Obadia
1 Hem Obadiak* mellʼllolem dorxon:
Akʼkhea Vixvacho Dhoni Jehova,* Edoma vixim oxem mhunntta:
“Ami Jehova thaun ek khobor aikolea,
Raxttram modem eka dutak dhaddla, zo mhunntta:
‘Utthat, tichea add zhuz korunk ami toiari korum-ia.’”
2 “Polloi! Hanvem tuka raxttram modem samko lhan korun uddoila,
Tuka kainch valor naslolea bhaxen lekhtat.
3 Tujea gorvixtt kallzan tuka fosoila,
Tum zo khoddpachea khanchimnim ravta,
Tum zo uchaier ravta, ani tujea monant* mhunntta,
‘Mhaka sokol zomnir konn uddounk xokta?’
4 Tunvem zor ghonni bhaxen unchaiecher tuzo ghontter bandlo* zalear pasun,
Vo tunvem zor noketram modem tujem ghor bandlem zalear pasun,
Hanv tuka thoinchean sokol uddoitolom,” oxem Jehova mhunntta.
5 “Ratchea vellar tumchea thoim chor aile zalear,
Te apleak zai titlench luttchenant kai?
Vo tumchea thoim drakxam ektthaim korpi aile zalear,
Te punzaitoleam pasot thoddim drakxam fattim soddun voichenant kai?
(Punn tuzo purnn toren nas kortole!)*
6 Esauachem aslem tem soglem tannim sodhun kaddlem ani vhelem!
Tachea lipoilʼlea theveamnim kainch uronk na!
7 Tujea sangateamnim* tuka fosoilo,
Tannim tuka xime poriant voddun vhelo,
Zanchea sangata tuzo xanticho sombond aslo, tankam tujer zoit mellʼllam,
Je tujea sangata unddo khatat, tech tujea pasot zall manddttat.
Ani tuka tea vixim khobor pasun asona.”
8 Jehova mhunntta, “Tea disa
Hanv Edomachea zannar munxancho,
Ani Esauachea vattarant, somzunchi tank asloleancho nas korun uddounchom na kai?
9 Are Teman, tuje zhuzari khub bhietole,
Karonn Esauachea dongri vattarantlea dor ekleak marun uddoitole.
10 Tunvem tuzo bhav Jakobacher je zulum keleat,
Taka lagon tuka loz bhogunk poddttoli,
Ani sodankala pasot tuzo nas zatolo.
11 Jea disa onvollkhi lok tache foujek koidi korun gheun gele,
Tea disa tum vogich kuxik ubo ravon polloit aslo,
Pordexi lokamnim tachea xarant* bhitor soron Jeruzalemacher sorti ghatleo tednam,
Tum-ui tancheach sarko vaglo.
12 Tujea bhavachea sonkoxttachea disa tachi vaitt poristhiti polloun tunvem khuxal zaunk zainaslem,
Judachea lokancho nas zalo tea disa tunvem sontosbhorit zaunk zainaslem,
Ani tanchea dukhachea disa tunvem boddai marun ulounk zainaslem.
13 Mhojea lokanchea odruxttachea disa tunvem tanchea xarant* ghusonk zainaslem,
Tachea odruxttachea disa tachi vaitt poristhiti polloun tunvem khuxal zaunk zainaslem,
Ani tachea odruxttachea disa tunvem tachea girestkaiecher hat ghalunk zainaslo.
14 Nakear ubo ravon, tachea pollon voitolea lokank tunvem marun uddounk zainaslem,
Ani sonkoxttachea disa tachea vanchon urlolea lokank tunvem dusmananchea hatant diunk zainaslem.
15 Karonn soglea raxttranchea add Jehovacho dis lagim pavla.
Ani tunvem dusreank kelam toxench tuka-i zatolem.
Tum dusream thaim zoso vagla toxench tujea thaim vagtole.*
16 Mhojea povitr dongrar tumi jea toren drakxancho soro piet ravle,
Teach toren soglim raxttram mhozo rag drakxancho soro koso piet ravtolim.
Tankam mhozo rag pieunkuch poddttolo ani to te gillttole,
Ani te ostitvant naslech koxe zatole.
17 Punn vanchlole lok Sion dongracher astole,
Ani to povitr zatolo.
Jakobachem ghorannem apleo vostu porot aplea tabeant ghetolem.
18 Jakobachem ghorannem ujea sarkem zatolem,
Juzechem ghorannem eka agttea sarkem zatolem,
Ani Esauachem ghorannem suklolea tonna sarkem zatolem,
Zaka te zolloun kabar kortole.
Ani Esauachea ghoranneantlo konnuch salvar zaunchona,
Karonn Jehovan svota hem mhunnttlam.
19 Te Esauache dongri vattar ani Negeb,
Shefela ani Filistevkaranche des aplea tabeant ghetole,
Te Efraimachim ani Samariechim xetam aplea tabeant ghetole,
Ani Benjamin Gileadak aplea tabeant ghetolo.
20 Kananitkaranchea desa thaun tem Zarefath poriant aslolo vattar,
Rakhnnechi vonott asli thoim thaun vhelolea koideancho, mhunnche Izraelit lokancho zatolo.
Ani Sefaradant asle te Jeruzalemache koidi, Negebachim xaram aplea tabeant ghetole.
21 Esauachea dongri vattaracho neai korunk,
Salvar korpi Sion dongracher voitole,
Ani razvottki Jehovachi zatoli.”