Dhormdutancho Itihas
15 Uprant Judeia thaun thodde lok Antiokak aile ani thoinchea bhavank oxem xikounk lagle: “Jea meren tumi Moizesa udexim dilʼlea kaidea pormonnem sunot korinant, tea meren tumkam taronn mellonk xokona.” 2 Punn hea vixoi-acher Paulu ani Barnabasa lagim tancho vad-vivad zalo ani te borech zhogoddle. Dekhun hea vixim Paulun ani Barnabasan, ani toxench anik thoddea bhavamnim Jeruzalemantlea apostlam ani vhoddilam lagim vochon ulounchem mhunn manddavoll keli.
3 Sobhentlim bhav-bhoinnam thoddi vatt meren tankam pavounk ailim, ani uprant he bhav Finisia ani Samarientlea vattarantlean gele. Ani thoim Judev nhoi te lok koxe toren svotak bodlun Devak lagim sorleat tea vixim bhavank bariksannen sanglem. Hem aikon te khub khuxal zale. 4 Te Jeruzalemant pavle tednam sobhen, apostlamnim ani vhoddilamnim khuxalkaien tankam ieukar dilo. Ani Devan tanchea udexim kelʼlea soglea kamam vixim Paulun ani Barnabasan tankam sanglem. 5 Punn Farizevanchea zomeantlea thoddea lokamnim zannim bhavarth dovorlolo, tantuntle thodde aplea zagea voile utthon ube ravle. Ani tannim mhunnttlem: “Judev nhoi to lok zannim bhavarth dovorla tanchi sunot korunk zai ani Moizesa udexim dilʼlo Kaido pallcho mhunn tankam adnea diunk zai.”
6 Tednam apostl ani vhoddil hea vixoi-acher ulounk ektthaim zale. 7 Tannim hea vixoi-acher bariksannen chintlem ani tanchea modem khub ulovop zalem.* Tea uprant Pedru ubo ravlo ani tannem mhunnttlem: “Bhavamno, Judev nhoi tea lokamnim mhojea tonddantlean bori khobor aikonchi ani bhavarth dovorcho mhunn Devan tumchea modlo survatekuch mhaka vinchlo hem tumi bore bhaxen zannant. 8 Ani Dev, zo kallzam vollkhota, tannem tankam povitr xokti diun, zoxi amkam maniotai dilea toxi tankam-i maniotai dilea mhunn sakx dilea. 9 Tannem amchea modem ani tanchea modem kainch bhedbhav korunk na, punn tanchea bhavarthak lagon tanchim kallzam xudʼdh keleant. 10 Tor amchea purvozank vo amkam pasun jem vhoronk zodd zata, toslem vojem hea xisancher dovrun tumi Devachi porikxa kiteak kortat? 11 Tachea bodlek, Jezu Kristachea favo naslole doien amkam taronn melltta toxem tankam-i melltta mhunn amkam bhavarth asa.”
12 Hem aikon te sogle lok vogi ravle, ani Barnabas ani Pauluchem aikonk lagle ki koxe toren Devan tanchea udexim Judev nhoi tea lokam modem vizmitam ani ojapanchim kamam kelim. 13 Tanchem uloun zalem tednam Jakoban mhunnttlem: “Bhavamno, mhojem aikat. 14 Devan koxe porim poilech pavtti Judev nhoi toslea lokancher dhean dilem ani tanchea modle aplea nanva pasot lokank vinchun kaddle tea vixim Simeanvan* bariksannen amkam sanglem. 15 Ani Provadeanchea Pustokamnim* pasun oxench boroilʼlem asa. Thoim mhunnttlam: 16 ‘Heo ghoddnneo ghoddlea uprant hanv porot ietolom ani hanv Davidachem moddon poddlolem ghor porot ubo kortolom, ani tache moddon poddlole bhag porot bandun kaddttolom ani tem poilim aslolem toxench kortolom. 17 Tea udexim tancho urlolo lok soglea raxttrantlea lokam sangata mellon, kallzant thaun Jehovak* sodhtolo. Tanchea vixim Jehovan* mhunnttlam, ki tankam mhojea nanvan vollkhotat. Dev, zo hem soglem korta, 18 tannem khub poilinch oxem korchem tharailʼlem.’ 19 Taka lagon, Deva koddem vollon aileat tea Judev nhoi tea lokank ami tras korcho nhoi oso mhozo nirnnoi asa.* 20 Punn tankam murti pujen boxttailʼlea vostum thaun, onoitik kuddichea sombonda* thaun, gollo damun marlolea zonvarachea masa thaun* ani rogta thaun pois ravchem mhunn boroun dhaddum-ia. 21 Karonn poilinchea kallar thaun oxe lok asat je Moizesachea pustokamnim boroilʼleo vostu dor eka xarant porgott korit aile. Te dor eka sabathachea disak sobha-ghoramnim tachea pustokantlean dusreank vachun dakhoitat.
