Izaias
26 Tea disa Juda desant hem git gaitole:
“Amchem xar khub ghott asa.
Jem taronn Dev dita, tem vontti sarkem ani vontti bhonvtonnim rakhonn koxi bandlolea bandkama sarkem asa.
2 Nitivont raxttr bhitor ieunchem mhunn tache darvontte ukte korat,
Tem raxttr jem visvaxiponnan vagta.
3 Je purnn toren tujer patietat* tankam tum samballttolo.
Tum tankam xanti di-it ravtolo,
Karonn tannim tujer visvas dovorla.
4 Sodanch Jehovacher visvas dovrat,
Karonn Jah* Jehova sasnachem Khoddop zaun asa.
5 Unchaier aslolem gorvan bhorlolem xar,
Devan sokol haddlem,
Tannem tem zomnir xevttilem,
Tannem tachi dhulʼl korun uddoili.
6 Taka paim-a ponda maddoitole,
Tras sostole ani adar naslole lok taka aplea paim-amnim maddoitole.”
7 Nitivontachi vatt nitt asa,
Karonn Deva tum promannik,
Taka lagon tum nitivontachi vatt sullsullit kortolo.
8 Jehova Deva, tujea nitichea vatten cholta astana,
Ami tujer bhorvonso dovortat.
Tujea pasot ani tujea nanva pasot* ami axeun asat.
9 Ratchea vellar, mhojea purnn kallzan hanv tuka axetam,
Mhojem mon tuka sodhit asta,
Tum prithumechi nit korta tednam,
Nitivontponn mhunnttlear kitem tem lok xiktat.
10 Noxtteak doia dakhoili zalear pasun,
To nitivontponn kednanch xikchona.
Promannikponnachea desant pasun, to noxttim kamam kortolo,
Ani Jehovachem vorteponn pollounk pavchona.
11 Jehova Deva, tuzo hat tancher ubarlolo asa, punn te to polloinant.
Te tujea lokam pasot tuji urba polloitole ani lojent poddttole.
Hoi, tuzo hoch uzo tujea dusmanancho bhosm korun uddoitolo.
12 Jehova Deva, tum amkam xanti ditolo,
Karonn ami korunk pavlim tem soglem
Tukach lagon korunk pavlim.
13 Jehova amchea Deva, tujea bhair dusrea dhoniamnim pasun amcher raz choloilam,
Punn ami fokot tujeach nanvachi vakhannʼnni kortat.
14 Te moron geleat, te porot jive zaunchenant.
Tankam fonddant xokti na, te utthchenant.
Karonn tankam kabar korun uddounk ani tancho nas korunk
Tunvem tanchea add panvl ghetlam.
15 Tunvem raxttrantlea lokancho ankddo vaddoila, Jehova Deva,
Tunvem tancho ankddo vaddoila.
Tunvem tuka mhoima zoddun ghetlea.
Desacheo ximo tunvem soglea vatten khub vaddoileat.
16 Jehova Deva, trasachea vellar modoti pasot tim tuje koddem pollounk laglim.
Tunvem tankam xist dili tednam tannim hollu tuje lagim magnnem kelem ani aplea kallzant asa tem tujea mukhar votoilem.
17 Jehova Deva, tuka lagon amchi poristhiti oxi zalea.
Ami zolm diunchi asa tea gorbest baile bhaxen zaleat,
Ji ballontiniche vollvolle sosta ani dukhin bob marun roddtta.
18 Ami gorbest zalʼlea bhaxen asle, amkam ballontiniche vollvolle aile,
Punn ami fokot vareak zolm dilo.
Ami desak salvar korunk pavonk nant,
Ani thoim ravonk konnuch zolmak ieunk na.
19 Dev mhunntta: “Tuje lok je meleat te uttʼtthole,
Mhojea lokanchea moddeank* jiv ietolo.
Tumi je dhulʼlint asat,
Utthat ani khuxalkaien bob marat!
Tuzo dov, sokallchea dova sarko* asa,
Fonddant aslolea melolea lokank prithum porot ditoli, te jivont zatole.
20 Mhojea lokamno, tumchea bhitorlea kuddamnim vochat,
Ani tumchim daram bond korat.
Mhozo rag xant zaina tea meren,
Thoddea vella pasot lipon ravat.
21 Polloi! Tea desant ravpi lokanchea guneanvancho hixob gheunk,
Hanv Jehova, mhojea zagear thaun ietam,
Desant jitlem rogot varoilam, tem ukteponnim dison ietolem,
Ani zankam thoim jivexim marleat, te lipon urchenant.”