Jonas
1 Amitaiacho put Jonasak,* Jehovacho* ho sondex ailo: 2 “Utth, ani tea vhoddlea Nineve xarant voch, ani tichea add mhojem zhoddttechem formonn kolloi. Karonn hanvem tanchem noxtteponn polloilam.”
3 Punn Jonas Jehova thaun pollon Tarshishak vochonk bhair sorlo. To Jopant gelo, ani thoim taka Tarshishak voitalem tem ek tarum mellʼllem. To poixe bhorun tarvacher choddlo, ani Jehova thaun pois Tarshishak vochonk lokam sangata bhair sorlo.
4 Tednam Jehovan doriant borench varem dhaddlem, ani itlem bhirankull vadoll zalem ki tem tarum futtonk pavlem. 5 Tednam tarvotti khub bhiele ani modoti pasot ap-aplea devank ulo marunk lagle. Tarvantlem vozon unnem korunk te tantuntlem saman doriant uddounk lagle. Punn Jonas tarvachea sokoilea bhagant vochon add poddlolo ani thoim taka borich nhid poddloli. 6 Tarvacho keptton Jonasa lagim ailo, ani tannem taka mhunnttlem: “Are tum nhidla? Utth, tujea devak ulo mar! Khoro Dev ghoddie amkam kallji dakhoit ani ami salvar zait.”
7 Uprant tannim eka-mekak mhunnttlem: “Ieiat, hem odruxtt konnak lagon ailam tem pollounk ami sorti ghalum-ia.” Tor tannim sorti ghatleo ani Jonasachea nanvachi sort aili. 8 Te Jonasak vicharunk lagle: “Upkar korun amkam sang, hem odruxtt konnak lagon ailam? Tum koslem kam korta, ani tum khoim thaun aila? Tum khoinchea desantlo, ani khoinchea kullantlo?”
9 Tannem mhunnttlem: “Hanv ek Hebrev, ani sorgincho Dev Jehova, zannem doria ani suki zomin rochlea, tea Devachi hanv bhokti kortam.”*
10 Hem aikon te munis anikui bhiele, ani tannim Jonasak vicharlem: “Tunvem oxem kiteak kelem?” (Jonas Jehova thaun pollon voitalo mhunn tankam kollon ailem. Karonn Jonasanuch tankam hem sanglolem.) 11 Tor tannim taka mhunnttlem: “Ho doria xant zaunk ami tujea sangata kitem korum?” Karonn doria chodduch uchamboll zait aslo. 12 Tednam Jonasan mhunnttlem: “Mhaka ubarun doriant uddoiat, ani doria xant zatolo. Karonn hanv zannam, hem bhirankull vadoll mhaka lagon tumcher ailam.” 13 Tori astana, te tarvotti koxe-i bhaxen tem tarum veller haddunk anikui zoran tanddunk lagle, punn tanchea lagim zaina zalem. Karonn doria khubuch uchamboll zait aslo.
14 Tednam tannim Jehovak ulo marlo ani mhunnttlem: “Jehova Deva, upkar korun hea munxak lagon amcho nas korinaka! Toxench tachea niropradi rogtacho zobabdar amkam korinaka, karonn Jehova Deva, tunvem tuka zai toxench kelam.” 15 Tednam tannim Jonasak ubarun doriant uddoilo ani vadoll thamblem, ani doria xant zalo. 16 Hem polloun tea tarvotteank Jehovachi khub bhirant disli ani tannim Jehovak iodn bhettoilo ani angvonneo keleo.
17 Tednam Jehovan, Jonasak gillunk ek vhoddlem nustem dhaddlem. Ani Jonas tin dis ani tin rati tea nusteachea pottant urlo.