22 Uprant apostlamnim, vhoddilamnim, ani akʼkhe sobhen tanchea modlea vinchlolea munxank Paulu ani Barnabasa borabor Antiokak dhaddpachem tharailem. Tannim Barsabas mhunnttat tea Judasak ani Silasak dhaddle. Te bhavam modem fuddakar ghetale. 23 Tannim hea bhavam koddem oxi chitt boroun dhaddli:
“Antiok, Siria, ani Silisiant ravpi Judev nhoi tea bhavamno, tumchea bhavancho, mhunnche apostlancho ani vhoddilancho tumkam nomoskar! 24 Ami oxem aikolam ki hanga thaun thoddea lokamnim ieun thoddeo vostu sangon tumkam ghuspaile ani tumcho bhavarth haloupacho proitn kelo. Khorem mhunnttlear, ami osleo kosleoch suchounneo tankam diunk nasleo. 25 Taka lagon, ami sogleamnim ekmotan thoddea bhavank vinchun tankam amchea mogall Barnabas ani Paulu sangata tumche koddem dhaddpachem tharailam. 26 He osle munis zaun asat zannim amcho Somi Jezu Kristachea nanva pasot aplo jiv pasun dhokeant ghatlo. 27 Ami Judas ani Silasak dhaddttat. Te svota tumkam hea vostum vixim sangtole. 28 Ami povitr xoktechea modotin oso tharav gheunk pavle ki fuddem sangloleo gorjecheo vostu soddun ami tumcher anik koslench vojem ghalchem nhoi: 29 tumi murtek bhettoilʼlea vostum thaun, rogta thaun, gollo damun marlolea zonvarachea masa thaun* ani onoitik kuddichea sombonda* thaun sodanch pois ravat. Tumi zor dhean dilem ani hea vostum thaun pois ravle zalear tumchem sodanch borem zatolem. Mog asom!”
30 Magir tannim tea bhavank dhaddun dile. Te Antiokak gele ani tannim thoim soglea xisank ektthaim kele ani tankam ti chitt dili. 31 Chitt vachun tankam khub urba mellʼlli ani te khub khuxal zale. 32 Judas ani Silas provadi asle dekhun tannim khub bhaxonnam diun bhavank urba dili ani tancho bhavarth ghott kelo. 33 Tannim thoim thoddo vell sarlea uprant, thoinchea bhavamnim tankam bore korun vochat mhunn sangon, jea bhavamnim tankam dhaddlole tanche koddem tankam porot dhaddun dile. 34 *—— 35 Punn Paulu ani Barnabas Antiokantuch ravle ani zaitea lokam sangata mellon, Jehovachea* utra vixim bori khobor xikoit ani porgottit ravle.
36 Magir thoddea disam uprant, Paulun Barnabasak mhunnttlem: “Chol* ami tea soglea xaramnim porot vochum-ia, jea xaramnim ami Jehovachem* utor xikoilʼlem ani porgott kelʼlem. Thoinche bhav koxe asat tem ami polloun ieum-ia.” 37 Barnabasak koxe-i bhaxen aplea sangata Marku mhunnttat tea Juanvak gheun vochonk zai aslem. 38 Punn Pauluk, taka aplea sangata vhorop sarkem disonk na. Karonn Pamfiliant to tankam soddun gelʼlo ani tannem hem kam korunk tankam sangat diunk na. 39 Hea karonnak lagon Paulu ani Barnabasa modem boroch vad-vivad zalo. Taka lagon te eka-meka thaun veglle zale. Barnabas Markuk gheun tarvar boson Siprusak vochonk bhair sorlo. 40 Punn Paulun Silasak vinchlo. Jehovachi* favo nasloli doia Paulucher urchi mhunn bhavamnim magnnem kelem. Uprant te dogui bhair sorle. 41 To Siria ani Silisiantlea vattarantlean sobhek ghottai di-it gelo.