Izaias
38 Tea disamnim Hezekia duent poddlo. Tachi poristhiti itli vaitt zalʼli ki to moronk pavlolo. Tednam Amozacho put provadi Izaias tachea lagim ailo ani tannem taka mhunnttlem: “Jehova oxem mhunntta, ‘Tum tujea ghoranneak gorjecheo suchounneo di, karonn hea duensantlo tum boro zaunchona, tum mortolo.’” 2 Hem aikon Hezekian aplem tondd vontti vatten kelem ani Jehova lagim magnnem korunk laglo: 3 “Jehova Deva, hanv tuje lagim vinoti kortam. Upkar korun, hanv tujea mukhar visvaxiponnan ani purnn kallzan koso cholʼlam tem ugddas kor. Tujea nodren sarkem asa tem hanvem kelam.” Oxem mhunnon to dukamnim roddonk laglo.4 Tednam Jehovacho ho sondex Izaiasa lagim pavlo: 5 “Tum Hezekia lagim porot voch ani taka sang, ‘Tuzo purvoz Davidacho Dev Jehovan oxem mhunnttlam: “Hanvem tujem magnnem aikolam, tujim dukam polloileant. Hanv tujem jivit* anik 15 vorsam vaddoitolom. 6 Hanv tuka ani hea xarak Asiriechea raza thaun vanchoitolom ani hea xarachi rakhonn kortolom. 7 Jehovan jem sanglam tem to purnn kortoloch mhunn Jehova koddlean tuka hi khunna zaun asa: 8 Ahazachea panvddeancher* denvta tea suriachi ji savlli fuddem gelʼli, ti dha pavlam fattim voitoli.”’” Tednam suriachi ji savlli dha pavlam fuddem gelʼli ti dha pavlam fattim geli.
9 Hem Judacho Raza Hezekiachem borovop, jem tannem apunn duensantlo boro zalea uprant boroilʼlem.
10 Hanvem mhunnttlem: “Mhoji ordi pirai jieun,
Hanv Fonddachea* darvontteant bhitor voitolom.
Mhojea jivitachim urlolim vorsam mhoje koddlean kaddun ghetole.”
11 Hanvem mhunnttlem: “Hanv Jah-k,* pollounk pavchom na. Jiveanchea desant hanv Jah-k pollounk pavchom na.
Hanv munxank kednanch pollounchom na,
Karonn hanv meloleam modem voitolom.
12 Gonvlleachea tombu sarkem
Mhojem ghor umttun uddoilam ani mhoje koddlean kaddun ghetlam.
Vinnpi zoso kopddo guttlaun dovorta, toxem mhojem jivit guttlailam,
Attiechea* suta bhaxen mhaka katrun vegllo kela.
Sokall thaun rat meren tum mhaka dukh dita.
13 Hanv sokall meren mhojea monak xant kortam,
Punn to xinva sarko mhojim haddam moddit ravta,
Sokall thaun rat meren tum mhaka dukh dita.
14 Eka lhan suknnea sarko vo bokea sarko hanv chinvchinvtam,
Parvea bhaxen hanv roddttam.
Voir polloun-polloun mhoje dolle thokleat,
‘Jehova Deva, hanv khub dukhi asam,
Mhozo adar zav!’
15 Hanv koso mhunn tacho upkar attoum?
Tannem mhaka jem sanglem tem purnn kelem.
Kotthin vellar mhaka samballʼllo,
Taka lagon, jivitbhor hanv khalteponnan choltolom.
16 ‘Jehova Deva, hea karonnak lagon* munis jieta,
Ani heach karonnak lagon hanv-ui jivo asam.
Tum mhoji bholaiki mhaka porot ditolo ani mhaka jivo dovortolo.
17 Polloi! Xantichea bodlek, hanv koddsannen bhorlolom.
Punn tuka mhoji khub opurbai asli,
Dekhun tunvem mhaka nisonttonnachea fondda thaun vanchoilo.
Mhojim soglim patkam tunvem tujea fattlean uddoilim.*
18 Fondd* tuji mhoima korunk xokona,
Moronn tuka vakhannʼnni diunk xokona.
Je sokol fonddant geleat, te tujea visvaxiponnachi as dhorunk xokonant.
19 Hanv aiz kortam toso,
Ek jivo munis, hoi, ek jivo munisuch tuji vakhannʼnni korunk xokta.
Ek bapui aplea putank tujea visvaxiponna vixim xikounk xokta.
20 Jehova Deva, mhaka salvar kor,
Oxem kelolean, dusream sangata tar aslolim songitachim sadhonam vazoun,
Jivitbhor tujea ghorant, Jehovachea ghorant ami mhojim gitam gaitolim.’”
21 Uprant Izaiasan mhunnttlem: “Chepoilʼlim suklolim anjiram hadd ani foddak lai, oxem kelʼlean to boro zatolo.” 22 Hezekian oxem vicharlolem: “Hanv Jehovachea ghorant voitolom mhunn hanv koxi khatri dovrum? Hachi tum mhaka kosli khunna ditolo?”