Dhormdutancho Itihas
22 “Bhavamno ani vhoddilamno, hanv kitem sangonk sodhtam tem aikon gheiat.” 2 Paulu Hebrev bhaxent uloita tem aikon te anikui xant zale. Tannem mhunnttlem: 3 “Hanv ek Judev, ani mhozo zolm Silisiantlea Tarsusant zalʼlo. Hanvem heach xarant, mhunnche Jeruzalemant Gamalielachea paim-am koddem boson xikxonn ghetlem. Mhaka mhojea purvozancho Kaido khoraien pallunk xikoilʼlo. Zoxe aiz tumi sogle Devachi urben seva kortat toxi hanv-ui kortalom. 4 Somiachea Vatten choltoleank, zaum dadlo vo bail, hanv tankam sogleank dhorun bondkhonnint ghaltalom. Hanvem tim moro poriant tancher zulum kelo. 5 Hea vixim mha-iadnik ani vhoddilanchi akʼkhi sobha govai asa. Hanvem tanchea koddlean Damaskachea Judev bhavam pasot chittio pasun boroun ghetleo. Thoim Somiache Vatten choltoleank Jeruzalemant haddun khast diunk, hanv tankam dhorun haddunk voitalom.
6 “Hanv provas korun Damaska lagim pavcho aslom tednam, donparchea vellar mollbar thaun okosmat ek uzvadd mhojea bhonvtonnim porzollʼllo, 7 ani hanv zomnir poddlom. Magir ek avaz mhaka oxem mhunnttalo to mhaka aikonk ailo: ‘Saulu, Saulu, tum mhaka kiteak dhumallo dita?’ 8 Hanvem mhunnttlem: ‘Tum konn Somia?’ Ani tannem zobab dilo: ‘Hanv Nazaretkar Jezu, zaka tum dhumallo dita.’ 9 Je mhojea borabor asle tankam to uzvadd distalo, punn mhojea lagim konn uloita tacho avaz tankam aikonk ieunk na. 10 Tednam hanvem mhunnttlem: ‘Somia hanv kitem korum?’ Somian mhaka mhunnttlem: ‘Utth, ani Damaskak voch. Ani thoim tuka korunk nemla tim soglim kamam tuka sangtole.’ 11 Punn tea uzvaddak lagon mhaka kainch disona zalem dekhun mhojea sangata asloleamnim mhojea hatak dhorun mhaka Damaskak haddlo.
12 “Thoim Ananias nanvacho ek munis aslo, zo Devacho akʼkho Kaido pallttalo, ani Dev-bhirantin jietalo. Thoim ravpi sogle Judev tachi tokhnnai kortale. 13 To ailo ani mhojea lagim ubo ravlo ani tannem mhaka mhunnttlem: ‘Saulu, mhojea bhava, tuji dixtt tuka porot mellom!’ Ani teach vellar mhoji dixtt mhaka porot mellʼlli ani hanvem taka polloilo. 14 Tannem mhunnttlem: ‘Amchea purvozanchea Devan, apli khuxi kitem ti tuka kollounk, ani tunvem zo nitivont ani povitr asa taka pollouncho ani tacho avaz aikoncho mhunn tuka vinchun kaddla. 15 Karonn tunvem polloileat ani aikoleat tea vostum vixim soglea lokam mukhar tunvem tachea pasot sakx diunchi poddttoli. 16 Atam tum kiteak vell kaddtta? Utth, ani bautizm ghe. Ani tachea nanvan ulo marun tujim patkam dhuvun uddoi.’
17 “Punn hanv Jeruzalemant porot ieun Devmondirant magnnem kortalo tednam mhaka ek dorxon dislem. 18 Tea dorxonant Somian mhaka mhunnttlem: ‘Zata titlea begin Jeruzalemantlean bhair soron voch, karonn mhojea vixim tum dita ti sakx te manun gheunche nant.’ 19 Tednam hanvem mhunnttlem: ‘Somia, tujer bhavarth dovortoleank hanv bondkhonnint ghaltalom ani dor eka sobha-ghorant vochon tankam martalom mhunn te zannant. 20 Ani tuzo sakxi Istevak te jivexim martale tednam hanv thoinch ubo ravon taka martoleank sangat ditalom ani tanchea kopddeanchi rakhonn kortalom.’ 21 Tori astana, tannem mhaka mhunnttlem: ‘Voch, hanv tuka poisulʼlea raxttrantlea lokam koddem dhaddttam.’”
22 Atam poriant lok Pauluchem aikotale. Punn magir te mottea-mottean bob marunk lagle: “Hea munxak marun uddoiat. To jivo uronk purto na!” 23 Te mottʼttean bob marun, aple kopdde hanga-thoim uddounk lagle, ani dhulʼl varear xevttunk lagle. 24 Taka lagon, Pauluk soinik ravtat tea zagear vhorcho ani chabkamnim marun tachi choukoxi korchi mhunn senapotin hukum dilo. Karonn lok hea toren Pauluchea add kiteak bob martale tem to zannam zaunk sodhtalo. 25 Punn chabkamnim marunk soinikamnim taka bandlo tednam Paulun ubo aslolea soinikachea odhikareak mhunnttlem: “Eka Romi nagrikak tacho guneanv asa kai na tem pollounchea poilinch* chabkamnim marop sarkem asa kai?” 26 Soinikanchea odhikarean hem aikolem tednam to senapoti koddem gelo ani tannem taka hi khobor diun mhunnttlem: “Tum kitem korunk sodhta? Ho munis ek Romi nagrik.” 27 Tednam senapotin Paulu koddem vochon vicharlem: “Tum khorench Romi nagrik?” Tannem mhunnttlem: “Hoi.” 28 Senapotin mhunnttlem: “Hanvem khub poixe diun Romi nagrik zauncho odhikar vikto ghetla.” Paulun mhunnttlem: “Punn mhaka tor to zolma thaunuch mellʼlla.”
29 Tednam je munis taka boroch marun choukoxi korpache asle te rokddech fatti sorle. Ani apnnem eka Romi munxak sanklleamnim bandlo hem chintun Senapoti bhielo.
30 Judev lok Paulucher kiteak arop ghaltale tem senapotik zannam zaunchem aslem dekhun dusrea disa tannem Pauluk soddlo ani mukhel iadnikank ani akʼkhe Mha-sobhek* ektthaim zauncho hukum dilo. Uprant, tannem Pauluk sokol haddlo ani tanchea modem ubo kelo.