Izaias
9 Punn desant poilim aslo toso to kallokh aschona. Poilinchea kallar Zebulun ani Naftali desancho opman kelo tednam zoso kallokh aslo toso ho kallokh aschona. Punn uprant Dev Galiliek, mhunnche doria koddem voita tea vatter, Jordan vattarantlea pordexianchea Galiliek man ditolo.
2 Kallkhant choltolea lokamnim
Bhorpur uzvadd polloilo.
Kallea-kitt kallkhachea desant ravtat tea lokancher,
Uzvadd porzollʼllo.
3 Tunvem tea raxttrachea lokancho ankddo vaddoila,
Tunvem tankam khub khuxalkai dilea.
Lunvnnechea vellar ani luttlolo mhal vanttun ghetana
Lok khuxal astat,
Toxe te tujea mukhar khuxal asat.
4 Tancher ghatlolem zum, tanchea khandar aslolo danddo mhunnche tancher zulum kortolea odhikareancho danddo,
Tunvem moddun tache kuddkean-kuddke kele,
Zoxem tunvem Midianachea disamnim kelʼlem.
5 Zomin haloun uddoupi soinikanche butt
Ani rogtan buddlole sogle kopdde
Ujeant lasun uddoitole.
Taka* Ekdom Boro Solʼlo Diupi, Xoktivont Dev, Sasnacho Bapui ani Xanticho Kunvor mhunnttole.
7 Tachi razvottki* vaddot voitoli
Ani xanti kednanch kabar zaunchina.
To aplea rajeant Davidachea xinvasonar bostolo,
To aplem raj ghott stapon kortolo.
Atam thaun sodankal,
To neai-an ani nitivontponnan tem samballttolo.
Fouzancho Dev Jehova aple urben oxem kortolo.
8 Jehovan Jakoba add sondex dhaddla,
Izraela add to sondex aila.
9 Ani Efraimant ani Samarient ravtolea
Soglea lokank hem kollttolem,
Je gorvan ani opman korun mhunnttat:
10 “Vitteanchim ghoram poddlim zalear kitem zalem,
Ami taslolea fatramnim tim bandtole.
11 Jehova Rezinachea dusmanank tachea* add ubo kortolo
Ani Izraelachea dusmanank akromonn korunk uksaitolo.
12 Udente thaun Siria ani ostome* thaun Filistevkar ietole,
Te tonddam ugddun Izraelak khaun uddoitole.
Hem soglem* polloun tacho rag thondd zaunk na,
Punn tankam marunk tannem aplo hat azunui ubarlolo asa.
13 Karonn he lok tankam marla tachea lagim porot ieunk nant,
Tannim fouzancho Dev Jehovak sodhunk na.
14 Taka lagon, Jehova ekach disa bhitor Izraelachi tokli ani xempddi,
Tacho fantto ani lamb tonn* katrun uddoitolo.
15 Vhoddil ani man aslolo munis tachi tokli zaun asa,
Ani khotteo xikounneo xikoupi provadi tachi xempddi zaun asa.
16 Hea lokanche fuddari tankam bexttech hanga-thoim bhonvddaitat,
Ani tanchea fattlean voitat te ghuspoleat.
17 Taka lagon, tanchea tornatteam pasot Jehova khuxal zaunchona,
Ani tanchea onathanchi* ani vidvanchi kakut korchona,
Karonn sogle Devachea add geleat* ani noxtteponn kortat,
Ani dor ekleachea tonddantlean pixeponnachim utram bhair sortat.
Hem soglem* polloun tacho rag thondd zaunk na,
Punn tankam marunk tannem aplo hat azunui ubarlolo asa.
18 Karonn noxtteponn ujea bhaxen zollot voita,
Tem kantteanchim jhilkuttam ani ranvotti tonn zolloun uddoita.
Tem datt ranam lasun uddoitolem
Ani tacho dhunvor voir kupamnim voitolo.
19 Fouzancho Dev Jehovachea krodhan
Akʼkhea desak uzo pettla,
Tea ujeant lokancho bhosm zatolo.
Aplea bhavak pasun konn soddchona.
20 Te aplea uzvea vatten masacho kuddko katrun khatole,
Tori astana, te upaxinch urtole.
Ani aplea dave vatten masacho kuddko khatole,
Punn dhadoxi zaunchenant.
Dor eklo apleach hatachem mas katrun khatolo.
21 Manase Efraimak khaun uddoitolo,
Ani Efraim Manasek.
Te dogui mellon Judachea add voitole.
Hem soglem* polloun Devacho rag thondd zaunk na,
Punn tankam marunk tannem aplo hat azunui ubarlolo asa.