Izaias
13 Amozacho put Izaiasan ek dorxon polloilem. Tantunt Babilona add ho sondex sanglolo:
2 “Khoddpam aslolea dongrar khunna mhunn khambo ubo korat,
Ulo marat ani hat dakhoun foujek apoiat,
Jea udexim te khas lokanchea darvontteantlean bhitor ghustole.
3 Hanvem zankam nemleat* tankam hanvem hukum dila.
Mhozo rag dakhounk hanvem mhojea zhuzareank apoileat,
Zankam gorv bhogta ani je khuxal asat.
4 Aikat! Dongra voilean lokancho avaz ieta,
To avaz zaitea lokanchea avaza sarko asa!
Aikat! Rajeancho bovall aikonk ieta,
Ektthaim zalʼlea raxttrancho bovall aikonk ieta!
Fouzancho Dev Jehova zhuza pasot fouz toiar korta.
5 Te poisulʼlea desantlean,
Mollbachea konnxeam thaun ietat,
Jehova ani tachim krodhachim hotʼtearam,
Akʼkhea prithumecho nas korunk ietat.
6 Vhoddlean bob marun roddat, karonn Jehovacho dis lagim asa!
Ho dis Sorvxoktivont Deva koddlean nisontton koso ietolo.
7 Taka lagon, sogleanche hat oskot zatole,
Ani dor eka munxachem kalliz bhirantin pigollttolem.
8 Lok bhieun gondhollant poddttole.
Ek gorbest bailek ballontiniche vollvolle ietat toxe,
Te tollmollttole ani foddfoddttole.
Te bhirantin bhoron eka-mekak polloitole,
Tanchea tonddar usko astolo.
9 Polloi! Jehovacho dis ieta,
To krodhacho ani zollttea ragacho dis astolo,
To dis konnanchich kakut korchona,
To dis desachi poristhiti oxi korun uddoitolo, ki lok polloun bhietole
Ani to dis desantlea patkeancho nas korun uddoitolo.
10 Mollba voilim noketram ani tanche zome*
Aplo uzvadd divop bond kortole.
Suria udelear pasun kallokhuch astolo,
Ani chondrim aplo uzvadd diunchona.
11 Prithumer ravtoleam koddlean hanv tanchea vaittponnacho,
Ani noxtteam koddlean tanchea guneanvacho hixob ghetolom.
Hanv gorvixtt lokancho* gorv moddun uddoitolom,
Ani lokancher zulum kortat tancho gorv denvoitolom.
12 Xudʼdh bhangar ani Ofirantlem* bhangar mellonk kotthin zata tea toren,
Hanv munis mellonk kotthin kortolom.
13 Heach karonnak lagon hanv, fouzancho Dev Jehova, mollob thorthoraitolom,
Ani ragachea disa mhojea krodhan
Prithumek tichea zagea voili haloitolom.
14 Aplo jiv vanchounk polltta tea chitolla* bhaxen ani gonvlli naslolea hindda bhaxen,
Dor eklo aplea lokam lagim porot voitolo,
Dor eklo aplea desant pollon voitolo.
15 Zo melltta taka topun martole,
Ani zo sampoddtta taka tolvarin martole.
16 Tanchea dolleam mukhar tanchea bhurgeanche kuddkean-kuddke kortole,
Tanchim ghoram luttʼttole,
Tanchea bailancho bolatkar kortole.
17 Zanchea nodrent chandik kainch mol na,
Ani zankam bhangarachi koslich avodd na,
Tea Medes lokank hanv tanchea add haddttolom.
18 Te aple dhonu uzar korun tornattea munxank marun tanche kuddkean-kuddke kortole,
Kusveachea follachem konnuch churchure korchenant,
Toxench, bhurgeank konnuch kakut dakhounchenant.
19 Ani Babilon, jem rajeam modem sogleant chodd mhoimebhorit asa,
Jem Kaldeikaranchi sobitkai ani tancho gorv zaun asa,
Tachi poristhiti Devan nas kelʼlea Sodom ani Gomora bhaxen zatoli.
20 Thoim porot konnuch ravchona,
Pillgean-pillgi poriant konnuch thoim ieun ravchona,
Khoinchoch Arab thoim aplo tombu ubo korchona,
Toxench, khoinchoch gonvlli aplea hinddak thoim gheun voichona.
21 Tem oronnʼnneantlea ranvotti zonvarancho ravpacho zago zatolem,
Thoinchim ghoram ghugumamnim* bhortolim,
Thoim xohamrugam* ravtolim,
Ani ranvotti bokddeo thoim uddio martoleo.
22 Ranvotti zonvaram tachea gopuramnim
Ani kole* tachea sobit rajmahalamnim kuleo ghaltole,
Tacho vell lagim pavla ani taka chodd dis mellchenant.”