Izaias
45 Sirus mhozo makhlolo.
Raxttrank tachea adhin korunk,
Razanchim hotʼtearam tanchea koddlean kaddun gheunk,*
Ani darvontte porot bond zaina tea toren
Tachea mukhar xarachim donui daram ugddunk,
Hanvem, Jehovan tacho uzvo hat dhorla, ani hanv taka mhunnttam:
2 “Hanv tujea mukhar voitolom,
Ani porvot, ek-sarki zomin kortolom.*
Hanv tambeachea daranche kuddkean-kuddke kortolom,
Ani tache lokhnnache dandde katrun uddoitolom.
3 Hanv tuka kallkhant dovorlole theve ditolom,
Ani gupit zageamnim lipoun dovorlole theve ditolom.
Hea vorvim, hanv Jehova, Izraelacho Dev,
Tuka tujea nanvan apoitam mhunn tuka kollon ietolem.
4 Mhozo sevok Jakoba pasot, ani mhozo vinchun kaddlolea Izraela pasot,
Hanv tujem nanv gheun tuka apoitam.
Tum mhaka vollkhona, tori astana hanv tujem nanv vhodd kortam.
5 Hanv Jehova, mhojea bhair anik konn na,
Mhaka soddun dusro khoinchoch Dev na.
Tum mhaka vollkhona, tori astana hanv tuka xoktivont kortolom.
6 Oxem kelolean, suria udeta thoim thaun tem suria buddtta thoim meren,*
Mhaka soddun dusro konnuch na mhunn
Lokank kollon ietolem.
Hanv Jehova, mhojea bhair anik konnuch na.
7 Hanv uzvadd ani kallokh rochtam,
Hanvuch xanti ani odruxtt haddttam.
Hanv, Jehova, heo sogleo vostu kortam.
8 Mollbamno, voir thaun paus ghalat,
Kupamnim nitivontponnacho paus akʼkhea prithumer votoum-di.
Prithumek zagi zaum-di
Ani taronn ani nitivontponnacheo bio kirlon foll upzoum-di.
Hanvem, Jehovan, hem soglem rochlam.”
9 Aplea Ghoddnnara lagim vad-vivad korta, tacher hai!
Karonn to tor zomnir poddlolea matiechea aidonachea kuddkeantlo,
Fokot ek lhanso kuddko zaun asa.
Matiecho gullo Kumbharak* oxem vicharunk xokta kai: “Tum hem kitem korta?”
Vo tunvem hatamnim keloli vost tuka oxem mhunnonk xokta kai: “Taka hatuch nant”?*
10 Tacher hai, zo eka bapaik oxem mhunntta: “Tum konnancho bapui zala?”
Ani eke bailek mhunntta: “Tunvem konnank zolmak haddla?”*
11 Jehova zo Izraelacho Povitr Dev ani zannem taka ghoddla, to oxem mhunntta:
“Fuddem ghoddchem asa tea vixim, tum mhaka prosn vichartolo?
Ani mhojea putanchem ani mhojea hatanchea kamanchem hanvem kitem korchem tem tum mhaka sangtolo?
12 Hanvem prithum keli ani tacher munxak rochlo.
Hanvem mhojea hatamnim mollob posrailam,
Ani hanv tanchea soglea foujek hukum ditam.”
13 Fouzancho Dev Jehova mhunntta: “Mhojea nitivontponnan hanvem eka munxak upzoila,
Ani hanv tacheo sogleo vatto nitt kortolom.
Toch mhojem xar bandtolo,
Ani koslench mol vo lonch* ghenastana, koident aslolea mhojea lokank soddoitolo.”
14 Jehova oxem mhunntta:
“Ejipttacho faido* ani Ethiopiechem saman* ani Sebache lamb munis,
Tujea lagim ietole ani tuje sevok zatole.
Te sanklleamnim tujea fattlean choltole,
Te ieun tujea mukhar man bagoitole,
Ani te manan tuka mhunnttole, ‘Khorench, Dev tujea sangata asa,
Tachea bhair anik Dev na, konnuch na.’”
15 Izraelachea Deva, tum Salvar Korpi,
Khorench, tum apleakuch gupit dovorta toslo Dev.
16 Murteo korpeank loz bhogchi poddttoli,
Ani tancho sogleancho opman zaun, te lojek poddttole ani te voitole.
17 Punn Izraela, Jehova tuka salvar kortolo ani sasnak tuka taronn ditolo.
Tuka porot kednanch loz bhogunk poddchina vo opman sosunk poddchona.
18 Khoro Dev Jehova zannem mollob rochlam,
Prithum ghoddlea, ani ti thir stapon kelea,
Zannem prithum bexttich* rochunk na, punn lokank ravonk ti ghoddlea,
To Dev mhunntta:
“Hanv Jehova, ani mhojea bhair anik konnuch na.
19 Hanv gupit zagear thaun vo kallokh aslolea desantlean ulounk na.
Hanvem Jakobachea sonstik* oxem mhunnonk na,
‘Mhaka sodhat, punn tumcho vavr funkott voitolo.’
Hanv Jehova, hanv nitivontponnacheo vostu uloitam ani sot asa tem kolloitam.
20 Raxttrantlean pollon ailolea lokamno, ieiat.
Ektthaim zaiat ani ieiat.
Kantoilʼleo murteo gheun bhonvtat, tankam kainch khobor na,
Te oslea deva lagim magnnem kortat, zo tankam salvar korunk xokona.
21 Tumchi kes manddat ani tumchea vatten uloiat.
Ektthaim ieun eka-meka lagim uloiat.
Poilim thaun hem konnem sanglolem?
Ani adlea kallar thaun hem konnem kolloilʼlem?
Hanvem, Jehovan nhoi kai?
Mhojea bhair anik konn Dev na.
Mhojea sarko nitivont ani Salvar Korpi Dev, konnuch na.
22 Prithumechea konnxea-konnxeamnim ravtoleamno, mhojea lagim ieiat ani salvar zaiat.
Karonn hanv Dev, mhojea bhair anik konn na.
23 Hanv mhozoch soput gheun sangtam,
Mhojea tonddantlean bhair sorlolem utor sot zaun asa,
Tem purnn zalea bogor urchem na:
Dor eklo mhojea mukhar dimi ghaltolo,
Dor ek jib visvaxi ravpacho soput ghetoli,
24 Ani mhunnttoli, ‘Khorench, Jehova nitivontponnacho Dev. To xoktivont asa.
Je tacher ragar zatat tankam sogleank loz bhogchi poddttoli.
25 Jehovachi seva korun tannim sarkem kelem mhunn Izraelachea soglea sonstik* kollon ietolem.
Ani tachea vixim te gorvan uloitole.’”