Zefania
2 Are, loz naslolea raxttra,
Tujea lokank ektthaim kor, hoi, tankam ektthaim kor.
2 Formonn lagu zaunchea poilim,
Daneachea kunddea* bhaxen to dis uddon voichea poilim,
Ujea bhaxen Jehovacho rag tumcher ieunchea poilim,
Jehovacho ragacho dis tumcher ieunchea poilim,
3 Prithume voilea soglea khaltea* lokamno,
Tachea nitichea kaideam* pormonnem choltoleamno, Jehovak sodhat.
Nitivontponn* sodhat, khaltikai sodhat.
Tednam ghoddie, Jehovachea ragachea disa tumkam asro mellot.
4 Karonn Gaza, soddun dilʼlea xara sarkem zatolem,
Ani Ashkelon padd zatolem.
Ashdodak donparchea vellar* dhanvddaun uddoitole,
Ani Ekronak mulla thaun umttun kaddttole.
5 “Doria deger ravtat tea Keretit raxttracher hai!
Jehovan tumchea add formonn marlam.
Are Kanana, Filistevkaranchea desa,
Konnuch thoim ravona zaunk, hanv tuzo nas kortolom.
6 Ani doriacheo dego chorvachim mollam zatolim,
Zoim gonvlleam pasot baim-o ani menddram pasot fatranche adde astole.*
7 To vattar Judachea ghoranneantlea urlolea lokancho zatolo,
Thoim te khatole.
Sanjechea vellar Ashkelonachea ghoramnim te add poddttole.
Karonn tancho Dev Jehova, tancher dhean ditolo,*
Ani tanchea koideank ektthaim korun porot haddttolo.”
8 “Moaban mhojea lokanchem jea toren nanv piddʼddear kelam ani Amonitkaramnim jea toren tancho opman kela tem hanvem aikolam,
Tannim mhojea lokank tomnne marle ani gorvan fulon tanche koddlean tancho vattar kaddun ghevpachi dhomki dili.”
9 Izraelacho ani Fouzancho Dev Jehova mhunntta, “Taka lagon, hanv mhojea jivacho soput gheun sangtam,
Moab Sodoma bhaxen zatolo,
Ani Amonitkar Gomora bhaxen zatole,
Tacho vattar ranvotti jhilkuttamnim* bhortolo, mittacho fondd zatolo, ani sodankal padd zaun urtolo.
Mhoje porjeche urlole lok tankam luttʼttole,
Ani mhojea raxttrantle urlole lok tankam thoim thaun dhanvddaun ghaltole.
10 Tanchea gorvak lagon tankam hench mellttolem,
Karonn tannim fouzancho Dev Jehovachea lokank tomnne marleat, ani svotak tanchea poros voir ubarleat.
11 Tancher Jehovachi bhirant bostoli,
Karonn to prithume voilea soglea devank kainch valor naslole kortolo,
Ani raxttranche sogle zunve ap-aplea zagear thaun
Taka man bagoitole.*
12 Tumi Ethiopiekar pasun mhojea tolvarin moron voitole.
13 To aplo hat utʼtore vatten ubartolo ani Asiriecho nas kortolo,
Ani Ninevek sukhea oronnʼnnea bhaxen padd korun uddoitolo.
14 Thoim soglea torechea ranvotti zonvaranche hindd* ravtole,
Pannkolli* ani sall* tachea* khambeam modem rat sartolim,
Zonelantlean konnacho tori gaionacho avaz ietolo,
Umbreacher soglem kabar zalʼlem astolem,
Karonn to cedar-ache* khambe ukte uddoitolo.
15 Hem tench gorvixtt xar jem surokxit boson astalem,
Tem aplea kallzant mhunnttalem, ‘Hanvuch sogleant poilem ani mhojea sarkem konnuch na.’
Atam polloi, tachi poristhiti kitli bhirankull zalea!
Tem ranvotti zonvarancho ravpacho zago zalam!
Tachea mukhavoilean voita to dor eklo fokannam korun fivnneo* ghaltolo ani mutti dakhoun dhomkaitolo.”