Mika
4 Xevottachea disamnim*
Jehovachem ghor aslolo dongor,
Soglea dusrea dongram poros unch stapon zatolo,
Ani soglea porvotam poros voir ubarlolo astolo,
Ani veg-vegllea desantle lok tache lagim lotton ietole.
2 Zaitea raxttrantle lok ietole ani mhunnttole:
“Ieiat, ami Jehovachea dongrar choddom-ia,
Jakobachea Devachea ghorant vochom-ia.
To amkam tacheo vatto xikoitolo,
Ani ami tache vatten choltolim.”
Karonn Sionantlean kaido,*
Ani Jeruzalemantlean Jehovachem utor bhair sortolem.
3 To veg-vegllea raxttrantlea lokanchi zhoddtti kortolo,
Poisulʼlea bollixtt raxttranche vad-vivad suttave kortolo.
Te apleo tolvari moddun zotam kortole,
Ani aplea bhaleanche koiteo* kortole.
Ek raxttr dusrea raxttra add porot anik tolvar ubarchem na,
Toxench, te porot kednanch zhuz pasun korunk xikchenant.
4 Dor eklo aplea drakxanchea vali ponda ani anjirachea zhadda ponda bostolo,*
Ani konnuch tancher bhirant ghalchona,
Karonn fouzancho Dev, Jehovan hem mhunnttlam.
5 Soglea raxttrantle lok ap-aplea devanchea nanvan choltole,
Punn ami amcho Dev Jehovachea nanvan sodam-sodankal cholot ravtolim.
6 Jehova mhunntta, “Tea disa
Longoddttale tankam hanv ektthaim kortolom,
Ani hanga-thoim ximpoddlole asle tankam zomoitolom,
Toxench, zanchea thaim hanv koddok ritin vaglolom, tankam-i hanv ektthaim kortolom.
7 Longoddttale tanchea modlea thoddeank hanv salvar kortolom,
Zankam pois dhaddlole tankam hanv ek xoktivont raxttr kortolom.
Jehova tancho raza zatolo, ani Sion Dongra voilean
Atam thaun sodam-sodankal tancher raz choloitolo.
8 Are hinddachea gopura,
Sionachea dhuvechea dongra,
Poili* razvottki porot ietoli, hoi, ti tujea lagim porot ietoli,
Jeruzalemachea dhuvek aplem raz porot mellttolem.
9 Tor tum atam itlea vhoddlean bob kiteak marta?
Tuka konnui raza na kai?
Tuka solʼlo diupi mela kai?
Zaka lagon, ek bail bhurgeak zolm ditana tollmolltta, toxem tum tollmolltta?
10 Ago Sionachea dhuve,
Bhurgeak zolm dita tea baile bhaxen pirgon tollmoll,
Karonn atam tuka xarantlean bhair soron uktea mollar ravonk poddttolem.
Tum khub pois Babilon poriant voitolem,
Ani thoim tuka suttka mellttoli,
Jehova tuka tujea dusmananchea hatantlean porot viktem ghetolo.
11 Zaitim raxttram tujea add ektthaim zatolim,
Ani tujea vixim mhunnttolim, ‘Sionak oxudʼdh zaum-di,
Ani tachea thaim oxem ghoddtta tem amchea dolleank polloum-di.’
12 Punn tankam Jehovachim chintnam khobornant,
Tacho udʼdhexui tim somzonant,
Mollnnechea khollar* tednanch katrun haddlolea bhoream sarko to tankam ektthaim kortolo.
13 Ago Sionachea dhuve, utth ani mollnni kor,
Hanv tujim xingam lokhnnachim kortolom,
Ani hanv tujim fuddam* tambeachim kortolom,
Ani tum veg-vegllea desantlea lokancho churo korun uddoitolem.
Tanchi vaitt toren zoddloli zodd tum Jehovak bhettoitolem,
Ani tanchi girestkai akʼkhea prithumechea khorea Dhoniak bhettoitolem.”