Jeremias
19 Jehovan oxem mhunnttlem: “Voch ani kumbhara koddlean matiechi ek moddki vikti ghe. Lokanchea thoddea vhoddilank ani iadnikanchea thoddea vhoddilank gheun, 2 Hinomachea Putachea Falkeant voch ani Kumbharachea Darvontteachea bhitor sorchea vatter ubo rav. Ani hanv tuka sangtam to sondex thoim kolloi. 3 Tum tankam sang, ‘Judachea razamno ani Jeruzalemant ravtoleamno, Jehovacho sondex aikat. Izraelacho Dev, fouzancho Dev Jehova oxem mhunntta:
“‘“Hanv beginuch hea zagear odruxtt haddchom asam. Ani hea vixim zo konn aikota taka dhokʼko bostolo.* 4 Karonn tannim mhaka soddun dila, ani hea zageachi osli poristhiti korun soddlea ki atam to zago vollkhonk iena. Tankam, tanchea purvozank ani Judachea razank pasun khobor nasli, toslea dusrea devam pasot te hea zagear bolidanam bhettoitat, ani tannim ho zago niropradeanchea rogtan bhorla. 5 Aplea putank ani dhuvank Baala pasot hulpailʼli bhett mhunn bhettounk, tannim tachea pasot unch zage bandle. Oxem korunk hanvem tankam adnea diunk nasli, vo hea vixim hanv ulounk naslom ani hem mhojea kallzant pasun kednanch ieunk naslem.”’*
6 “‘Jehova mhunntta, “Taka lagon polloi! osle dis ietat jednam hea zageak porot kednanch Tofeth vo Hinomachea Putachem Falkem mhunnchenant, punn Jivexim Marpachem Falkem mhunnttole. 7 Hea zagear hanv Judacheo ani Jeruzalemacheo ievzonneo fiskottaun uddoitolom, ani tankam dusmananchea tolvarin marun uddoitolom, ani hanv tankam tancho jiv gheunk sodhtoleanchea tabeant ditolom. Hanv tanchim moddim mollba voilea suknneank ani prithume voilea zonvarank jevonn mhunn ditolom. 8 Hanv hea xarachi oxi poristhiti kortolom, ki polloitat tim soglim samkinch thottaktolim, ani tim fivnneo* ghalun tachim fokannam kortolim. Thoim thaun pasar zaupi dor eklo bhirantin polloit ravtolo ani tacher ailolea soglea piddenk lagon fivnneo ghalun tachim fokannam kortolo. 9 Hanv tankam tanchea putanchem ani dhuvanchem mas khaunk laitolom, karonn tanche dusman ani tancho jiv gheunk sodhtat te lok, tankam gherav ghaltole tednam tanchi poristhiti itli vaitt zatoli ki te eka-mekachem mas khatole.”’
10 “Tednam tujea sangata thoim voitat tea soglea dadleam mukhar ti matiechi moddki foddun uddoi. 11 ani tankam sang, ‘Fouzancho Dev Jehova oxem mhunntta: “Konnui kumbharachi moddki porot kednanch ghoddunk zaina tea toren foddtta, toso hanv hea lokank ani hea xarak foddun uddoitolom. Purunk zago urona tea meren te Tofethant moddim purtole.”’
12 “Jehova mhunntta, ‘Hem xar Tofetha bhaxen zaunk, hanv hea zageachi ani tantunt ravtoleanchi poristhiti oxich kortolom. 13 Jeruzalemachim ghoram ani Judachea razanchim ghoram Tofetha bhaxen oxudʼdh zatolim. Hoi, jea ghorancher* te mollba voile foujek bolidanam bhettoitale ani dusrea devank soreacheo bhetto bhettoitale, tim soglim ghoram oxudʼdh zatolim.’”
14 Jeremias Tofetha thaun, mhunnche Jehovan taka bhasaunni korunk dhaddlolo thoim thaun porot ailo tednam, to Jehovachea ghorachea angnnant ubo ravlo ani tannem soglea lokank mhunnttlem: 15 “Izraelacho Dev, fouzancho Dev Jehova oxem mhunntta, ‘Hanv hea xaracher ani tachea soglea nograncher, hanvem sanglolem odruxtt haddttolom, karonn tannim hottʼtti* zaun mhojeo adnea pallunk nakarleo.’”