Mika
2 “Je vaitt korchi manddnni kortat,
Je aplea khattir vaitt ievzonneo kortat tancher hai!
Te sokall zaina fuddem teo purnn kortat,
Karonn tanche lagim toxem korunk tank asa.
2 Xetanchi as korun te tancher kobzo kortat,
Toxench ghoranchi as korun te tim-ui aplea tabeant ghetat.
Te eka munxak nagoun tachem ghor,
Ani tachem daiz kaddun ghetat.
3 Taka lagon, Jehova mhunntta:
‘Hea ghoranneacher hanvem odruxtt haddunk chintlam, zantuntlean tumi konnuch salvar zaunchenant.*
Tumi porot kednanch gorvan fulon cholchenant, karonn to odruxttacho vell astolo.
4 Tea disa, lok tumchea vixim mhunnʼnni uzar kortole,
Ani tumchi vaitt poristhiti polloun vhoddlean roddttole.
Te mhunnttole: “Ami purnn toren kabar zale!
Tannem amchea lokanchi zomin amche koddlean kaddun ghetli ani dusreank dili.
Tannem amchim xetam ovisvaxi asloleak dilim.”
5 Taka lagon, Jehovachea sobhent zomin vanttun diunk,
Mezpachi dori voddun dhorunk tumchea modem konnuch aschona.
6 Te mhunnttat, “Porgott korop bond korat!
Heo vostu porgott korinakat.
Amkam loz bhogunk poddchina!”
7 Are Jakobachea ghorannea, tum mhunntta:
“Jehovan* pasiens hogddailam kai?
To khorench oso kortolo kai?”
Mhojea utrank lagon nitivontponnan choltoleanchem borem zaina kai?
8 Punn halinch, mhoje lok mhojech dusman koxe zaleat.
Zhuza thaun ailoleam bhaxen je bhienastana choltat,
Tanchea kopddeam voileo* sobit vostu tumi ukteponnim kaddun ghetat.
9 Mhojea lokanchea bailank tumi tanchea sobit ghorantlean bhair kaddttat,
Tumi tanchea bhurgeam koddlean teo boreo vostu sodankala pasot kaddun ghetat, jeo hanvem tankam dilʼleo.
10 Utthat ani vochat, karonn atam ho zago visov gheunk anik uronk na.
To oxudʼdh zala dekhun tachem nisontton zatolem, ani tem khub dukhachem astolem.
11 Zor ek munis pokea khobram fattlean voita ani khotteponn korun hi fott sangta:
“Hanv tumkam drakxanchea ani her sorea vixim porgott kortolom,”
Zalear osloch porgottnnar lokank avoddttolo!
12 O Jakob, hanv tumkam sogleank ektthaim kortolonch,
Hoi, hanv Izraelachea urloleank ektthaim kortolonch.
Hanv tankam ekvottant dovortolom, zoxim voient* menddram ekvottant astat,
Zoso menddrancho hindd chorvachea mollar asta.
Thoim lokancho bovall astolo.’
13 Raza aplea lokam pasot vatt kortolo,
Lok tachea fattlean choltole ani darvontteantlean bhair sortole.
Tancho raza tanchea mukhar voitolo,
Ani Jehova sogleam poros fuddem voitolo.”