Izaias
42 Polloi! Mhozo sevok zaka hanv tenko ditam!
To mhozo vinchun kaddlolo, zo mhaka manvola!
Hanvem tacher mhoji povitr xokti ghatlea,
To raxttrank neai korun ditolo.
2 To bob marchona vo vhoddlea avazan ulounchona,
Ani rosteancher tacho avaz aikonk ieunchona.
3 Khoinchich maddoilʼli tonnachi boddi to moddchona,
Ani minnminntta ti khoinchich vat to palounchona.
To visvaxiponnan neai kortolo.
4 Prithumer neai stapon kori poriant, to palvochona vo maddvochona,
Ani sogle zunve tachea kaideachi* vatt polloit ravtole.
5 Mollob Rochpi ani tem posraupi Vorto Dev,
Zannem prithum ani ticher asloleo sogleo vostu rochleat,
Zannem ticher ravtolea munxank jivit dilam,
Ani tankam sogleank svas dila,
To khoro Dev Jehova mhunntta:
6 “Hanvem, Jehovan tuka nitivontponnan apoila,
Hanvem tujea hatak dhorla.
Hanv tuka rakhtolom, ani mhojea ani lokam modem tum ek korar koso zatolo,
Ani raxttram pasot uzvadd zatolo.
7 Hea udexim, tum kuddʼddeanche dolle ugoddttolo,
Kallkhi kuddant aslolea koideank soddoitolo,
Ani bondkhonnichea kallkhant aslolea lokank bhair kaddttolo.
8 Hanv Jehova, hem mhojem nanv.
Hanv mhoji mhoima dusrea konnankuch dina,*
Hanv mhoji vakhannʼnni kantoilʼlea murteank dina.
9 Polloi! Hanvem adim sanglolem tem ghoddon ailem,
Atam hanv tumkam noveo vostu kolloitam,
Teo ghoddon ieunchea poilinch hanv teo tumkam sangtam.”
10 Doriant voitoleamno ani tantunt asloleamno,
Zunveamno ani tantunt aslolea sogleamno,
Jehova pasot ek novem git gaiat,
Prithumechea konnxea-konnxeamnim tachi vakhannʼnni korat.
11 Ranvott vattaran ani tantuntlea xaramnim,
Toxench Kedarant ravtoleamnim, aplo tallo ubarcho.
Khoddpant ravtoleamnim, khuxalkaien bob marchi,
Dongrachea tengxer thaun vhoddlean bob marchi.
12 Tannim Jehovachi mhoima korchi,
Ani zunveamnim tachi vakhannʼnni korchi.
13 Jehova eka xoktivont munxa bhaxen bhair voitolo.
Eka zhuzarea bhaxen urben bhortolo.
To bob martolo, hoi, to zhuzachi kollounni kortolo,
Ani aplea dusmanam poros apunn chodd xoktivont mhunn to dakhoun ditolo.
14 “Hanv khub vella thaun vogi ravlam.
Xant ravon hanvem mhakach addaila.
Punn atam hanv zolm ditolea eke baile bhaxen
Pirgotolom, khorxetolom ani vhoddlean suskar ghetolom.
15 Hanv dongor ani porvotancho nas kortolom,
Tachim soglim hirvim zhaddam sukoitolom.
Hanv nhoim-enche zunve* kortolom,
Ani tonn aslolim tollim sukoitolom.
16 Hanv kuddʼddeank oslea vatten vhortolom, ji te nokllot,
Oslea vatten gheun voitolom, ji tankam khobor na.
Hanv tanchea mukhar kallkhak uzvaddant bodoltolom,
Khoddboddit rosteank ek-sarko* kortolom.
Hem soglem hanv tanchea pasot kortolom, ani hanv tankam soddun diunchom na.”
17 Je kantoilʼlea murteancher visvas dovortat,
Je dhatuchea murteank* mhunnttat: “Tumi amche dev.”
Tankam loz zatoli ani te fatti sortole.
18 Bhereamno aikat!
Kuddʼddeamno dolle ugddat ani polloiat.
19 Mhojea sevokak* soddun anik konn kuddʼddo asa?
Hanvem dhaddlolea sondexkara sarko anik konn bhero asa?
Hanvem inam dila tachea sarko anik konn kuddʼddo asa?
Hoi, Jehovachea sevoka sarko konn kuddʼddo asa?
20 Tum zaiteo vostu polloita, punn dhean dina.
Tuje kan ukte asat, punn tum aikona.
21 Jehova nitivont asa dekhun,
Tannem aple kaide kitle vorte* ani mhoimebhorit asat tem khuxalkaien dakhoun dilam.
22 Punn he tor chorlole ani luttlole lok,
Sogle dholimnim addkon urleat, ani bondkhonnint lipon bosleat.
Tankam chorleat ani tankam vanchounk konn na,
“Tankam porot hadd!” oxem mhunnpi tanchea vatten konn na.
23 Tumchea modlo konn hem aikotolo?
Konn dhean ditolo ani aikon fuddara pasot lisanv xiktolo?
24 Konnem Jakobak luttunk dilo?
Ani konnem Izraelak choranchea hatant dilo?
Jehovan nhoi kai, zachea add tannim patok kelʼlem?
Zachea vatten cholonk tannim nakarlolem,
Ani zacho kaido* tannim pallunk na.
25 Taka lagon, to aplo rag ani krodh tacher votoit ravlo,
Ani taka tachea zhuzachi tiddok sosunk poddli.
Izraelachea bhonvtonnim aslolem soglem kabar zaun gelem, tori astana tannem dhean diunk na.
Tachea add zhuzacho uzo pettlo, tori astana to tantuntlean kainch xikonk na.