Jeremias
16 Jehovacho sondex mhaka porot mellʼllo. Tannem mhaka mhunnttlem: 2 “Tum hea zagear kazar zainaka ani putam-dhuvank zolmakui haddinaka. 3 Karonn Jehova hanga zolmak ieupi putam-dhuvam vixim ani tankam zolmak haddttolea avoi-bapaim vixim oxem mhunntta: 4 ‘Jiv gheta toslea duensamnim tim mortolim, punn tanche pasot dukh korunk vo tankam purunk konnuch aschona. Tanchim moddim zomnir sarem koxim poddlolim astolim. Tim tolvarin ani bhuken mortolim, ani tanchim moddim mollba voilea suknneam pasot ani prithume voilea zonvaram pasot jevonn zatolim.’
5 Karonn Jehova oxem mhunntta,
‘Dukh kortoleam pasot jevonn dovortat, toslea ghorant vochonaka,
Ani bob marun roddonk, vo tankam bhuzvonn diunk vochonaka.’
Jehova mhunntta, ‘Karonn hanvem hea lokam koddlean mhoji xanti kaddun ghetlea,
Mhozo visvaxi mog ani doia, tanche koddlean kaddun ghetlea.
6 Hea desant, lhan-vhodd sogle mortole.
Tankam purchenant,
Konnuch tanchea pasot dukh korchona,
Toxench, konnuch aplea kuddik ghave ghalchona vo aple kens taschona.*
7 Meloleam pasot dukh kortoleank bhuzvonn diunk,
Konnuch jevonn diunchona.
Toxench, tancho avoi vo bapui bhair poddla dekhun,
Konnuch tankam bhuzvonnecho pelo diunchona.
8 Khuxalkai monoitat tea ghorant vochonaka,
Tanchea sangata khaunk-pieunk bosonaka.’
9 “Karonn Izraelacho Dev, fouzancho Dev Jehova oxem mhunntta, ‘Hanv tujea disamnim ani tujeach dolleam mukhar, hea zagea voilo khuxalkaiecho ani sontosacho avaz bond kortolom, toxench novro vhokle sangata khuxalkai monoita to avaz pasun hanv bond kortolom.’
10 “Jednam tum hea lokank hem soglem sangtolo, tednam te tuka oxem vichartole, ‘Amcher itlem vhoddlem odruxtt haddttolo mhunn Jehovan kiteak sanglam? Ami amcho Dev Jehova add koslo guneanv kela, koslem patok kelam?’ 11 Tednam tum tankam oso zobab di, ‘Jehova mhunntta: “Karonn tumchea purvozamnim mhaka soddun dilo ani te dusrea devam fattlean vochot ravle, tanchi bhokti korit ravle ani tankam paim-am poddot ravle. Punn mhaka, tannim soddun dilo ani mhoje kaide pallunk nant. 12 Ani tumi tumchea purvozam poros vaitt toren vagleat. Tumche modlo dor eklo mhoji adnea pallchea bodlek, hottʼtti* zaun aplea noxttea kallza pormonnem cholta. 13 Taka lagon, hanv tumkam hea desantlean kaddun, tumkam ani tumchea purvozank khoborna toslea desant xevttitolom. Thoim tumkam dis ani rat dusrea devanchi seva korunk poddttoli, karonn hanv tumkam doia dakhounchom na.”’
14 “Jehova mhunntta, ‘Punn osle dis ietat jednam te porot kednanch oxem mhunnchenant: “Izraelitkarank Ejiptt desantlean bhair haddlim, tea Jehovachea jivacho soput!” 15 Tachea bodlek te mhunnttole: “Izraelitkarank utʼtorechea desantlean ani tannem tankam ximpddailʼlim tea soglea desantlean bhair haddlim, tea Jehovachea jivacho soput!” Hanv tankam tea desant porot haddttolom, zo hanvem tanchea purvozank dilolo.’
16 Jehova mhunntta, ‘Hanv zaitea kharveank apoitolom,
Ani te ieun tankam zallant dhortole.
Tea uprant, hanv zaitea xikar korpeank apoitolom,
Ani te dor eka porvotar ani dor eka dongrar
Ani khoddpachea khanchintlean sodhun tancho xikar kortole.
17 Karonn mhoje dolle tanchem dor ek kam* polloitat.
Te mhojea thaun liplole nant,
Toxench, tanche guneanv mhojea thaun liplole nant.
18 Poilem, hanv tankam tanchea guneanvachem ani patkachem purnn toren farikponn ditolom,
Karonn tannim mhozo des, aplea kanttallo haddtta toslea ani jiv naslolea murteamnim* oxudʼdh kela,
Ani mhojem daiz, aplea vitt haddtta toslea vostumnim bhorlam.’”
19 Jehova Deva, tum mhojem boll ani mhozo kilʼlo,
Zoim hanv sonkoxttachea disa dhanvon voitam.
Prithumechea konnxea-konnxea thaun raxttram tujea lagim ietolim,
Ani mhunnttolim: “Amchea purvozank daiz mhunn fokot fottingponn mellʼllem,
Toxench orth nasloleo ani upeog nasloleo vostu mellʼlleo, zancho kainch faido na.”
20 Ek munis aplea pasot dev korunk xokta kai?
To korta te devuch nhoi.
21 “Taka lagon hanv tankam dakhoun ditolom,
Hea pavtti hanv tankam mhoji xokti ani mhojem boll dakhoitolom,
Ani mhojem nanv Jehova mhunn tannim vollkhon gheunk poddttolem.”