Izaias
55 Ieiat, soglea tanelʼleamno, udkaxim ieiat!
Zanchea lagim poixe nant, tannim-i ieunchem ani gheun khaunchem-pieunchem!
Hoi ieiat, ani poixe farik korinastana, drakxancho soro ani dudh funkott gheiat.
2 Zo unddo khaun tumchi bhuk morona, tea unddea pasot tumi poixe kiteak moddttat?
Jem khaun dhadosponn mellona, tea pasot tumchi zodd* kiteak ibadd kortat?
Mhojem dhean diun aikat ani borem tem khaiat.
Ani tednam bori chorob aslolem jevonn jevun tumi khuxal zatole.
3 Mhojea lagim ieiat ani mhaka kan diat.
Mhojem aikat ani tumi jietole,
Hanv khorench tumchea sangata sasnacho korar kortolom,
Jea vorvim Davida pasot mhozo mog, visvaxi* ani khoro asa mhunn kollon ietolem.
4 Polloi! Hanvem taka raxttram pasot sakxi kela,
Raxttram pasot hanvem taka fuddari ani odhikari mhunn nemla.
5 Polloi! Tum tea raxttrak apoitolo zaka tum vollkhona,
Ani jem raxttr tuka vollkhona, tem raxttr tujea lagim dhanvon ietolem.
Tem Izraelacho Povitr Dev, tuzo Dev Jehovak lagon ietolem,
Karonn to tuka mhoimebhorit kortolo.
6 Jea meren Jehova mellonk xokta, tea meren taka sodhat.
Jea meren to lagim asa, tea meren taka ulo marat.
7 Noxttea munxan apli noxtti vatt soddun diunchi,
Ani vaitt munxan aple vaitt vichar soddun diunche.
Tannem Jehova lagim porot ieunchem ani to tachi kakut kortolo,
Amchea Deva lagim porot ieunchem, karonn to udarponnan taka bhogxitolo.
8 Jehova mhunntta: “Mhojim chintnam tumchea chintnam sarkim nhoi,
Ani mhojeo vatto tumchea vattem sarkeo nhoi.
9 Zoxem mollob prithume poros unch asa,
Toxeo mhojeo vatto tumchea vattem poros unch asat,
Ani mhojim chintnam tumchea chintnam poros unch asat.
10 Zoso mollbar thaun paus ani borf poddtta,
Ani to bexttoch porot vochona, punn prithumek bhizoita ani pik upzoita,
Ani vomptoleak bim ani khatoleak unddo dita,
11 Teach bhaxen, mhojea tonddantlean bhair sorta tem utor zatolem.
Tem purnn zalea bogor mhojea lagim porot ieunchem na,
Punn tem mhoji khuxi purnn kortolench,
Ani jea kamank lagon hanvem tem dhaddlam, tantunt taka ies mellttolench.
12 Tumi sontosbhorit zaun bhair sortole,
Ani tumkam xantin porot haddttole.
Tumkam polloun dongor ani porvot khuxalkaien bob martole ani xetantlim soglim zhaddam talleo martolim.
13 Kantteanchea jhilkutta bodlek juniper* zhadd vaddttolem,
Hea soglea vostum vorvim Jehovachea nanvak vhoddvik mellttoli,
Ani hi ek sasnachi khunna zatoli ji kednanch na zaunchina.”