Izaias
50 Jehova oxem mhunntta:
“Hanvem tumchea avoik pois dhaddli tednam, divorsachem potr dilem kai?
Vo hanvem mhojem rinn farik korunk tumkam vikle kai?
Na! Tumkam tor tumcheach guneanvank lagon vikle.
Tumchea opradank lagon tumchea avoik pois dhaddli.
2 Hanv hanga ailom tednam, hanga konnuch kiteak naslo?
Hanvem ulo marlo tednam, konnench zobab kiteak diunk na?
Tumchi suttka korunk zaina zaunk, mhozo hat lhan asa kai?
Vo tumkam vanchounk mhoje koddem xokti na kai?
Polloi! Hanvem adnea dilear doria sukta,
Hanv nhoim-ank oronnʼnnem korun soddttam.
Tantuntlim nustim udok na mhunn mortat,
Ani udok na mhunn kustat.
3 Hanv mollbar kallkhachem chador ghaltam,
Ani taka sakan dhamptam.”
4 Hanvem sarkem tem sangon* thokloleank zobab diuncho* mhunn,
Akʼkhea Vixvacho Dhoni Jehovan mhojea jibek proxikxonn dilem.*
To mhaka dor sokallim utthoita,
Vidʼdheartheam bhaxen hanvem taka dhean diun aikonchem mhunn to mhoje kan ugoddtta.
5 Akʼkhea Vixvacho Dhoni Jehovan mhaka somzon gheupachi tank dili,*
Ani hanv add vochonk na,
Hanv vollon dusrea vatten vochonk na.
6 Chabkamnim martoleank hanvem mhoji fatt dili.
Khadd voddun kaddttoleank hanvem mhoje pole dakhoile.
Opman sosunk poddlo ani mhojer thukle tednam hanvem mhoje tondd lipounk na.
7 Akʼkhea Vixvacho Dhoni Jehova mhaka modot kortolo.
Taka lagon, mhozo opman zala oxem mhaka dischem na.
Hanvem mhojem tondd eka ghott fatra sarkem kelam,
Ani mhaka loz bhogunk poddchina mhunn mhaka khatri asa.
8 Zo mhaka nitivont mhunntta to mhojea lagim asa.
Mhojer konn arop ghalunk xokta?*
Tannem mukhar ieun ulounchem.
Konnank mhojea add kes asa?
Tannem mukhar ieunchem.
9 Polloi! Akʼkhea Vixvacho Dhoni Jehova mhaka modot kortolo.
Konn mhaka guneanvkari tharaunk xokta?
Polloi! Te sogle tea pornea kopddea sarke zatole,
Zaka kidd* khaun uddoita.
10 Tumchea modem oso konn asa, zo Jehovachi bhirant dhorta
Ani tachea sevokachem aikota?
Oso konn asa, zo uzvadd naslolea kallea-kitt kallkhant cholta?
Tannem Jehovachea nanvacher visvas dovorcho ani aplea Devacher patieun ravchem.
11 “Polloi! Tumi sogle je uzo pettoitat,
Tantuntlean kittʼtteo voir uddttat toxeo kortat,
Tuminch pettoilʼlea ujeachea uzvaddant cholat,
Tantuntlean ietat tea kittʼtteantlean cholat.
Punn mhojea koddlean tumkam hi khast mellttoli:
Sosunk zaina titlea dukhin tumi lollttole.