Izaias
43 Jakoba, zannem tuka rochla,
Izraela, zannem tuka ghoddoila, to Jehova oxem mhunntta:
“Bhienaka, karonn hanvem tuka soddoila.
Hanvem tujem nanv gheun tuka apoila.
Tum mhozo.
2 Tum udkantlean voita tednam, hanv tujea sangata astolom,
Tum nhoim-entlean voita tednam, teo tuka buddouncheo nant,
Tum ujeantlean cholta tednam, tum laschona,
Tacho hulop pasun tuka lagchona.
3 Karonn hanv Jehova, tuzo Dev,
Hanv Izraelacho Povitr Dev, tuzo Salvar Korpi zaun asa.
Hanvem tuka soddvonn diunk* Ejiptt, Ethiopia ani Seba dilam.
4 Tum mhojea nodren moladik asa,
Hanvem tuka man dila ani tuzo mog kela.
Taka lagon hanv tujea bodlek, lokank ditolom,
Ani tujea jivachea bodlek, raxttram ditolom.
5 Bhienaka, karonn hanv tujea sangata asam.
Udente thaun hanv tujea sonstik* haddttolom,
Ani ostome thaun tuka ektthaim kortolom.
6 Hanv utʼtorek sangtolom, ‘Tankam sodd!’
Ani dokxinnek sangtolom, ‘Tankam addainaka.
Mhojea putank poisulʼlean ani mhojea dhuvank prithumechea konnxea-konnxea thaun gheun ieo,
7 Dor ekleak, zaka mhojea nanvan vollkhotat,
Zaka hanvem mhojea mhoime pasot rochla,
Zaka hanvem ghoddoila ani kela, taka gheun ieo.’
8 Tea lokank gheun ieo, zankam dolle asonui te kuddʼdde asat,
Zankam kan asonui te bhere asat.
9 Soglea raxttramnim eka zagear ektthaim zaunchem,
Ani veg-vegllea desantlea lokamnim ektthaim ieunchem.
Tanche* modlo konn asa zo osleo vostu sangonk xokta?
Vo poilim ghoddcheo asat teo vostu* kitem teo sangonk xokta?
Apunn sarke mhunn dakhoun diunk tannim sakxeank haddche,
Ani dusreamnim tem aikonchem ani mhunnchem, ‘Hem sot zaun asa!’”
10 Jehova mhunntta, “Tumi mhoje sakxi,
Hoi, mhozo vinchun kaddlolo sevok.
Tunvem mhaka vollkhon gheunchem ani mhojer visvas dovorcho,*
Ani hanv toch mhunn somzon gheunk, hanvem tuka vinchun kaddla.
Mhojea poilim konn Dev naslo,
Ani mhojea uprantui konn aschona.
11 Hanv, hoi hanv Jehova, ani mhojea bhair dusro salvar korpi na.”
12 Jehova mhunntta, “Tumchea modem khoinchoch porko dev naslo tednam,
Hanvench tumkam ugddapem kelem,* tumkam vanchoile ani tumkam tem kolloilem.
Taka lagon, tumi mhoje sakxi ani hanv Dev.
13 Toxench, hanv sodanch zoso aslom, tosoch asam.
Oso konnuch na, zo mhojea hatantlem kitem-i kaddun gheunk xokta.
Hanv umkench kam kortam tednam mhaka konn addaunk xokta?”
14 Tumcho Soddoupi ani Izraelacho Povitr Dev Jehova mhunntta:
“Tumkam lagon, hanv tankam Babilonant dhaddttolom ani soglea darvontteanche lokhnnache dandde moddun uddoitolom,
Ani Kaldeikar aplea tarvamnim khontin roddttole.
15 Hanv Jehova, tumcho Povitr Dev, Izraelacho Rochnnar, tumcho Raza.”
16 Jehova oxem mhunntta,
Zo doriantlean vatt toiar korta,
Ani unchamboll doriantlean vatt ukti korta,
17 Zo aplea sangata zhuzachim rotham ani ghodde,
Xoktivont zhuzaream sangata akʼkhi fouz gheun ieta:
“Te sokol poddttole ani porot kednanch utthchenant.
Zolltta ti vat palvota toxi te palvotole.”
18 “Adim ghoddlolea vostuncho ugddas korinaka,
Ani jem zaun gelam tea vixim chintit ravom naka.
19 Polloi! Hanv kitem tori novem kortam,
Ani atam tachi survat zata.
Tumkam tem disona kai?
Hanv ranvott vattarantlean ek vatt toiar kortolom,
Ani oronnʼnneantlean nhoim-eo vhanvom-xeo kortolom.
Him ranvotti zonvaram mhaka man ditolim,
Karonn hanv mhojea lokam pasot, mhojea vinchlolea pasot,
Ranvott vattarant udok pieunk ditolom,
Oronnʼnneant nhoim-eo vhanvoitolom.
21 Hea lokamnim mhoji vakhannʼnni korchi mhunn,
Hanvem tankam mhojea pasot rochleant.
22 Punn Jakoba, tunvem mhaka ulo marunk na,
Karonn Izraela, tuka mhozo vaz aila.
23 Hulpailʼleo bhetto diunk tunvem mhojea pasot menddram haddunk nant,
Vo tujea bolidanam udexim tunvem mhoji mhoima korunk na.
Dennem haddunk hanvem tujer dobhav ghalunk na,
Toxench, tuje lagim dhovo dhump magon-magon hanvem tuka bejar korunk na.
24 Tunvem tujea poixeamnim mhaka ek vasachi boddi haddunk na,
Toxench, tujea bolidananchi chorbi bhettoun mhaka dhadoxi korunk na.
Tachea bodlek, tujea patkanchem vojem tunvem mhojer ghatlam,
Ani tujea guneanvamnim mhaka bejar haddla.
25 Hanv, hoi hanv toch, zo mhojea nanva pasot tuje oprad pusun kaddttam,
Ani tujea patkancho hanv ugddas korchom na.
26 Hanv kitem-i visorlam zalear tem mhojea ugddasak hadd, ami eka-meka add kes zhogddum-ia.
Tum sarko asa mhunn dakhounk tuka kitem-i sangchem asa zalear, tem sang.
27 Tujea poilea purvozamnim patok kelem,
Tujea vatten uloitat te* mhojea add geleat.
28 Taka lagon, hanv povitr zageachea kunvrank oxudʼdh kortolom,
Jakobachem nisontton zaunk ditolom,
Ani Izraelak opman zata toslim utram aikonk soddttolom.