Jeremias
4 Jehova mhunntta, “Izraela, tum porot ailo zalear,
Mhojea lagim porot ailo zalear,
Ani tunvem tujeo vitt haddtta tosleo murteo mhojea mukhavoileo kaddun uddoileo zalear,
Tuka hanga-thoim bhottkonk poddchem na.
2 Tunvem sotan, neai-an ani nitivontponnan, ‘Jehovachea jivacho soput!’
Oxem mhunnon soput ghetlo zalear,
Raxttrank Deva koddlean besanvam mellttolim,*
Ani tachea vixim tim gorvan sangtolim.”
3 Karonn Jehova, Judachea lokank ani Jeruzalemak mhunntta,
“Borem pik zata tea zomnint nangor ghalat,
Kantteamnim vompinakat.
4 Judachea ani Jeruzalemachea lokamno,
Jehova pasot tumchi sunot korat,
Tumchea kallzachi sunot korat,
Na zalear, tumchea noxttea kamank lagon
Mhozo rag tumcher ujea bhaxen pettʼttolo,
Ani to konnuch palounk xokchona.”
5 Judant ho sondex sangat ani Jeruzalemant hi kollounni korat,
Akʼkhea desant xing* vazoiat ani bob marun sangat.
Vhoddlea avazan oxi kollounni korat: “Ektthaim zaiat,
Bhonvtonnim ghott durgam aslolea xaramnim ami pollon vochum-ia.
6 Siona koddem voita ti vatt dakhounk khunna mhunn khambo ubo korat,
Bexttech ube ravonakat, khoim tori asro sodhat,”
Karonn hanv utʼtore thaun ek odruxtt haddttam, ek vhoddlem nisontton haddttam.
7 Datt jhilkuttantlean xinv bhair sorta toso, nas korpi bhair sorla,
Raxttranchem nisontton korpi bhair sorla.
To tujea desachi poristhiti oxi korunk bhair sorla, ki polloitoleank bhirant distoli.
Tujim xaram padd zaun voitolim, thoim konnuch ravchona.
8 Taka lagon sak ghalat,
Dukh korat* ani vhoddlean bob marun roddat,
Karonn Jehovachea zollttea ragacho uzo amchea thaun pois zaunk na.
9 Jehova mhunntta, “Tea disa, raza dhir* soddun ditolo,
Kunvor pasun aplo dhir* soddun ditole,
Iadnik bhietole ani provadi ojap zatole.”
10 Uprant hanvem mhunnttlem: “Akʼkhea Vixvachea Dhonia Jehova Deva, hem kitlem dukhachem! Tunvem khorench, hea lokank ani Jeruzalemak ‘Tumkam xanti mellttoli,’ oxem mhunnon purnn toren fottoilem, punn khorem mhunnttlear tolvar amchea gomtter asa.”
11 Tea vellar, hea lokank ani Jeruzalemak oxem sangtole:
“Oronnʼnneantlea sukea porvotam thaun,
Mhojea lokanchea dhuvecher* gorom varem ietolem.
Hem varem danea thaun pol kuxin kaddunk vo dano nitoll korunk iena.
12 Hanvem sanglam dekhun hem zoran ieupi varem hea zageam thaun ieta.
Atam hanv tanchea add zhoddtti kortolom.
13 Polloi! Dusman pausachea kupam sarko ietolo,
Ani tache roth vadollachea varea sarke asat.
Tache ghodde ghonni poros fastt asat.*
Amcher hai, karonn amchem nisontton zalam!
14 Jeruzalema, tujea kallzantlean noxtteponn dhuvun kadd, oxem kelolean tum salvar zaunk pavtolem.
Tum kednam poriant tujea monant noxtte vichar gheun ravtolem?
15 Karonn Dan vattarantlean ek avaz khobor dita,
Ani to Efraimantlean odruxttacho sondex kolloita.
16 Hoi, raxttrank hi khobor pavoiat,
Jeruzalema add ho sondex kolloiat.”
“Eka poisulʼlea desantlean thodde bhedi* ietat,
Ani te Judachea xaram add zhuzachi kollounni kortole.
17 Te xetachea rakhonndara sarke taka soglea vatten gherav ghaltole,
Karonn tem mhojea add gelam,” oxem Jehova mhunntta.
18 “Tuka tujeach vagnnukecho ani kamancho porinnam bhogunk poddttolo.
Tujer ailʼlem odruxtt kitlem mhunn koddu!
Karonn tem tujea kallzant khol riglam!”
19 Hai, mhojem dukh,* mhojem dukh!
Mhaka mhojea kallzant* khub dukh bhogta,
Mhojem kalliz vhoddlean dhodd-dhoddtta.
20 Odruxtta fattlean odruxtt ghoddot asa mhunn khobor ieta,
Karonn akʼkhea desacho nas zala.
Okosmat mhojea tombuncho nas zala,
Ekach khinnant mhojea tombuchea lugttancho nas zala.
21 Hanv anik kednam poriant khunna mhunn ubarlolea khambeak polloit ravom,
Xingacho* avaz aikot ravom?
22 “Karonn mhoje lok murkh,
Te mhojer matui dhean dinant.
Te okʼkol naslole put, tankam koslich somjikai na.
Vaitt kamam korunk te huxar,*
Punn borem koxem korchem tem tankam khoborna.”
23 Hanvem des polloilo, ani polloi! to rito aslo ani padd zalʼlo.
Hanvem mollbak polloilem ani thoim uzvadd uronk na.
24 Hanvem dongrank polloile, ani polloi! te thorthortale,
Ani porvot koddkoddttale.
25 Hanvem polloilem, ani polloi! thoim ekui munis naslo,
Ani mollba voilim soglim suknnim uddon gelʼlim.
26 Hanvem polloilem, ani polloi! follanchi bag ranvott vattar zalʼlo,
Ani tachim soglim xaram moddun udoilʼlim.
Hem soglem Jehovak lagon ghoddlem,
Tachea zollttea ragak lagon hem ghoddlem.
27 Karonn Jehova oxem mhunntta: “Akʼkho des padd zaun voitolo,
Punn hanv tacho purnn toren nas korchom na.
28 Heach pasot des dukh kortolo,
Ani voir mollbar kallokh posortolo.
Hanvem hem sanglam, ani hanvem hem tharailam dekhun oxem zatolench.
Ani hanv mhojem mon bodolchom na,* tosoch hanv fatti sorchom na.
29 Ghoddesvarancho ani bann marpeancho avaz aikotanch,
Sogle lok pollon voitat.
Te datt jhilkuttamnim vochon liptat,
Ani te khoddpancher choddttat.
Dor ek xar ritem zalam,
Ani thoim konnuch ravona.”
30 Atam tuzo* nas zala, tor tum kitem kortolem?
Tum ekdom tambddea rongache kopdde ghaltalem,
Tum bhangar ghalun nhestalem,
Ani dolle sobit disonk kazoll laitalem.
Punn tujem soglem nhesop ani nettop upeog naslolem zalem,
Karonn je apleo kuddicheo vondovnneo purnn korunk tujea fattlean ietale tannim tuka nakarlam,
Atam te tuka jivexim marunk sodhtat.
31 Hanvem ek duent bail roddtta toslo avaz aikola,
Poilea bhurgeak zolm ditana bob marta tea bailechea avaza sarko avaz aikola,
Hanvem Sionachi dhuv khorxeta to avaz aikola.
Tem aple hat posraun mhunntta:
“Mhojer hai, mhaka jivexim marunk sodhtoleank lagon hanv ekdom thoklam!”