Dhormdutancho Itihas
25 Judeiant* ieun karbhar hatant ghetlea uprant, tin disamnim Festus Sezaria thaun voir Jeruzalemant gelo. 2 Tednam mukhel iadnikamnim ani Judevanchea khas lokamnim apleak Paulu add kitem aslem tem Festusak sanglem. Ani tachea lagim vinoti korun 3 Pauluk Jeruzalemant dhaddun amcher upkar kor mhunn sanglem. Khorem mhunnttlear, tannim apunn lipon bostole ani vatteruch Pauluk marun uddoitole mhunn ievzonn kelʼli. 4 Punn, Pauluk Sezariantuch dovorcho ani apunn beginuch thoim vochpacho asa mhunn Festusan sanglem. 5 Tannem mhunnttlem: “Tea munxan khorench chuk kelea zalear tumchea modlea odhikareamnim mhojea borabor ieunchem ani tacher toso arop ghalcho.”
6 Sumar atth vo dha dis Jeruzalemant ravlea uprant, Festus Sezariak ailo. Dusrea disa to neai korpachea zagear boslo ani Pauluk aplea mukhar haddcho mhunn tannem hukum dilo. 7 Paulu ailea uprant Jeruzalemantlean ailole Judev tachea bhonvtonnim ube ravle, ani tacher vhoddle-vhoddle arop ghalunk lagle, punn tanche te kainch purave diunk xokonasle.
8 Punn Paulun apli kainch chuk na mhunn dakhounk oxem mhunnttlem: “Hanvem Judevanchea Kaidea add, Devmondira add vo Somraza add kainch patok korunk na.” 9 Judevank khuxal korunk Festusan Pauluk oxem mhunnttlem: “Hea sogleam vostum vixim mhojea mukhar tuji zhoddtti zaunk tuka Jeruzalemant vochonk zai?” 10 Punn Paulun mhunnttlem: “Hanv Somrazachea neai korpachea zagea mukhar ubo asa. Mhoji zhoddtti hangach zaunk zai. Hanvem Judevank kainch vaitt korunk na, ani hem tuka bore bhaxen kollon ailam. 11 Punn hanv guneanvkari zalear ani mhojer mornnachem formonn mari sarko hanvem guneanv kela zalear, hanv moronk toiar asam. Punn hea munxamnim mhojer ghatleat te arop khotte asat zalear, fokot tankam khuxal korunk konnuch mhaka tanchea tabeant korunk xokona. Hanv Somraza* koddem neai magtam!” 12 Apleak solʼlo diupeam lagim uloilea uprant, Festusan Pauluk mhunnttlem: “Tunvem Somraza koddem neai magla; tor tum Somraza koddem voitolo.”
13 Thoddea disam uprant, Agripa* Raza ani Bernis Festusak mellonk Sezariak ailim. 14 Tim thoim khub dis ravpachim aslim dekhun Festusan Pauluchea kesi vixim razak sanglem. Tannem mhunnttlem:
“Feliksan bondkhonnint dovorlolo ek munis hanga asa. 15 Hanv Jeruzalemant aslo tednam Judevanchea mukhel iadnikamnim ani vhoddilamnim tachea vixim mhaka mahiti dili, ani tacher mornnachem formonn mar mhunn mhojea koddem vinoti keli. 16 Punn eka guneanvkarak, tacher arop ghaltat tanchea mukhar dhaddlea xivai, ani taka aple vatten ulounk sondhi dilea xivai, fokot tacher arop kornnareank khuxal korunk lagon tanchea tabeant korop, oxi Romi lokam modem rit na mhunn hanvem tankam sanglem. 17 Taka lagon, te hanga aile tednam vell kaddinastana dusreach disa hanv neai korpachea zagear boslom ani tea munxak mhojea mukhar haddcho mhunn hukum dilo. 18 Tacher arop ghalpi hanga ieun ube ravle tednam te tacher vhoddle-vhoddle arop ghaltole oxem hanv chintʼtalom. Punn tannim toxem kainch korunk na. 19 Tanche vad-vivad tanchea Devachea bhoktek lagon* ani Jezu nanvachea eka munxak lagon asle, zo mela punn to jivont asa mhunn Paulu khatren sangtalo. 20 He vad-vivad koxe suttave korche hem mhaka somzonaslem dekhun hea vixim zhoddtti zaunk, taka Jeruzalemant vochonk zai kai mhunn hanvem Pauluk vicharlem. 21 Punn Augustan* apli zhoddtti kori poriant apleak bondkhonnintuch dovorcho mhunn Paulun vinoti keli dekhun, taka Somraza lagim dhaddtta tea meren taka hangach dovorcho mhunn hanvem hukum dilo.”
22 Teednam Agripan Festusak mhunnttlem: “Hanv tachea tonddantlean aikonk sodhtam.” Festusan taka mhunnttlem: “Tuka faleam aikonk mellttolem.” 23 Dusrea disa Agripa ani Bernis aplem vhoddponn dakhoit neai-sobhent ailim. Tanchea sangata Senapoti ani xarantle famad lok pasun aile. Uprant Festusan hukum diun Pauluk thoim haddlo. 24 Festusan mhunnttlem: “Raza Agripa ani hanga aslolea soglea lokamno, polloiat ho munis tumchea mukhar ubo asa. Hea munxa vixim Jeruzalemantlea ani hanga aslolea soglea Judevamnim, to jieunk purto na, tor taka jivexim marcho mhunn mhoje koddem bob marun vinoti kelea. 25 Punn hea munxacher mornnachem formonn mari sarkem tannem kainch korunk na mhunn mhaka dison ailem. Taka lagon, tannem Augusta koddem neai magpachi vinoti keli tednam hanvem taka thoim dhaddunk tharailem. 26 Punn tachea vixim Somrazak kitem-i boroitolo zalear mhoje koddem kainch na. Hachi choukoxi zalea uprant, hanv hache vixim kitem tori borounk xoktolom dekhun hanvem tumchea sogleam mukhar, ani chodd korun Agripa Raza, tujea mukhar taka haddla. 27 Karonn eka koideak tacher koslo arop ghatlolo asa to sangonastana dhaddop mhaka sarkem disona.”