Dhormdutancho Itihas
28 Ami doria deger surokxit pavlea uprant, tea zunveachem nanv Malta mhunn amkam kollon ailem. 2 Tea zunvea voilea lokamnim* amkam khas toren doia* dakhoili ani amkam khub modot keli. Tannim amchea pasot uzo pettoilo karonn thoim khub paus ani thonddi poddttali. 3 Paulun thoddim lakddam ektthaim korun, ujeant ghatlim tednam gormek lagon tantuntlean ek vikari sorop bhair sorlo ani Pauluchea hatak guttlolo. 4 Zunvea voilea lokamnim* tachea hatar ek vikari sorop lambta to polloilo tednam te eka-mekak mhunnonk lagle: “Ho munis khorench khuni astolo. Doriantlean tacho jiv vattovlo, punn Neai* taka jivo ravonk dina.” 5 Paulun hat fafddun sorpak ujeant uddoilo punn taka kainch tras zaunk nant. 6 Atam tachi kudd suztoli vo to okosmat poddttolo ani mortolo mhunn te vatt polloitale. Tannim khub vell vatt polloili ani taka kainch vaitt zaunk na tem polloun, tannim aplem chintop bodolʼlem ani to konn tori ek dev astolo oxem te mhunnonk lagle.
7 Thoim laginch tea zunveacho mukheli Publiusachim zaitim bhattam aslim. Tannem amkam ieukar dilo ani tin dis meren amkam jevonn-khann dilem ani amchi kallji ghetli. 8 Publiusacho bapui duent aslo. Taka zor ietalo ani bhairam* zatalem. Paulun tachea lagim vochon magnnem kelem, ani aple hat tacher dovrun taka boro kelo. 9 Oxem zalem tednam zunvea voile urlole duent lok pasun Paulu koddem ieunk lagle ani tannem tankam bore kele. 10 Uprant zaitim dennim diun tannim amkam man dilo. Ani ami tarvar choddonk lagle tednam tannim amkam provasak gorjecheo teo sogleo vostu dileo.
11 Tin mhoinea uprant ami Aleksandriachea eka tarvar boson bhair sorle. Tem tarum thonddechea disamnim teach zunvear aslem. Tachea fuddlea vatten ‘Zeusachea Putanchim’ tonddam korun lailʼlim. 12 Uprant ami Sirakusant nangor ghatlo ani tin dis thoinch ravle. 13 Magir thoim thaun bhair soron ami Rejium pavle. Eka disa uprant dokxinne koddcho varo suttlo ani dusrea disa ami Puteoli pavle. 14 Hanga amkam Kristi bhav mellʼlle. Ami tanchea sangata sat dis ravchem mhunn tannim amchea lagim vinoti keli. Tea uprant, ami Romak vochonk bhair sorle. 15 Ami thoim pavle mhunn bhav-bhoinnank kollʼllem tednam tim amkam mellonk, Apiusacho Bazar ani Tin Hotelam* meren ailim. Tankam polloitanch Paulun Devache upkar attoile ani dhir ghetlo. 16 Xevottak ami Romak pavle tednam Pauluk ekttoch ravonk porvangi mellʼlli ani tachi rakhonn korunk eka soinikak nemlo.
17 Tin disam uprant, tannem Judevanchea khas munxank apnna lagim apoile. Te ektthaim zale tednam tannem tankam oxem mhunnttlem: “Bhavamno, hanvem mhojea lokanchea vo mhojea purvozanchea riti-rivazam add kainch korunk na, tori astana Jeruzalemant koidi korun mhaka Romkarachea hatant dilo. 18 Tannim mhoji choukoxi kelea uprant, mhojer mornnachem formonn mari sarkem tankam kainch mellonk na dekhun te mhaka suttka diunk sodhtale. 19 Punn Judevamnim tacho virodh kelo tednam mhaka Somraza* koddem neai magchea xivai anik kainch upai naslo. Hem hanvem mhaka mhojea raxttracher arop ghalunk zai mhunn korunk na. 20 Ani taka lagon hanvem tumkam apoun tumchea lagim ulounchi vinoti keli. Karonn Izraelitkaramnim zo bhorvonso dovorla takach lagon mhaka hea sanklleamnim bandla.” 21 Tannim Pauluk mhunnttlem: “Amkam tujea vixim Judevam koddlean chitteo mellonk nant, na mhunn thoim thaun ailolea khoinchea-i Judev bhavan tujea vixim khobor diunk na vo vaitt ulounk na. 22 Punn tuje vichar kitem asat tea vixim tujech koddlean aikolear sarkem zatlem oxem amkam dista, karonn tum jea zomeant asa tea vixim sogle koddem lok add uloita mhunn ami zannant.”
23 Tannim taka mellonk ek dis tharailo ani to ravta thoim anikui chodd lok ektthaim aile. Ani sokall tem sanz zai poriant Paulun tankam Devachea Rajea vixim bore bhaxen sakx dili ani somzailem. Tannem Jezu vixim khatri diunk Moizesa udexim dilʼlea Kaideantlean ani Provadeanchea Pustokantlean* zaite purave dile. 24 Tanchea modlea thoddea lokamnim Pauluchea utrancher visvas dovorlo, punn thoddeamnim dovrunk na. 25 Tanchea modem vad-vivad zalo dekhun te vochonk lagle. Tednam Paulun tankam mhunnttlem:
“Povitr xokten Izaias provadea udexim tumchea purvozank sanglolem tem sarkem zaun aslem. 26 Tannem mhunnttlolem: ‘Hea lokam lagim voch ani tankam sang: “Tumi aikotole punn tumkam koxench somzochem na, tumi polloitole punn tumkam koxench dischem na. 27 Karonn hea lokanchem kalliz fatra sarkem ghott zalam. Te aplea kanamnim aikotat punn kainch korinant, tannim aple dolle bond keleat. Tannim aplea dolleamnim kednanch pollounchem nhoi, aplea kanamnim kednanch aikonchem nhoi, toxench aplea kallzant orth somzon gheuncho nhoi ani mhojea lagim porot ieunchem nhoi ani hanvem tankam bore korche nhoi mhunn te oxem kortat.”’ 28 Tea pasot tumi hem zannam zaunchem ki Deva thaun melltta to taronnacho sondex Judev nhoi tea lokam lagim dhaddla, ani te to aikon ghetolech.” 29 *——
30 To don vorsam meren bhaddeachea ghorant ravlo. Thoim tachea lagim ietolea soglea lokank to mogan ieukar ditalo. 31 To tankam Devachea Rajea vixim porgott kortalo ani ukteponnim* ani addkholl nastana Somi Jezu Krista vixim xikoitalo.