Habakuk
1 Ho sondex provadi Habakukak* dorxonant mellʼllo:
2 Jehova* Deva, kednam poriant hanv modoti pasot ulo marum ani tum aikonastana ravtolo?
Kednam poriant hanv tuje lagim modot magom ani tum mhaka maramari thaun salvar korinastana ravtolo?
3 Tum mhaka vaittponn kiteak pollounk dita?
Ani zulum zata to tum kiteak sosun gheta?
Mhojea mukhar nas ani maramari kiteak zata?
Vad-vivad ani zhogddim kiteak vaddot asat?
4 Kaideachi bhirant konnakuch na,
Ani sarki nit khoinch mellona.
Noxttea munxamnim nitivont munxank gherav ghatla,
Takach lagon, sarki nit zaina.
5 “Raxttrank polloiat ani dhean diat!
Thottakun polloit ravat ani ojap zaiat,
Karonn tumchea disamnim oxem kitem tori zaunchem asa,
Jem tumkam sanglear pasun tumi visvas dovorchenant.
6 Hanv tumchea add Kaldeikarank haddttolom,
Hoi, tea doia-maia naslolea ani chintop naslolea* raxttrak.
Te prithumechea poisulʼlea vattaramnim voitat,
Ani tanchim nhoi tea ghorancher kobzo kortat.
7 Te khub bhirankull asat ani lok tankam bhieta,
Te aple kaide apunnuch kortat ani dusreancher odhikar choloitat.
8 Tanche ghodde bibttea vaga poros vegan* dhanvtat.
Ani ratik bhair sortat tea koleam poros bhirankull asat.
Tanche zhuzache ghodde khubuch vegan dhanvon ietat,
Tanche ghodde pois thaun ietat,
Te ghonni bhaxen aplea xikaracher uddi martat.
9 Te sogle rogtak tanelʼle asat.
Te sangata mellon oxe ietat, zoxem udente thaun gorom varem,
Ani renvechea konnam bhaxen mezunk zaina titlea koideank te ubarun vhortat.
10 Te razanchim fokannam kortat,
Ani vhoddlea-vhoddlea odhikareank hanstat.
Te dor eka kilʼleak hanstat,
Ani matiechi ras korun tacher kobzo kortat.
11 Magir te varea bhaxen desantlean pasar zatat.
Punn te guneanvkari zatole,
Karonn tanchi xokti tanchea deva thaun ieta mhunn te sangtat.”*
12 Jehova Deva, tum sasnak thaun asa.
Mhojea Deva, mhojea Povitr Deva, tum kednanch morona.*
Jehova Deva, nit korunk tunvem tankam nemleat.
Mhojea Khoddpa, amkam khast diunk* tunvem tankam vinchleat.
13 Tuje dolle itle xudʼdh asat ki tum vaittponn pollounk xokona,
Ani noxtteponn tujean sosunk zaina.
Toxem zalear, tum visvasghat korpi lokank kiteak sosun gheta?
Ani ek noxtto munis nitivont munxak gillun uddoita tednam tum vogi kiteak ravta?
14 Tum munxak doriantlea nustea bhaxen kiteak korta?
Tum munxak doriantlea pranneam bhaxen kiteak korta, zankam konnuch odhikari na?
15 To* tankam sogleank nustem dhorpachea gorien voddtta,
To tankam aple rampnnent dhorta,
Ani aplea zallant tankam ektthaim korta.
Taka lagon, to khub khuxal zata.
16 Tea pasot, to aplea rampnnek bolidanam bhettoita,
Ani aplea nustem dhorpachea zallak dhump zolloita,*
Karonn tancheach udexim taka goroz titlem tel aslolem ekdom borem jevonn melltta,
Ani to borem-borem jevonn jevta.
17 Tor to apli ramponn khali korit ravtolo kai?*
Ani doia-maia nastana to raxttrank jivexim marit ravtolo kai?