Izaias
14 Jehova Jakobachi kakut kortolo, ani porot ek pavtt Izraelak vinchun kaddttolo. To tankam tanchea desant ravonk* ditolo. Pordexi lok ieun taka zuddttole ani Jakobachea ghorannea sangata ieun ravtole. 2 Dusrea desantle lok Izraelitkarank tanchea desant vhoron pavoitole. Ani Izraelachem ghorannem, Jehovachea desant tea lokank chakor ani chakorn kortolem. Zannim tankam koidi kelole tankam te apunn koidi kortole, ani je tanche koddlean zobordosten kam korun ghetale tankam te aplea adhin kortole.
3 Jea disa Jehova tujem dukh kaddun, usko pois korun ani koddok gulamponnantlean suttka diun tuka suseg ditolo, tea disa 4 tum Babilonachea razak oso tomnno martolo:*
“Polloi! Dusream koddlean zobordosten kam korun gheupi koso kabar zalo!
Tannem kelʼlea zulumacho koso xevott zala!
5 Jehovan noxtteacho danddo moddla,
Raz choloupeanchi boddi moddlea.
6 Zo konn ragan bhoron veg-vegllea desachea lokank thambonastana martalo,
Ani raxttram jikhon gheunk eka-fattlean-ek zulum kortalo tachi boddi tannem moddun uddoilea.
7 Atam akʼkhea prithumer suseg asa, sogleak xanti asa,
Lok khuxalkaien bob martat.
Te mhunnttat, ‘Tum poddla tednam thaun,
Khoinchoch lakddam katorpi amchea add iena.’
9 Tum ieta tednam tuka mellonk
Sokol Fonddant* pasun goddbodd cholʼla.
Tuka lagon, to meloleank nhidentlean utthoita,
Prithume voilea, soglea zulum korpi fuddareank* utthoita.
Soglea raxttrantlea razank aplea xinvasona voile ube korta.
10 Te sogle tuka mhunnttat,
‘Tum amcheach bhaxen oskot zala!
Tuji poristhiti amcheach sarki zalea!
11 Tuzo gorv ani tar aslolea sadhonancho avaz,
Sokol Fonddant* somplo.
Tum kiddeanche khattir nhidla,
Ani gaindoll tujem chador zaun asa.’
12 Chokchoktolea noketra, fantoddechea puta,
Tum mollba thaun koso mhunn sokol poddla!
Raxttrank dhulʼlint xevttitolea,
Tuka koso mhunn katrun prithumer uddoila!
13 Tunvem tujea kallzant mhunnttlem, ‘Hanv mollbar choddttolom.
Mhojem xinvason Devachea noketram poros voir ubartolom,
Hanv utʼtorechea sogleam poros poisulʼlea vattarant,
Sobhechea porvotar bostolom.
14 Hanv kupam poros voir choddon voitolom,
Hanv mhaka, Sogleant Vortea Deva sarko kortolom.’
15 Punn tuka sokol Fonddant* uddoitole,
Hoi, sogleam poros khol fonddant uddoitole.
16 Tuka polloitat te, tuka bariksannen polloit ravtole,
Te lagim ieun tuka bariksannen polloitole ani mhunnttole,
‘Ho toch munis kai, zachea mukhar akʼkhi prithum kamptali,
Zannem soglim rajeam thorthorailim?
17 Ho toch kai, zannem prithumek ranvott vattar korun soddlo,
Ani tachea xarancho nas kelo,
Ani aplea koideank suttka diunk nakarlem?’
18 Dusrea raxttrantlea razank,
Hoi, tankam sogleank favo to man diun,
Dor ekleak tanchea-tanchea fonddant* purleat.
19 Punn tuka purunk na,
Eka kuslolea kombre* sarko tuka uddoilo,
Tuji kudd tea lokanchea kuddim modem uddoiloli asa
Zankam tolvarin marleat ani zankam fatranchea fonddant uddoileat,
Tum paim-am ponda maddoilʼlea moddea sarko zala.
20 Tuka razam sangata fonddant purchenant,
Karonn tunvem tuzoch des kabar korun uddoila,
Ani tujeach lokank jivexim marun uddoileat.
Noxtteanchea sonstichem nanv anik kednanch gheunchenant.
21 Tanche purvoz guneanvkari asle.
Taka lagon, tachea putank marunk ek zago toiar korat.
Oxe toren, te xoktivont zaun prithumer kobzo korunk pavchenant,
Ani ti aplea xaramnim bhorunk pavchenant.”
22 Fouzancho Dev Jehova mhunntta, “Hanv Babilona add uttʼttholom.”
Jehova mhunntta, “Hanv Babilonachem nanv ani tachea urlolea lokanchem toxench tache ieunche asa tea sonstichem nanv pusun uddoitolom.”
23 Fouzancho Dev Jehova mhunntta, “Hanv taka sallancho* ravpacho zago kortolom. Hanv taka rebddan bhorloli suvat kortolom ani nisonttonnachi saron gheun taka zhaddttolom.”
24 Fouzancho Dev Jehovan oso soput ghetla:
“Zoxem hanvem chintlam toxem ghoddttolench,
Jem hanvem tharailam tem purnn zatolench.
25 Hanv mhojea desant Asiriekarak mostitolom,
Hanv taka mhojea dongrancher maddoitolom.
Tachem zum hanv mhojea lokam voilem kaddttolom,
Ani tachem vojem tanchea khanda voilem kaddun uddoitolom.”
26 Akʼkhe prithume add hem tharailʼlem asa,
Ani hoch hat soglea raxttram add ubarlolo asa.*
27 Karonn fouzancho Dev Jehovan hem tharailam,
Tor konn tem bodlunk xokta?
Tannem aplo hat ubarla,
Tor konn taka addaunk xokta?
28 Ahaz Raza melo tea vorsa Devan ho sondex dilo:
29 “Are Filistia,
Tuka martoleacho danddo moddla dekhun khuxal zainaka,
Karonn sorpachea sonsti* thaun ek vikari sorop ietolo,
Ani tachi sonsot eka uddttolea ujeachea sorpa sarki* astoli.
30 Adar nasloleanche malgodde pott-bhor khatole,
Ani gorib lok koslich bhirant nastana add poddttole,
Punn tujea lokank* hanv bhuk dhaddun marun uddoitolom,
Ani tujea urloleank jivexim martolom.
31 Are darvonttea, bob marun rodd! Are xara, vhoddlean rodd!
Filistiechea lokamno, tumi soglim dhir soddun ditolim.
Karonn utʼtore thaun dhunvor ieta,
Ani tanchi fouz ekach borabor ieta, konnuch fattim urona.”
32 Raxttrachea sondexkarank te kitem zobab ditole?
Hoch ki Jehovan Sionachi buniad ghatlea,
Ani tachea lokam modle adar naslole lok thoim asro ghetole.