Izaias

64 Tum mollob pinzun sokol ailʼlo,

Ani tujea mukhar dongor koddkoddlole zalear, kitlem borem zatolem aslem!

 2 Uzo jhilkuttam zolloun uddoita,

Ani udkak khot-khoto haddtta, toxem hem zatolem aslem,

Tednam tujea dusmanak tujem nanv kollttolem aslem,

Ani raxttram tujea mukhar koddkoddttolim aslim.

 3 Ami chintunk na toslim ojapachim kamam tunvem kelim,

Tum sokol ailo, ani dongor tujea mukhar koddkoddle.

 4 Je axeun* tuji vatt polloit ravtat, tanchea pasot tum panvl gheta. Tujea bhair anik Dev asa mhunn,

Adlea kallar thaun konnench aikonk na, vo konnanchea-i kanar poddonk na vo konnem pollounkui na.

 5 Je khuxalkaien borim kamam kortat,

Je tuzo ugddas kortat ani tujea vatten choltat, tankam tum mellonk ieta.

Ami khub temp meren patkam korit ravle,

Tor ami koxe salvar zatole?

 6 Ami sogle oxudʼdh munxa sarke zaleat,

Ani amchim soglim nitivontponnachim kamam eke bailechea mhoineachea palliechea kopddea sarkim zaleant.

Ami sogle panam sarke bavtole,

Ani amche guneanv amkam varea sarke uboun vhortole.

 7 Tujem nanv gheun tuka ulo marpi konnuch na,

Tuka chittkon ravonk konnuch kainch korina,

Taka lagon, tunvem tujem tondd amchea thaun lipoilam,

Ani amchea guneanvak lagon tunvem amkam kabar zaunk* soddun dileat.

 8 Tori astana Jehova Deva, tum amcho Bap,

Ami mati ani tum amcho Kumbhar,*

Ami soglim tujea hatachem kam.

 9 Jehova Deva, amcher itlo ragar zainaka,

Amche guneanv sodankal ugddas dovornaka.

10 Tujim povitr xaram ranvott vattar zaleant,

Sion pasun ranvott vattar zalam,

Ani Jeruzalem padd zaun gelam.

11 Amchea purvozamnim zoim tuji vakhann’nni kelʼli,

Tem amchem povitr ani mhoimebhorit* ghor*

Ujean lason gelam.