Izaias
65 “Zannim mhojea vixim vicharunk na, tankam hanv dixtti poddlom.
Ani zannim mhaka sodhunk na, tankam hanv mellʼllom.
Jem raxttr mhojem nanv gheun mhaka ulo marina, taka hanvem mhunnttlem, ‘Hanv hanga asam, hanv hanga asam!’
2 Dis-bhor hanvem oslea hottʼtti* lokam mukhar hat posraile,
Je vaitt vatten voitat,
Ani apleak zai toxe vagtat.
3 He lok sodanch mhojea tonddar mhozo opman kortat.
Te aplea bagemnim bolidanam bhettoitat, ani dhunvor ieuncho mhunn vitteancher bolidanam bhettoitat.
4 Te meloleank purtat tea fondda modem bostat,
Gupit zageancher* rat sartat,
Dukranchem mas khatat,
Ani tanchea aidonamnim oxudʼdh vostuncho kald* asta.
5 Te mhunnttat, ‘Thoinch rav, mhojea lagim ieum naka,
Karonn hanv tujea poros povitr.’*
He lok mhojea nakant dhunvra sarke asat, dis-bhor petton urta tea ujea sarke asat.
6 Polloi! Hem soglem mhojea mukhar boroilam.
Hanv vogi ravchom na,
Hanv tankam farik kortolom,
Hanv tankam purnn toren farik kortolom.
7 Hanv tanchea guneanvam pasot ani tanchea purvozanchea guneanvam pasot tankam farikponn ditolom,” oxem Jehova mhunntta.
“Karonn dhunvor ieuncho mhunn tannim dongrancher bolidanam bhettoilim,
Ani porvotancher mhozo opman kelo,
Taka lagon sogleant poilim hanv tankam tanchea kamanchem purnn toren farikponn ditolom.”
8 Jehova oxem mhunntta:
“Drakxanchea ghonsantlean novo drakxancho soro korunk ros melltta tednam,
Lok mhunnttat, ‘To drakxancho ghons uddoinakat, karonn tantunt thoddim borim drakxam asat,’
Hanv mhojea sevokam pasotui oxench kortolom,
Hanv tancho sogleancho nas korchom na.
9 Hanv Jakoba thaun ek sonsot* utpon kortolom,
Ani mhojea dongra pasot Judantlean ek daiji utpon kortolom.
Mhoje vinchun kaddlole lok desak aplea tabeant ghetole.
Ani mhoje sevok thoim ravtole.
10 Mhaka sodhtat tea lokank,
Sharon tanchea menddram pasot chorvachem moll zatolem,
Ani Akorachem Falkem* tanchea gorvam pasot visov gheupacho zago zatolem.
11 Punn tumi Jehovak soddun dilʼlea lokam modle asat,
Je mhojea povitr dongrak visorleat,
Je Noxibachea deva pasot mez toiar kortat,
Ani Fuddar Sangpi deva pasot peleant drakxancho soro votoitat.
12 Taka lagon, atam hanv tuka tolvarin marun uddoitolom,
Tumi sogle moronk tumchi man bagoitole,
Karonn hanvem tumkam ulo marlo punn tumi zobab diunk na,
Hanv uloilom, punn tumi mhojem aikonk na.
Mhojea nodren vaitt asa tench tumi korit ravle,
Ani mhaka avoddna tench tumi vinchun kaddlem.”
13 Taka lagon, Akʼkhea Vixvacho Dhoni Jehova mhunntta:
“Polloi! Mhoje sevok khatole, punn tumi upaxim urtole.
Polloi! Mhoje sevok pietole, punn tumi tanelʼle urtole.
Polloi! Mhoje sevok khuxal astole, punn tumkam loz bhogchi poddttoli.
14 Polloi! Mhoje sevok sontosbhorit zaun bob martole, karonn tanchem kalliz khuxal asa,
Punn tumi roddttole, karonn tumchem kalliz dukhi astolem,
Tumi vhoddlean-vhoddlean roddttole karonn tumchem mon niraxi astolem.
15 Tumi tumchea fattlean oslem nanv soddun voitole, jem nanv mhoje vinchun kaddlole lok xirapa bhaxen uzar kortole,
Akʼkhea Vixvacho Dhoni Jehova tumchea modlea dor ekleak marun uddoitolo,
Punn aplea sevokank to dusrea nanvan ulo kortolo.
16 Taka lagon, prithumer aslolo zo konn besanv magtolo,
Taka khorea* Deva thaun besanv mellttolem,
Ani prithumer aslolo zo konn soput ghetolo,
To khorea* Devachea nanvan soput ghetolo.
Karonn adlea dukhancher* visor poddttolo,
Tem mhojea dolleam mukhavoilem nanch zatolem.
17 Karonn polloi! Hanv novem mollob ani novi prithum rochtam,
Ani adleo vostu porot monant* ieuncheonant,
Teo amchea kallzant pasun ieuncheonant.
18 Tor hanv jem rochtam tachea pasot sontosat ani sasnak khuxalkai monoiat,
Karonn polloi! Tumi khuxal zaunche mhunn hanv Jeruzalemak rochtam,
Ani tumi sontosche mhunn tachea lokank rochtam.
19 Hanv Jeruzalema pasot khuxal zatolom ani mhojea lokam pasot sontostolom,
Porot kednanch thoim roddnneacho vo dukh korpacho avaz ieunchona.”
20 “Thoim thoddoch temp jieun morta toslem ekui bhurgem aschem na,
Aplem purnn jivit jieunk na oslo ekui zanntto aschona.
Xembor vorsanchea piraier konnui morta zalear pasun, to tornattponnar melo oxem mhunnttole,
Ani ek patki xembor vorsancho asa zalear pasun xirapak lagon to mortolo.*
21 Tim ghoram bandtolim ani tantunt ravtolim,
Ani tim drakxanche molle roitolim ani tanchim follam khatolim.
22 Tannim bandlolea ghorant dusro konn ravchona,
Ani tannim roilolea drakxanchea molleantlim follam dusro konn khaunchona.
Karonn mhojea lokanchi pirai zhaddanchea jivita sarki zatoli,
Ani mhoje vinchlole lok aplea hatamnim kelʼlea vavrak lagon khub khuxal zatole.
23 Tancho vavr funkott* voichona,
Vo tanchim bhurgim tras sosunk zolmak ieunchimnant.
Karonn te lok ani tanchim bhurgim Jehovachi sonsot,*
Zankam tannem besanvam dileant.
24 Tannim ulo marchea poilinch hanv tankam zobab ditolom,
Ani te uloita astananch hanv tanchem aikotolom.
Mhojea akʼkhea povitr dongrar te konnankuch tras korchenant vo konnanchench luksonn korchenant,” oxem Jehova mhunntta.