Habakuk
3 Habakuk provadean dukhachem git gaun kelʼlem magnnem:
2 “Jehova Deva, hanvem tujea korneam vixim aikolam.
Jehova Deva, tujim kamam polloun hanv bhirantin bhorlam.*
Amchea kallar* porot ek pavtt toxench kor!
Amchea kallar* porot ek pavtt tankam kollon ieum-di.
Ani sonkoxttachea vellar kakut dakhounk visornaka.
3 Dev Temana thaun ailo,
Povitr Dev, Paran Dongra thaun ailo. (Selah)*
Tachea vorteponnan akʼkhem mollob bhorlem,
Ani tache vakhannʼnnen akʼkhi prithum bhorli.
4 Tacho porzoll uzvadda sarko aslo.
Don kirnnam tachea hatantlean bhair sortalim,
Tantunt tachem boll liplolem.
5 Tachea mukhar asloleancher tannem pidda posraili,
Ani tachea fattlean asloleank koddkoddon zor ailo.
6 To thamblo tednam prithum halʼli.
Tannem ek nodor marli tednam raxttram thorthorlim.
Sodam-sodankal ube aslolea dongrancho churo zalo,
Adlea kallar thaun ube aslole porvot bagovle.
Khub poilim thaun heoch tacheo vatto zaun asat.
7 Kushanachea tombumnim mhaka sonkoxtt dislem.
Midian desachea tombuchim lugttam koddkoddonk laglim.
8 Jehova Deva, tum nhoim-encher ragar asa kai?
Tuzo rag nhoim-encher pettla kai?
Vo tum doriacher ragar asa?
Karonn tum tujea ghoddeancher boson ailo
Ani tujim rotham zoitivont zalim.
9 Tum aplo dhonu kaddun toiar asa.
Tuzo soput purnn korunk danddeank* nemleat.* (Selah)
Tum nhoim-em udexim prithumek doxi korta.
10 Tuka polloun dongor dukhan tollmollʼlle.
Bhorpur paus poddon buddtti aili.
Udok kholaientlean gorzonk laglem.
Ani tannem aple hat* voir kaddle.
11 Tujea bannanchea uzvaddak lagon,
Chokchokta toslea bhaleachea porzollak lagon,
Suria ani chondrim aplea unch zagea voile bhair ieunk nant.
12 Tujea krodhan tum prithume voilean pasar zalo.
Tunvem tujea ragan raxttrank maddoun uddoilim.
13 Tum tujea lokank taronn diunk, tujea makhloleak salvar korunk bhair sorlo.
Tunvem noxtteachea ghorachea fuddareak chiddʼddoilo.
Ani voir thaun buniadi meren ghoracho nas kelo. (Selah)
14 Tache zhuzari vadolla sarke mhaka hanga-thoim ximpddaunk aile,
Karonn tankam lipon, dukhi asloleak kabar korunk* khuxalkai melltta.
Punn tunvem tanchinch hotʼtearam* tancheach toklent ghusoilim.
15 Tujea ghoddeancher tum doriantlean,
Hoi, vhoddlea lharam modlean udok usllait ailo.
Mhojim haddam oskot zalim,
Mhoje paim lokonk lagle.
Punn hanv xant ravon sonkoxttachea disachi vatt polloitolom,
Karonn amcher akromonn kortat tancher to dis ieta.
17 Zorui, anjirachem zhadd fulona,
Ani drakxanchea valincher drakxam zainant,
Zoitunachem zhadd follam dina,
Ani xetant pik zaina,
Voient* aslolo hindd nanch zata,
Ani gotteant gorvam uronant,
18 Torui, hanv Jehovak lagon khuxal zatolom,
Mhaka taronn diupi mhojea Devak lagon hanv sontostolom.
19 Akʼkhea Vixvacho Dhoni Jehova mhojem boll zaun asa,
To mhoje paim horonnachea* paim-am bhaxen kortolo,
Ani mhaka unch zageancher vhortolo.”
Mukhel songitkarak; hem git mhojem tar aslolem sadhon vazoun gaunchem.