Korintkarank Poili Chitt
2 Dekhun bhav-bhoinnimno, hanv tumchea lagim ailom tednam Devacho povitr gutt hanvem tumkam sanglo. Zannaranchim vhoddlim-vhoddlim utram ani tanchi zannvai gheun hanv tumchea lagim ieunk na. 2 Karonn hanv tumchea modem astana, Jezu Krist ani taka khambear khillaila, hachea bhair anik khoincheach vostuncher tumchem dhean vhorchona mhunn hanvem tharailʼlem. 3 Hanv khub oskot zaun ani bhirantin koddkoddon tumchea lagim ailom. 4 Hanvem tumkam porgott kelem tednam tumkam khatreche purave diunk zannvaiechim vhoddlim-vhoddlim utram uzar korunk na. Tachea bodlek, mhojea utram vorvim povitr xoktechem boll dison ailem. 5 Tumi munxachea zannvaiecher nhoi, punn Devachea xoktecher bhavarth dovorcho mhunn hanvem oxem kelem.
6 Ami bhavarthant ghott aslolea lokank zannvaiecheo vostu sangtat. Punn hea sonvsarachea* zannvaie vixim vo hea sonvsarant odhikar choloitat ani nas zaunche asat tanchea zannvaie vixim nhoi. 7 Tachea bodlek, ami Devachea zannvaie vixim sangtat, ji povitr guttantlean dison ieta. Ami hea liplolea zannvaie vixim sangtat. Amkam mhoima mellchea pasot Devan hi zannvai sonvsarachi survat zaunchea poilim thaun tharailʼli. 8 Hea zannvaie vixim hea sonvsarant* odhikar choloitat tanchea modlo konnuch somzonk xoklona. Te somzolʼle zalear, amchea mhoimevont Somiak te marun uddounche nasle.* 9 Punn zoxem boroilʼlem asa: “Jeo vostu dolleamnim pollounk nant ani kanamnim aikonk nant, toxench tanchim chintnam pasun munxachea monant ieunk nant, tosleo vostu Devan aplo mog kortoleam pasot toiar kelʼleo asat.” 10 Karonn Devan teo vostu amkam aplea povitr xokte udexim kolloileat. Hi povitr xokti sogleo vostu, Devacheo kholaiecheo vostu pasun sodhun kaddtta.
11 Dusrea munxachea kallzant kitem asa tem konnuch munis zannam zaunk xokona, tachea kallzant kitem asa tem to svota zannam. Teach toren, Devachea kallzant kitem asa tem tachea povitr xokte xivai anik konnuch zannam zaunk xokona. 12 Amkam sonvsaracho sobhav nhoi, punn Devachi povitr xokti mellʼllea. Hea udexim Devan amkam doien dakhoileat teo vostu ami zannam zaunk pavtat. 13 Ami heo vostu dusreank pasun sangtat, punn munxachea zannvaien xikoilʼlea utramnim nhoi. Tachea bodlek, povitr xokten xikoilʼlea utramnim, karonn ami Devacheo vostu Devachea* utramnim somzaitat.
14 Punn munxachem chintop asa to Devachea povitr xokte thaun ietat teo vostu manun ghena, karonn teo vostu tachea nodren pixeponn zaun asa. To heo vostu zannam zaunk xokona, karonn teo vostu povitr xoktechea adaran topasunk zatat. 15 Devachem chintop aslolo munis* sogleo vostu topasunk xokta, punn konnuch munis taka topasunk xokona. 16 Karonn “Jehovachem* mon zannam zaun taka xikounk xokta oso konnui munis asa?” Punn amkam zalear Kristachem mon asa.