Mika
6 Lokamno, upkar korun Jehova kitem sangta tem aikat.
Utthat, dongram mukhar tumchi kes manddat,
Ani porvotank tumcho tallo aikom-di.
2 O dongramno! O prithumechea ghott buniadimno!
Jehovachi kes aikat,
Karonn Jehovan aplea lokancher kes kelea.
Ti kes Izraela add asa ani to tankam oxem vicharta:
3 “Mhojea lokamno, hanvem tumkam kitem kelam?
Tumi itle bejar zaunk hanvem oxem kitem kelam?
Uloiat, mhojea add govai diat.
4 Karonn hanvem tumkam Ejipttantlean bhair haddle,
Gulamponnachea desantlean* tumkam suttka dili,
Tumchea mukhar Moizesak, Aronak ani Miriamak dhaddlim.
5 Mhojea lokamno, Moabacho Raza Balakan kosli manddnni keloli,
Ani Beoracho put, Balaman taka kitem zobab dilo, tem upkar korun ugddas korat.
Shitim tem Gilgal poriant kitem ghoddlolem tem ugddas korat,
Hea toren tumi Jehovachea nitivont kamam vixim zannam zaunk pavtole.”
6 Hanv Jehova mukhar kitem mhunn gheun vochom?
Sorgar aslolea Deva mukhar hanv kitem mhunn gheun man bagoum?
Hanv tachea mukhar hulpailʼleo bhetto gheun vochom kai?
Ek-ek vorsache paddkule bhettoum kai?
7 Hozaramnim menddram bhettoilim mhunn,
Ani hozaranche-hozar telache vhall kele mhunn Jehova khuxal zatolo kai?
Mhojea opradak lagon* hanv mhojea poilea putachem bolidan dium kai?
Mhojea patkak lagon hanv mhojea bhurgeak* bhettoum kai?
8 Are munxa, borem tem tannem tuka sanglam,
Jehovak tujea koddlean anik kitem zai?*
Fokot itlench, ki tunvem nitin vagchem,* visvaxiponnacho mog korcho*
Ani tujea Deva sangata moriadin cholchem!
9 Jehova hea xarak ulo marta,
Zankam zannvai* asa tim tujea nanvachi bhirant dhortolim.
Boddiecher* dhean diat ani zannem tika nemlea tacher dhean diat.
10 Noxtteachea ghorant azunui noxtteponnache theve asat kai?
Ani atam pasun tachea lagim vitt haddtta toslem efachem* khottem* map asa kai?
11 Fosoupi tagddeo ani potient khottea voznache fator gheun,
Hanv noitik ritin xudʼdh* uronk xoktam kai?
12 Tiche girest munis bhorpur maramari kortat,
Tiche lok fott martat,
Tanchea tonddantlean fosoitat toslim utram bhair sortat.
13 “Taka lagon, hanv tuka marun tujer ghave ghaltolom,
Tujea patkank lagon hanv tuka padd korun soddttolom.
14 Tum khatolo, punn tum dhadoxi zaunchona,
Tujem pott ritench* urtolem,
Tum tujeo vostu surokxit zagear vhoronk proitn kortolo, punn tuka ies mellchem na.
Tum oxem korunk pavlo zalear pasun, hanv tem dusmananchea hatant ditolom.
15 Tum bim vomptolo, punn lunvnni korunk pavchona.
Tum zoitun maddoitolo, punn tuka tachem tel uzar korunk mellchem na,
Ani tum novea drakxancho soro kortolo, punn tum to pieunk pavchona.
16 Karonn tumi Omrichea kaideam pormonnem choltat ani Ahabachea ghorannea bhaxen kamam kortat,
Tumi tanchea solʼlea pormonnem choltat.
Taka lagon, hanv tumchi poristhiti oxi kortolom ki tumkam polloun lokank bhirant distoli,
Lok fivnneo* ghalun xarant ravtoleanchi fokannam kortole,
Ani tumkam tanche tomnne aikonche poddttole.”