Korintkarank Poili Chitt
14 Eka-meka sangata mogan vagonk zata titlo proitn korat, punn teach vellar Deva koddlean dennim mellounk ani khas korun bhasaunni korpachem dennem melloun gheupacho proitn korit ravat. 2 Zo dusri bhas uloita, to munxam koddem nhoi punn Deva koddem uloita, karonn to povitr xokte udexim povitr gutt sangta punn to konnank somzona. 3 Punn, zo bhasaunni korta to aplea utramnim lokancho bhavarth ghott korta, tankam urba dita ani tankam bhuzvonn dita. 4 Zo dusri bhas uloita to fokot svotacho bhavarth ghott korta, punn zo bhasaunni korta to sobhecho bhavarth ghott korta. 5 Atam, tumi soglim dusreo bhaso uloilolim mhaka zai, punn tumi bhasaunni korit zalear chodd boreak poddttolem oxem mhaka dista. Khorem mhunnttlear, bhasaunni korta to dusreo bhaso uloita tachea poros vorto asa, karonn dusreo bhaso uloita to apunn uloita tem bhaxantor korun somzaina zalear, tachea utramnim sobhecho bhavarth ghott zaina. 6 Punn bhavamno, hea vellar hanv tumchea lagim ailom ani dusreo bhaso uloilom, punn Devan dilʼlo sondex sanglo na vo tumkam ginean dilem na vo bhasaunni sangli na vo xikoilem na zalear, tumchem borem zatolem kai?
7 Basuri* vo kinori,* oslea vazontranchem udharonn gheiat. Tancho sur spoxttponnim iena zalear basuricher ani kinorecher kitem vazoita tem konnankui koxem kollttolem? 8 Zhuza pasot turturi vazoupean ti sarki vazounk na zalear zhuzak konn toiar zatolo? 9 Teach toren, tumi dusreank somzota toslea bhaxent uloinant zalear tumi kitem sangonk sodhtat tem konnankui koxem kollttolem? Tumi varear uloitat oxem zatolem. 10 Sonvsarant zaiteo bhaso asat, punn tantunt orth nasloli ekui bhas na. 11 Karonn hanv ek munis uloita ti bhas somzona zalear, hanv taka ek videxi koso zatolom, ani to mhaka-i ek videxi koso zatolo. 12 Tor tumi, zankam povitr xoktechim dennim melloun gheunchi itsa asa, tannim tim dennim chodd promannan melloun gheuncho proitn korcho, jea udexim sobhecho bhavarth ghott zatolo.
13 Taka lagon, zo dusri bhas uloita tannem apunn jem kitem sangta, tachem bhaxantor korun somzaunk pavcho mhunn magnnem korchem. 14 Karonn hanv dusre bhaxent magnnem kortam tednam, mhaka povitr xoktechem dennem mellʼllam dekhun hanv magnnem kortam, punn mhaka tacho orth somzona. 15 Tor atam kitem korchem? Hanv povitr xoktechea dennea udexim magnnem kortolom, punn teach borabor mhaka somzota tea ritinui hanv magnnem kortolom. Hanv povitr xoktechea dennea udexim vakhannʼnnechim gitam gaitolom, punn tim mhaka somzota tea ritinui gaitolom. 16 Na zalear, fokot povitr xoktechea denneak lagon tumi magnneant upkar attoile zalear, tumchea modem zo chalto munis asa, to tunvem upkar attounk kelʼlea magnneak “Amen” koso mhunnttolo? Karonn magnneant tum kitem mhunntta tem taka somzonk na. 17 Tum ekdom borea toren magnneant upkar attoita tem khorem. Punn tantuntlean tea dusrea munxak kainch faido zaina. 18 Hanv tumchea sogleam poros chodd bhaso ulounk xoktam dekhun hanv Devache upkar attoitam. 19 Tori astana, eka sobhent dusre bhaxent dha hozar utram ulounchea poros, somzonk ietat toslim panchuch utram sangonk mhaka avoddttolem. Hea udexim hanv dusreank kitem tori xikounk xoktolom.
