Korintkarank Poili Chitt
5 Khorem mhunnttlear, tumchea modlea eklean onoitik kuddicho sombond* dovorla mhunn mhaka kollon ailam. Oslem patok sonvsarantle lok pasun korinant. To munis aplea bapaichea bailek gheun ravta. 2 Tumkam hea vixim gorv bhogta? Tumi tor dukh korunk zai aslem nhoi, ani jea munxan hem patok kelam taka tumchea modlo bhair kaddunk zai aslo nhoi? 3 Hanv tumchea lagim na hem khorem, punn hanv monantlean tumchea laginch asam. Ani hanv thoinch aslolea bhaxen hanvem tea munxak guneanvkari tharaila. 4 Tumi Somi Jezuchea nanvan ektthaim zatat tednam hanv-ui* Somi Jezuchea xokten tumchea sangata asam mhunn zannam zaun, 5 tumi tea munxak Soitanachea tabeant korat. Tea udexim tachea patkacho vaitt porinnam kabar zatolo, ani Somiachea disa sobhechem chintop sarkem urtolem.
6 Tumi boddai martat tem sarkem nhoi. Ilʼlem-xem khomir akʼkhem pitt ambott korta mhunn tumkam khoborna? 7 Pornem khomir kaddun bhair uddoiat. Oxem kelʼlean, tumi mollʼllolem novem pitt zatole, zantunt khomir na. Khorem mhunnttlear, tumi toxinch asat. Karonn Paskacho menddro, mhunnche, Kristachem bolidan zalem. 8 Tor atam ami hi porob, pornea khomiran vo vaittponnachea ani noxtteponnachea khomiran monounchea bodlek, khomir naslole undde gheun monoum-ia zantunt promannikponn ani khoreponn asa.
9 Onoitik kuddicho sombond* dovortat toslea lokancho sangat dovrop bond korat mhunn hanvem tumkam mhojea chittint boroilʼlem. 10 Mhojea sangnneacho orth oso nhoi ki onoitik kuddicho sombond* dovortat vo as kortat vo luttun vhortat vo murti-puza kortat toslea sonvsari lokam borabor tumi sangat dovorcho nhoi. Oxem aslem zalear, tumkam hea sonvsarantlean bhair voichem poddtta aslem. 11 Punn atam hanv tumkam hem boroun oslea munxa sangata vell sarop bond korat mhunn sangtam, zo ek bhav zaunui onoitik kuddicho sombond* dovorta vo as korta vo murti-puza korta vo gallio marta* vo bebdo zaun asa vo luttun vhorta. Oslea munxa sangata jevunk poriant bosonakat. 12 Bhair asat tanchi nit korunk hanv konn? Punn bhitor asat tanchi nit tumi korunk zai nhoi? 13 Bhair asat tanchi nit Dev korta. “Tea noxttea munxak tumchea modlo bhair kaddat.”