Habakuk
2 Rakhonn korpachea mhojea zagear hanv ubo ravtolom,
Ani gopura voilean halchom na.
To mhojea udexim kitem uloita, tachi hanv vatt polloit ravtolom,
Ani to mhaka sudhraita tednam hanv kitem zobab ditolom, tem hanv chintit ravtolom.
2 Uprant Jehovan mhaka mhunnttlem:
“Hem dorxon boroun dovor, ani tem spoxtt toren fatrachea pattiencher kantoun dovor,
Oxem kelolean, vhoddlean vachtoleak tem sompe ritin* vachunk mellttolem.
3 Karonn tharailʼlea vellar hem dorxon purnn zatolem,
To vell vegan* lagim ieit asa,* ani tem dorxon fottounchem na.
Tem purnn zaunk vell lagta* zalear pasun, tachi vatt* polloit rav!
Karonn tem chukonastana purnn zatolench.
Taka vell zaunchona!
4 Gorvixtt munxak polloiat,
To bhitorlean naddbudʼdhicho.*
Punn nitivont asa to aplea visvaxiponna* udexim jietolo.
5 Khorench, drakxancho soro dhokeacho dekhun
Gorvixtt munis aplo dhei melloun gheunk xokchona.
To apli bhuk Fondda* itli vaddoita,
Mornna bhaxen to kednanch dhadoxi zaina.
To soglea raxttrank zoma korit ravta,
Ani aplea pasot soglea lokank ektthaim korit ravta.
6 Te sogle tachea add mhunnʼnneo uzar korchenant kai?
Te tomnne marun ani umanneamnim ulounchenant kai?
Te mhunnttole:
‘Aplem nhoi tem ektthaim korit ravta ani aplem rinn vaddoit asta, tacher hai!
Punn oxem kednam poriant choltolem?
7 Tuka rinn diupi okosmat tujea add utthchenant kai?
Te uttʼttole ani tuka dhorun borech haloitole,
Ani te tuka luttʼttole.
8 Tunvem bhorpur raxttrank luttleant,
Taka lagon, tantuntle urlole sogle lok tuka luttʼttole,
Karonn tunvem munxanchem rogot varoilam,
Prithum ani xaram kabar korun uddoileant,
Ani thoim ravtoleank jivexim marun uddoileant.
9 Vaitt kamam korun aplem ghor bhorta, tacher hai!
Karonn to odruxtta thaun vanchonk,
Aplo ghontter unchaier bandta.
10 Tunvem kelʼlea manddnneank lagon tujeach ghoranneak loz zalea.
Zaitea lokancho nas korun tunvem tujeach add patok kelam.
11 Tujea add vonttentlean fator bob martolo,
Ani moderantlean* patti uloitoli.
12 Rogot varoun xar bandta
Ani onitivontponnan eka nograchi buniad ghalta, tacher hai!
13 Polloi! Jem xevottak ujeant voichem asa tachea pasot lok khub vavr korta,
Ani jem kainch faideachem na, tachea pasot raxttram gham varoitat.
Hem soglem fouzancho Dev Jehovachem kam nhoi kai?
14 Zoso doria udkan bhorlolo asa,
Toxich prithum Jehovachea mhoimechea gineanan bhortoli.
15 Aplea sangateanchem vingllemponn pollounk,
Zo tankam soro pivoita, tacher hai!
Tannim pieun taitt zaunchem mhunn to tantunt krodh ani rag ghalta.
16 Mhoima mellchea bodlek tuzo khub opman zatolo.
Tum pasun pieunk ani tuji sunot korunk nasloli poristhiti dakhoun diunk* toiar zav.
Jehovachea uzvea hatantlem kop atam tujea lagim pavot ailam,
Ani loz tuji mhoima dhamptoli.
17 Lebanonacher tunvem kelʼlo zulum tuka gherav ghaltolo,
Ani nas korun tunvem zonvarancher ji bhirant posrailea, ti tujer porot ietoli,
Karonn tunvem munxanchem rogot varoilam,
Prithum ani xaram kabar korun uddoileant,
Ani thoim ravtoleank jivexim marun uddoileant.
18 Murti korpean apnnench kantoun ji murti kelea,
Tea murtecho kitem faido?
Dhatuchi murti kortoleak ticher kitlo-i visvas aslear pasun,
Tea murtecho ani fott xikoupeacho kitem faido?
Ulounk xokonant tosle, upeog naslole dev korun kitem faido?
19 Zo lakddachea kuddkeak, “Utth!” oxem mhunntta,
Vo monea fatrak, “Zago zav! Amkam xikoi!” oxem mhunntta, tacher hai!
Polloi! Taka bhailean bhangar ani chandi lailea,
Ani tachea bhitor svasuch na.
20 Punn Jehova aplea povitr mondirant asa.
Akʼkhe prithume, tachea mukhar vogi rav!’”