Dhormdutancho Itihas

10 Sezariant Kornel nanvacho ek munis aslo. To soinikanchea Itali mhunnttat tea pongddacho* odhikari* aslo. 2 To ek bhoktivont munis aslo. To ani tachi famil Devachea bhirantin choltalim. Lokank to zaitem dan* ditalo ani Devak kallzant thaun sodanch vinovnneo kortalo. 3 Donparchea sumar tin vorancher* tannem eka dorxonant Devacho dut polloilo. Tea dutan tachea lagim ieun taka mhunnttlem: “Kornel!” 4 Kornel bhirantin taka polloit urlo, ani taka vicharunk laglo: “Kitem Dhonia?” Tannem taka mhunnttlem: “Tum kortalo tea magnneacher ani tum ditalo tea danancher Devan dhean dilam. 5 Tor, tum atam tujea munxank Jopak dhaddun Pedru mhunnttat tea Simanvak apoi. 6 To chambddeachem kam kortolea Simanvachea ghorant ravta. Tachem ghor doriache deger asa.” 7 Devdut gelea uprant rokddench Kornelan aplea don sevokank ani sodanch tache sevek toiar astat tea soinikam modlea Dev-bhirantin choltolea eka soinikak apoun haddlo. 8 Tannem tankam sogli khobor sangon Jopak dhaddle.

9 Dusrea disa Kornelache sevok provas korun xara lagim pavot aile tednam, Pedru donparchea sumar bara vorancher* ghoracher voir* magnnem korunk gelo. 10 Punn taka borich bhuk lagli ani to kitem tori khaunk sodhtalo. Ani te jevonn randtale tednam tannem ek dorxon polloilem. 11 Mollob uktem zata ani vhoddlea chadra bhaxen kitem tori* sokol denvon ieta tem tannem polloilem. Tem charui konnxeamnim dhorun prithumecher denvoitale. 12 Ani tantunt prithume voilim soglea torechim char paim-anchim zonvaram ani pott goxttun cholpi pranni ani mollba voilim suknnim aslim. 13 Uprant Pedruk ek avaz aikonk ailo: “Pedru, utth, hankam kator ani kha!” 14 Punn Pedrun mhunnttlem: “Na Dhonia, na, karonn hanvem kednanch koslinch mhellim ani oxudʼdh zonvaram khaunk nant.” 15 Porot ek pavtt tea avazan taka mhunnttlem: “Devan xudʼdh keleat tea vostunk tum mhelleo mhunnpachem bond kor.” 16 Oxem tin pavtti ghoddlem, ani rokddich ti chadra sarki vost* mollbar ubarun vheli.

17 Hea dorxonacho orth kitem kai mhunn Pedru chintunk poddlo. To chintʼta thoinch astana, Kornelan dhaddlole munis Simanvachem ghor sodhit-sodhit darachea mukhar ieun ube ravle. 18 Tannim mottʼttean ulo marun Pedru mhunnttat to Simanv hangach ravta kai mhunn vicharlem. 19 Pedru dorxona vixim chintʼtalo tednam povitr xokten taka mhunnttlem: “Polloi! Tin munis tuka sodhunk aileat. 20 Tor utth, ani sokol voch. Kainch dubhav dhorinastana tanchea borabor voch, karonn hanvench tankam dhaddleat.” 21 Pedru panvdde denvon tea munxam lagim ailo ani tannem mhunnttlem: “Tumi jea munxak sodhtat, to hanvuch. Tumi hanga kiteak aileat?” 22 Tannim mhunnttlem: “Kornel nanvachea soinikanchea eka odhikarean amkam dhaddleat. To Devachea bhirantin cholpi ek nitivont munis, ani sogle Judev tache vixim borem uloitat. Tuka apoun hadd ani jem tum sangtolo tem aik mhunn Devan eka povitr duta udexim taka sanglem.” 23 Hem aikon Pedrun tankam bhitor apoile ani aple soire koxe tankam tea ghorant ravonk sanglem.