20 Bhavamno, somzonnechea babtint bhurgeam sarke zaum nakat, punn vaitt vostunchea babtint lhan bhurgeam sarke zaiat, ani somzonnechea babtint vhoddleam sarke zaiat. 21 Kaideant oxem boroilʼlem asa: “‘Hanv hea lokam lagim videxianchea ani porkeanchea bhasamnim uloitolom, tori astana te mhojem aikonchenant,’ oxem Jehova* mhunntta.” 22 Taka lagon, dusreo bhaso bhavarthant asloleam pasot nhoi punn bhavarthant nasloleam pasot ek khunna koxi zaun asa. Tachea bodlek, bhasaunni bhavarthant nasloleam pasot nhoi punn bhavarthant asloleam pasot zaun asa. 23 Tor akʼkhi sobha eka zagear ektthaim zata ani soglim dusreo bhaso ulounk lagtat, punn thoim chalte vo bhavarthant naslole lok aile zalear te tumkam pixe mhunnchenant kai? 24 Punn tumi sogle bhasaunni kortana, ek bhavarthant naslolo vo chalto munis thoim ailo zalear tumchea sogleanchea uloupak lagon to svotachi bariksannen porikxa korunk pavtolo ani sudharnni korunk pavtolo. 25 Tachea kallzant zo gutt liplolo asa to ukto zatolo, ani to zomnir poddon Devachi bhokti kortolo, ani mhunnttolo: “Dev khorench tumchea modem asa.”
26 Tor bhavamno, ami kitem kelear borem? Jednam tumi ektthaim zatat, tednam konnam lagim Devak vakhannchim gitam astat, konnam lagim xikoupachem dennem asta, konnam lagim Devacho sondex asta, konnam lagim dusri bhas uloupachem dennem asta, anik konnam lagim tachem bhaxantor korun somzaupachem dennem asta. Sogleo vostu eka-mekak urba diunk korat. 27 Dusri bhas uloupi asat zalear, osle choddan-chodd don vo tin aslear puro. Tannim ek-ek korun ulounchem, ani konnem tori bhaxantor korun tacho orth somzauncho. 28 Punn bhaxantor korun gutt somzaupi na zalear, tannem sobhent vogich ravchem ani monantlea-monant aplea lagim ani Deva lagim ulounchem. 29 Bhasaunni korpeam modlea dog vo tig zannamnim ulounchem, ani dusreamnim tacho orth somzon gheuncho. 30 Punn thoim boslole astana anik ekleak Devacho sondex mellʼllo zalear, zo uloita tannem vogi ravchem. 31 Karonn tumi sogleamnim ek-ek korun bhasaunni korunk zata. Oxem kelʼlean sogleank xikonk mellttolem ani urba mellttoli. 32 Bhasaunni kortoleank povitr xoktechea adaran bhasaunni korunk jim dennim mellʼlleant tacher tabo dovrunk zai. 33 Karonn Dev goddboddacho nhoi, punn xanticho Dev.
Zoxem Devachea lokanchea* soglea sobhamnim zata 34 toxench sobhent bailamnim vogi ravchem, karonn tankam ulounk porvangi na. Tachea bodlek, zoxem Kaideant boroilʼlem asa, tannim adhin ravchem. 35 Tankam kitem-i zannam zaunk zai zalear, tannim aplea ghorant ap-aplea ghovank vicharchem. Karonn bailen sobhe mukhar ulovop opmanachem zaun asa.
36 Devachea utrachi survat tumchea thaun zalʼli kai, vo tem fokot tumkanch mellʼllolem kai?
37 Apunn ek provadi vo apleak povitr xoktechem dennem asa oxem konnui chintʼta zalear, tannem hanv tumkam boroitam teo vostu Somiachi adnea mhunn manun gheunk zai. 38 Punn konnui heo vostu nakarta zalear, taka Dev pasun nakartolo.* 39 Teach pasot mhojea bhavamno, bhasaunni korunk vavr korit ravat. Punn teach borabor dusreank veglleo bhaso ulounk addainakat. 40 Punn sogleo vostu bore bhaxen ani manddavollin zauncheo.