Mika
5 “Charui vattamnim gherav ghatlolea dhuve,
Tum tujeach kuddik ghave korun gheta.
Dusmanamnim amkam gherav ghatla,
Te Izraelachea neai korpeachea polear boddi martat.
2 Ani tum, O Bethlehem Efrata,
Tum jem Judachea hozaram* modem sogleam-von lhan asa,
Tujea thaun oso eklo ietolo zo mhojea pasot Izraelacher odhikar choloitolo,
Zachi survat adlea kallar zaloli, khub poilim zaloli.
3 Jea meren zolm diupi bail bhurgeak zolm dina,
Tea meren Dev aplea lokank soddun ditolo.
Tednam tea odhikareache urlole bhav Izraelachea lokam lagim porot ietole.
4 To ubo ravtolo ani Jehovachea xokten,
Tachea Devachea, mhunnche Jehovachea vortea nanvan hinddacho samball kortolo
Ani te surokxit astole.
Karonn tednam tachem vhoddponn prithumechea konnxa-konnxeamnim pavtolem.
5 Ani to xanti haddttolo.
Asiriekaramnim amchea desacher akromonn kelear ani amche vhoddle gopur maddoilear,
Ami tanchea add lokam modlea sat gonvlleank, hoi, atth kunvrank* ube kortole.
6 Te Asiria add apli tolvar ubartole,
Nimrodachea desant bhitor sortat tea vatter te apli tolvar ubartole.
Asiria amchea desacher akromonn kortolo ani amcho vattar maddoitolo tednam,
To odhikari amkam tachea hatantlo vanchoitolo.
7 Jakobachea ghoranneantle urlole,
Zaitea lokam modem Jehova koddlean ieta tea dova sarke astole,
Ani zhaddancher poddtta tea pausa sarke astole,
Je khoincheach munxacher aplo bhorvonso dovornant,
Vo munis* sangta tednam poddonant.
8 Raxttram modem, hoi, desantlea lokam modem,
Jakobachea ghoranneantle urlole oxe astole,
Zoso ek xinv ranantlea zonvaram modem asta,
Zoso ek tornatto xinv menddranchea hindda modem cholta.
Zo tanchea modlean voita, tancher uddi marta ani tankam pinzun tanche kuddkean-kuddke korta,
Ani tankam salvar korunk konnuch asona.
9 Tum virodheancher zoit melloun tuzo hat ubartolo,
Ani tujea soglea dusmanancho nas zatolo.”
10 Jehova mhunntta, “Tea disa,
Hanv tujea soglea ghoddeancho nas korun uddoitolom ani tujea rothanchem nisontton korun uddoitolom.
11 Hanv tujea desantlea xarancho nas kortolom,
Ani tuje ghott kilʼle moddun uddoitolom.
13 Hanv tujea kantoilʼlea murteancho ani tujea povitr khambeancho bhosm kortolom,
Ani tum porot kednanch tujea hatamnim kelʼlea vostum mukhar man bagounchona.
14 Tujea modem aslole murti-pujeche khambe* hanv umttun kaddttolom,
Ani hanv tujea xarancho samko nas korun uddoitolom.
15 Jea raxttramnim hanvem sanglolem tem pallunk na,
Tanchi hanv ragan ani krodhan zhoddtti kortolom.”