Izaias
1 Juda ani Jeruzalema vixim Izaiasachem dorxon, jem Amozacho put Izaiasan* Judache raza Uzia, Jotham, Ahaz, ani Hezekiachea disamnim polloilʼlem:
2 Mollba aik, ani prithume dhean di,
Karonn Jehova* mhunntta:
“Hanvem putank lhanache vhodd kele,
Punn te mhojea add gele.
3 Boil aplea dhoniak borea bhaxen vollkhota,
Ani gaddum aplea dhoniachea khaunnek* vollkhota.
Punn Izrael mhaka* vollkhona,
Mhojech lok somjikaien vagonant.”
4 Hea patki raxttracher hai!
Guneanvachea vojean bagovlolea hea lokancher hai!
Noxttea lokanchea zomeacher, broxtt bhurgeancher hai!
Tannim Jehovak soddun dila,
Tannim Izraelachea Povitr Devacho opman kela,
Tannim taka fatt kelea.
5 Tumi porot-porot mhojea add voitat, tor atam hanv tumkam khoim mhunn marum?
Tumchi akʼkhi tokli ghaveamnim bhorlea,
Ani akʼkhem kalliz duent asa.
6 Tokle thaun paim-am meren boro aslolo ekui zago na.
Sogleak ghave zaleat, mar* lagla ani ukte ghave asat*
—Konnench tancho ilaz korunk na,* te bandunk nant vo tel lavun mov korunk nant.
7 Tumcho des padd zaun gela.
Tumchea xarancho ujean nas kela.
Pordexi tumcheach mukhar tumchem pik khaun uddoitat.
Tumcho des dusmanamnim nas korun uddoilʼlea sarko zala.
8 Sionachea dhuvek drakxanchea molleantlea mattva* sarkem soddun dilam,
Tem touxeanchea xetantlea khompi sarkem
Ani soinikamnim gherav ghatlolea xara sarkem zalam.
9 Fouzancho Dev Jehovan amchea modlea thoddeank jive dovrunk nasle zalear,
Ami Sodoma bhaxen zatole asle,
Ani amchi poristhiti Gomora bhaxen zatoli asli.
10 Sodomacher hukum choloitoleamno,* Jehovacho sondex aikat.
Gomorachea lokamno, amchea Devachea kaideacher* dhean diat.
11 Jehova mhunntta, “Tumchea hixob naslolea bolidanancho mhaka koslo faido?
Tumchea menddreanchea hulpailʼlea bhettenchi ani mottea-mottea zonvaranche chorbechi mhaka ubgonn ailea.
Mhaka tumchea boilanchea, menddranchea ani bokddeanchea rogtan khuxalkai mellona.
12 Mhojea mukhar ieun,
Mhojea mondirachim angnnam maddounk,
Tumkam konnem sanglam?
13 Hea fuddem tumi daneacheo upeog nasloleo bhetto haddop bond korat.
Tumi zolloitat to dhump mhaka kanttallo haddtta.
Tumi nove chondrimache dis* ani sabath monoitat, ani povitr sobha dovortat
—Punn tumi jadu kortat ani teach borabor povitr zomat dovortat, tem mhojean sosunk zaina.
14 Hanv tumchea novea chondrimachea disancho ani porbancho dves kortam.
Teo mhaka vojeacho bhar koxeo zaleat,
Tanchem vojem uklun mhaka puro zalam.
15 Tumi mhojea mukhar hat posraitat tednam,
Hanv mhoje dolle dhamptam.
Tumi zaitim magnnim kortat,
Punn hanv tumchem aikona,
Karonn tumche hat rogtan bhorleat.
16 Tumi tumkanch dhuvun nitoll korat,
Mhojea mukhavoilim tumchim noxttim kamam kaddun uddoiat,
Vaitt korop bond korat.
17 Borem korunk xikat, neai korat,
Zulum kortoleak sudhraiat,
Onathacho* hokʼk rakhat,
Ani vidve pasot uloiat.”
18 Jehova mhunntta, “Ieiat, ami eka-meka lagim uloun amchea modem suttavem korum-ia.
Tumchim patkam rogta sarkim tambddim aslear pasun,
Tim borfa bhaxen dhovim zatolim.
Tim samkinch tambddim aslear pasun,
Tim vula bhaxen dhovim zatolim.
19 Tumi mhojem aikonk toiar asat zalear,
Tumi desantleo boreo-boreo vostu khatole.
20 Punn tumi aikonk toiar nant ani mhojea add gelear,
Tolvar tumkam khaun uddoitoli,*
Karonn Jehovan oxem mhunnttlam.”
21 Hem visvaxi xar koxem ek xindoll bail zalea tem polloi!
Eka vellar thoim sodanch neai zatalo,
Thoim nitivontponn ravtalem,
Punn atam thoim khun korpi ravtat.
23 Tumche kunvor hottʼtti* ani te choranche sangati zaleat.
Tankam sogleank lonch* gheunk avoddtta ani te denneachea fattlean dhanvtat.
Te onathank* neai dinant,
Ani vidvechi kes tanchea koddem kednanch pavona.
24 Taka lagon khoro Dhoni, fouzancho Dev Jehova,
Izraelacho Xoktivont Dev, oso mhunntta:
“Atam puro! Mhojea dusmanank hanv mhojea mukhavoile nanch kortolom
Ani mhojea dusmanam koddlean bodlo ghetolom.
25 Hanv tumchea add mhozo hat ubartolom,
Chandi pigllaun tantuntlo soglo mhell sabanvan* kaddun uddoitat toso,
Hanv tujem soglem mhelleponn kaddun uddoitolom.
26 Poilim bhaxen, hanv tumcher neai korpi
Ani tumchea pasot solʼle diupi nemtolom.
Tea uprant, tumkam Nitivontponnachem Xar, Visvaxi Xar oxe mhunnttole.
27 Sionachi neai-a pormonnem suttka zatoli,
Ani tiche je lok porot ietole tanchi nitivontponnan suttka zatoli.
28 Punn je add voitat tancho, ani patkeancho ekach borabor nas zatolo,
Ani Jehovak soddun voitat tanchem nisontton zatolem.
29 Karonn tumkam avoddttale tea vhoddlea-vhoddlea rukhanchi tankam loz bhogtoli,
Ani tumi vinchun kaddlolea bagenk* lagon tumcho opman zatolo.
30 Panam sukon gelolea eka vhoddlea rukha sarke tumi zatole,
Ani udok naslolea eke bage sarki tumchi poristhiti zatoli.
31 Bollvont munis suklolea tonna sarko zatolo,
Ani tachem kam ujeachea kittʼtte sarkem zatolem.
Donui borabor zollttole,
Ani tankam palounk konnuch aschona.”