Dhormdutancho Itihas
24 Panch disam uprant mha-iadnik Ananias thoddea vhoddilank ani Tertulus nanvachea advogadak gheun thoim ailo ani tannim razpala mukhar Paulu add aple arop manddle. 2 Tertulusak ulounk sondhi dili tednam Paulucher arop ghalun tannem oxem mhunnttlem:
“Manadik Feliks, tuka lagon amkam xantin jieunk melltta ani tum boreo-boreo ievzonneo korta dekhun hea desant zaiti sudharnni zait asa. 3 Hancho amkam soglea vellar ani soglea zagear faido zait asa ani taka lagon ami tuje khub upkari asat. 4 Atam hanv tuzo chodd vell ghenastana, doia korun amchem matxe aikon ghe mhunn tuje lagim vinoti kortam. 5 Ho munis soglea trasanchi* survat. To akʼkhea sonvsarantlea Judevank sorkara add vochonk uksaita ani to Nazaretkaranchea dhormik zomeacho fuddari zaun asa. 6 Tannem Devmondir pasun oxudʼdh korpacho proitn kelo, taka lagon ami taka dhorlo. 7 *—— 8 Tunvem tachi choukoxi keli zalear, ami tacher je arop laitat te khore asat mhunn tuka kollon ietolem.”
9 Hem aikotoch Judev lok pasun tachea add ulounk lagle ani heo sogleo vostu khoreo asat mhunn khatren sangonk lagle. 10 Razpalan Pauluk tokli haloun ulounk khunna keli tednam tannem mhunnttlem:
“Tum zaitea vorsam thaun hea desacho neai korpi asa mhunn hanv zannam. Tor mhoji kes tujea mukhar manddunk mhaka khub khuxi bhogta. 11 Hanv Jeruzalemant bhokti korunk gelear 12 poros chodd dis zaunk nant. Hea vixim tunvem khatri korun gheunk zata. 12 Hanv Devmondirant konnam-i lagim zhogoddttalom vo sobha-ghorant vo akʼkhea xarant, lokank uksaun ektthaim kortalom mhunn konnench pollounk na. 13 Te mhojer zo arop laitat to khoro mhunn dakhounk te kainch puravo diunk xokonant. 14 Jea vattek te dhormik zomo mhunnttat, tachea pormonnem hanv mhojea purvozanchea Devachi povitr seva kortam mhunn manun ghetam. Karonn hanv Kaideant ani Provadeanchea Pustokant* boroilʼlea soglea vostuncher visvas dovortam. 15 Meleant tea soglea nitivont ani onitivont munxank Dev jivont kortolo mhunn he lok bhorvonso dovortat toxem hanv-ui bhorvonso dovortam. 16 Hakach lagon hanv mhojem ontoskornn Deva mukhar ani munxam mukhar nitoll dovrunk* proitn kortam. 17 Atam zaitea vorsam uprant, hanv mhojea desantlea lokank dan* diunk ani Devak iodn bhettounk ailʼlom. 18 Hanv Devmondirant hem kam kortalom tednam, hanv Kaidea pormonnem xudʼdh asa mhunn tannim polloilo. Thoim mhojea sangata zomo naslo vo hanv thoim kosloch bovall korinaslom. Asiant thaun ailole thodde Judev pasun thoim asle. 19 Tankam mhojea add kitem-i aslem zalear tannim hanga tujea mukhar ieun mhojer arop ghalunk zai aslo. 20 Vo hanv Mha-sobhe* mukhar ubo aslom tednam mhoji kitem chuk mellʼlli, tem hanga asloleam lokamnim sangchem. 21 Te mhojer fokot ekuch arop ghalunk xoktat ki hanvem mottʼttea avazan tanchea modem ubo ravon oxem mhunnttlem: ‘Melolim jivont zatolim hea vixoi-ak lagon aiz mhoji tujea mukhar zhoddtti zata!’”
22 Feliks, Somiachea Vatte vixim sot kitem tem bore bhaxen zannam aslo. Tori astana tannem oxem mhunnon tankam dhaddun dile: “Senapoti Lisias ieta tednam hanv hea vixoi-acher nirnnoi ghetolom.” 23 Tednam tea munxak bondkhonnint dovorcho punn taka thoddim kamam korunk diunchim ani tachea lokank taka modot korunk diunchi mhunn tannem soinikanchea odhikareak hukum dilo.
24 Thoddea disam uprant Feliks apli bail Drusilak gheun ailo, ji ek Judev asli. Feliksan Pauluk apoun haddlo ani Paulu Krist Jezucher bhavarth dovorchea vixim uloilo tednam tachem aikolem. 25 Punn Paulu nitivontponn, svotacher tabo dovrop ani ieunchi asa ti zhoddtti, hea vixim ulounk laglo tednam Feliks bhielo ani tannem mhunnttlem: “Atam tum voch, mhaka fuddem kednam-i sondhi melltta tednam hanv tuka porot apoitolom.” 26 Teach borabor taka Paulu koddlean poixe mellttole mhunn to as dovrun aslo. Tea pasot, to porot-porot Pauluk apoun haddun tache lagim uloitalo. 27 Oxe toren don vorsam soron gelim ani Feliksachea zagear Porsius Festus ailo. Feliks Judevank khuxal korunk sodhtalo dekhun tannem Pauluk bondkhonnintuch dovorlo.