dusrea disa to Barnabasa sangata Derbent gelo. 21 Tea xarant bori khobor porgott kelea uprant ani zaite xis kelea uprant te Listra, Ikonium ani Antiokak porot aile. 22 Thoim tannim xisank ghottai dili ani oxem mhunnon tankam bhavarthant ghott ravonk urba dili: “Amkam zaitea trasancho fuddo korun Devachea Rajeant bhitor soronk zai.” 23 Tea bhair, tannim dor eke sobhent vhoddil nemle, upas kelo, magnnem kelem ani vhoddilank Jehovachea* hatant ghatle, zankam Devacher purnn visvas aslo.
24 Uprant te Pisidiachea vattarantlean Pamfiliant pavle. 25 Ani Pergant utor porgottlea uprant te Ataliant pavle. 26 Thoim thaun te tarvar boson Antiokak gele. Teach xarant Devan tankam favo naslole doien dilʼlem tem kam atam tannim purnn kelem.
27 Antiokak pavlea uprant tannim sobhek ektthaim keli ani Devan tanchea udexim kelʼlea zaitea kamam vixim tankam sanglem. Toxench, Devan koxe toren Judev nhoi tea lokank bhavarth dovrunk vatt ukti keli tea vixim tankam sanglem. 28 Ani tannim xisam sangata zaito vell sarlo.