Izaias
49 Zunveamno, mhojem aikat,
Poisulʼlea raxttramno, dhean diat.
Mhozo zolm zaunchea poilinch* Jehovan mhaka apoilo.
Hanv mhojea avoichea kusveant aslom tednanch, tannem mhojem nanv sanglem.
2 Tannem mhoji jib* dhar aslolea tolvari bhaxen keli,
Aplea hatachea savllent mhaka lipoilo,
Mhaka pazlolo bann kelo,
Ani mhaka aplea bannanchea begant lipoilo.
3 Tannem mhaka mhunnttlem: “Izraela, tum mhozo sevok,
Tujea udexim hanv mhoji mhoima dakhoitolom.”
4 Punn hanvem mhunnttlem: “Mhojea vavracho kainch faido zaunk na.
Hanvem bexttoch mhozo soglo jiv zhoroilo.
5 Ani atam Jehovan, zannem mhaka kusveant thaun aplo sevok zaunk ghoddoilo,
Tannem Jakobak porot aplea lagim hadd mhunn mhaka sanglem,
Jea vorvim, hanv Izraelak ektthaim kortolom ani tachea mukhar haddttolom.
Jehovachea nodren mhaka mhoima mellttoli,
Ani mhozo Dev mhojem boll zatolo.
6 Tannem mhunnttlem: “Hanvem tuka fokot Jakobachea kullank porot stapon korunk,
Ani Izraelachea urloleank porot haddunk,
Mhozo sevok mhunn nemunk na.
Punn taronnacho ho sondex prithumechea konnxea-konnxeamnim pavcho mhunn,
Hanvem tuka raxttram pasot uzvadd mhunn nemla.”
7 Lok zaka kainch valor na mhunn lekhtat, raxttram zacho dves kortat, ani zo raz choloupeancho sevok asa, taka Izraelacho Soddoupi ani Povitr Dev Jehova mhunntta:
“Raza tuka polloun ube ravtole,
Ani kunvor tujea mukhar bagovtole,
Oxem te Jehovak lagon kortole, zo visvaxi asa,
Tuka vinchun kaddla tea Izraelachea Povitr Devak lagon te oxem kortole.”
8 Jehova oxem mhunntta:
“Mhojea doiechea vellar hanvem tuka zobab dilo,
Ani mhojea taronnachea disa hanvem tuka modot keli.
Mhojea ani lokam modem tum korar zauncho mhunn,
Desant porot lok ravche mhunn,
Ani mhojea lokank tanchem padd zalʼlem daiz porot mellchem mhunn hanv tuji rakhonn korit ravlom.
9 Koideank mhunn, ‘Bhair ieiat!’
Kallkhant asloleank mhunn, ‘Uzvaddant ieiat!’
Rosteachea kuxik te menddram bhaxen chortole,
Ieta-voita tea rosteanchea* kuxik chorvachim mollam astolim.
10 Te bhukelʼle ani tanelʼle urchenant,
Koddok vot vo suriachi gormi tankam hulpaunchina.
Karonn tanchi kakut korta to tankam vatt dakhoitolo,
Ani tankam udkachea zhorim koddem gheun voitolo.
11 Hanv mhoje sogle dongor ek-sarki zomin kortolom,*
Ani mhoje mha-marg voir kaddttolom.
12 Polloi! Te pois-pois thaun ietat,
Thodde utʼtore thaun, thodde ostome thaun,
Ani thodde Sinim desa thaun ietat.”
13 Mollba, sontosbhorit zav! Prithume, anondbhorit zav!
Dongramno, khuxalkaien bob marat!
Karonn Jehovan aplea lokank bhuzvonn dilea.
Aplea dukhi zalʼlea lokank tannem doia dakhoilea.
14 Punn Sion porot-porot mhunnot aslem:
“Jehovan mhaka soddun dilam, Jehova mhaka visorla.”
15 Ek avoi aplea dudh pietolea bhurgeak visronk xokta kai?
Vo tichea kusvea thaun zolm ghetla tachi tika doia-maia dischina kai?
Ti aplea bhurgeak visorli zalear pasun, hanv tuka kednanch visorchom na.
16 Polloi! Hanvem mhojea hatachea tallttacher tujem nanv kantoilam,
Tujea xaracheo vontteo sodanch mhojea mukhar asat.
17 Tuje put begin-begin ietat.
Jea lokamnim tuka kosllun uddoilʼlem ani nas korun uddoilʼlem, te tujea thaun pois voitole.
18 Tuje dolle ubar ani sorvbhonvtonnim nodor mar.
Te sogle sangata ektthaim zatat.
Te tujea lagim ietat.
Jehova sangta: “Hanv mhojea jivacho soput gheun sangtam,
Tim soglim tujer ghatlolea bhangra bhaxen zatolim,
Ani ek vhokol apleak jea vostumnim nettoita toxim tim tuka zatolim.
19 Tuje zage je nas zalʼle ani padd zaun gelʼle, ani tuzo des zachem nisontton zalʼlem,
Thoim ravtoleam pasot atam zago unno poddttolo.
Ani zannim tuka gillun uddoilʼlem, te tujea thaun pois astole.
20 Tujim bhurgim melea uprant je put zolmole, te tuka mhunnttole,
‘Ho zago amchea pasot lhan poddtta.
Amchea pasot anik zago kor.’
21 Ani tum aplea kallzant mhunnttolem,
‘Mhaka dilolea hea bhurgeancho bapui konn?
Mhaka tor bhurgim naslim ani hanv vanz asli,
Mhaka koidi korun vhelʼli.
Tor hankam konnem vaddoilim?
Polloi! Hanv tor eklich urloli,
Tor him khoim thaun ailim?’”
22 Akʼkhea Vixvacho Dhoni Jehova oxem mhunntta:
“Polloi! Raxttramnim pollounchem mhunn hanv mhozo hat ubartolom,
Ani veg-vegllea desantlea lokam pasot khunna mhunn hanv mhozo khambo ubartolom.
Tednam te tujea putank aplea vengent gheun ietole,
Ani tujea dhuvank te aplea khandar bosoun haddttole.
23 Raza tuji kallji ghetole,
Ani razacheo dhuvo tuji seva korpi zatoleo.*
Tim bagoun* zomnik tokli tenkoun tuka man ditolim,
Ani tujea paim-anchi dhulʼl lenvtolim,
Tednam tuka kollon ietolem ki hanv Jehova,
Ani mhojer bhorvonso dovortat tim kednanch lojek poddchimnant.”
24 Xoktivont zhuzareachea koident asloleank kaddun gheunk zata kai?
Vo zulum kortoleachea tabeant asloleank soddounk zata kai?
25 Punn Jehova oxem mhunntta:
“Xoktivont zhuzarea koddlean, tachea koideank kaddun ghetole,
Ani zulum kortoleachea hatantlean, tachea tabeant asloleank soddoitole.
Tuzo virodh korta tancho hanv virodh kortolom,
Ani hanv tujea putank vanchoitolom.
26 Je tujea sangata vaitt toren vagtat, tankam hanv tanchench mas khavoitolom.
Ani godd drakxancho soro pielʼlea bhaxen, te aplench rogot pieun taitt zatole.
Tednam soglea lokank zannam zaunk poddttolem ki hanvuch Jehova,
Zo tuzo Salvar Korpi ani Soddoupi,
Ani Jakobacho Xoktivont Dev zaun asa.”