Dusrea disa Pedru utthlo ani tanchea borabor gelo. Jopantle thodde bhav pasun tanchea borabor gele. 24 Tachea dusrea disa to Sezariant pavlo. Thoim Kornel tanchi vatt polloitalo. Tannem aplea soireank ani ixttank pasun aplea ghora apoilʼle. 25 Pedru ghorant bhitor sortanch Kornel taka mellʼllo, ani tannem Pedruchea paim-am poddon taka nomoskar kelo. 26 Punn Pedrun taka utthoun mhunnttlem: “Ubo rav; hanv pasun tujea sarkoch ek munis.” 27 Pedru tachea lagim uloitam-uloitam bhitor gelo ani thoim khub lok ektthaim zalʼle tannem polloile. 28 Tannem tankam mhunnttlem: “Eka Judevak dusrea zatichea khoinchea-i munxak mellop vo tanger vochop, kitlem chukichem tem tumi bore bhaxen zannant. Tori astana hanvem khoincheach munxak mhello vo oxudʼdh mhunncho nhoi mhunn Devan mhaka dakhoilam. 29 Taka lagon, tumi mhaka apoilo tednam hanv fattim-fuddem soronastana ailom. Tor, atam tumi mhaka kiteak apoila tem sangat.”

30 Kornelan zobab dilo: “Aichean char disam poilim, donparchea sumar tin vorancher* hanv mhojea ghorant magnnem kortalom. Tednam dhove-fulʼl kopdde ghalun ek munis mhojea mukhar ieun ubo ravlo, 31 ani tannem mhunnttlem: ‘Kornel, Devan tujem magnnem aikolam, ani tum jim danam dita tancher tannem dhean dilam. 32 Tor, tujea munxank Jopak dhadd ani Pedru mhunnttat tea Simanvak apoun hadd. Ho munis chambddeachem kam korpi, ani doria deger ravpi Simanvachea ghora ravta.’ 33 Taka lagon, hanvem rokddoch tuka apounk dhaddlo, ani tunvem hanga ieun amkam doia dakhoili. Tor atam ami sogle Deva mukhar hajir asat ani Jehovan* tuka jem kitem amkam sangpachi adnea dilea tem aikonk ami toiar asat.”

34 Pedrun ulounk suru kelem: “Dev bhedbhav korina mhunn atam hanv ekdom bore bhaxen somzolom. 35 Tor, dor eka raxttrant zo konn tachi bhirant dhorta ani sarkem tem korta, to Devak manvota. 36 Devan Izraelitkarank ek sondex dhaddlo ani Jezu Krista udexim Deva sangata xanti korunk zata hi bori khobor tankam dili. Hoch to Jezu—sogleancho Somi. 37 Juanvan bautizmachi porgottnni korunk suru keli tea uprant Galilient koslea vixoi-acher lok ulounk lagle ani uprant ti khobor akʼkhea Judeiant posorli hem tumi zannant: 38 Te Nazaretkar Jezu vixim uloitale. Koxe toren Devan taka povitr xokten makhlo ani taka boll dilem, ani to akʼkhea desant borem kam korit ravlo ani Soitan* sotaitalo tankam bore korit ravlo, hem tumi aikolam, karonn Dev tachea sangata aslo. 39 Tannem Judevanchea desant ani Jeruzalemant kelʼlea soglea kamache ami govai zaun asat, punn tannim taka khambear* khillaun jivexim marlo. 40 Heach Jezuk Devan tisrea disa jivont kelo ani to lokank dixtti poddo-so kelo.* 41 Punn soglea lokank nhoi. Tachea bodlek, Devan poilinch tharailolea sakxeam mukhar, mhunnche amchea mukhar dixtti poddo-so kelo. To melʼleantlo jivont zalea uprant ami tachea sangata khalem ani piele. 42 Toxench, tannem amkam lokam koddem vochon oxem porgott korchem ani purnn toren sakx diunchi mhunn adnea dili, ki ho toch zaun asa zaka Devan jiveancho ani melʼleancho neai korpi mhunn nemla. 43 Soglea provadeamnim heach Jezuchi govai dili ki zo konn tacher visvas dovorta taka tachea nanvan patkanchem bhogsonnem mellttolem.”

44 Pedru hem soglem tanchea lagim uloita astanach utor aikotale titleancherui povitr xokti denvon aili. 45 Pedru borabor ailolea sunot zalʼlea visvaxi bhavamnim, videxi lokank povitr xoktechem funkott dennem melltta tem polloilem tednam te khub ojap zale. 46 Te lok veg-veglleo bhaso* uloitat ani Devachi vakhannʼnni kortat tem tannim polloilem. Tednam Pedrun mhunnttlem: 47 “Hea lokank pasun amchea sarkich povitr xokti mellʼllea. Tor udkant bautizm gheunk tankam konn addaunk xokta?” 48 Oxem mhunnon Pedrun tankam Jezuchea nanvan bautizm gheuncho mhunn adnea dili. Tea uprant tannim Pedruk thodde dis aplea borabor ravcho mhunn vinoti keli.