Izaias
37 Hem aikotanch, Hezekia Razan aple kopdde pinzle ani sak ghalun to Jehovachea mondirant gelo. 2 Uprant tannem Eliakim, zaka razachea ghoracher* dekhrekh korunk nemlolo, xastri Shebna ani iadnikanchea vhoddilank sak ghalun Amozacho put, provadi Izaiasa lagim dhaddle. 3 Tannim taka mhunnttlem: “Hezekian oxem mhunnttlam, ‘Aicho dis, sonkoxttacho dis, lojecho* ani opmanacho dis. Karonn amchi poristhiti eke osle baile bhaxen zalea, jicho bhurgeank zolm diuncho vell pavla,* punn tika bhurgeank zolmak haddunk boll na. 4 Taka lagon, hea desant urloleam pasot magnnem kor. Ghoddie tuzo Dev Jehova Rabshakechea utrancher dhean di-it, zaka Asiriechea razan jivea Devak tomnne marunk dhaddlolo. Ani tujea Devan, Jehovan, tea soglea utrancho hixob gheum, jim tannem aikoleant.’”
5 Tor Hezekia Razachea sevokamnim vochon Izaiasak hem sanglem 6 tednam Izaiasan tankam mhunnttlem: “Tumi vochon tumchea dhoniak oxem sangat, ‘Jehova oxem mhunntta, “Asiriechea razache sevok mhojea add, mhozo opman korunk jeo vostu uloileat, taka lagon tum bhienaka. 7 Hanv tachea monant ek vichar ghaltolom ani to ek khobor aikon aplea desant porot voitolo. Uprant hanv taka tacheach desant tolvarin marun uddoitolom.”’”
8 Asiriecho raza apli fouz gheun Lakisha thaun gelo mhunn Rabshakek khobor mellʼlli. Tednam Rabshake porot aplea raza lagim gelo ani raza Libna add zhuz korta tem tannem polloilem. 9 Asiriechea razak, Ethiopiecho Raza Tirhaka vixim hi khobor mellʼlli: “To tujea add zhuz korunk aila.” Tednam tannem porot ek pavtt aplea sondexkarank, Hezekia lagim oxem sangon dhaddle: 10 “Tumi vochon Judacho Raza Hezekiak oxem sangat: ‘Tuzo Dev tuka oxem mhunnon fosoita: “Jeruzalem Asiriechea razachea hatant poddchem na.” Punn tum tacher visvas dovornaka. 11 Polloi! Asiriechea razamnim dusrea soglea desanchem koxem nisontton kelam, tem tunvem aikolam. Tor, tum ekloch salvar zatolo oxem tuka dista? 12 Mhojea purvozamnim jea raxttrancho nas kelo, tanche Dev ap-aplea raxttrank vanchounk xokle kai? Gozan, Haran ani Rezef, him raxttram atam khoim asat? Telasarant ravpi Edenache lok khoim asat? 13 Hamathacho raza, Arpadacho raza ani Sefarvaim, Hena ani Ivʼva hea xaranche raza khoim asat?’”
14 Hezekian sondexkaranchea hatantleo chitteo ghetleo ani teo vachleo. Uprant to Jehovachea ghorant gelo ani Jehova mukhar teo chitteo posraun dovorleo. 15 Ani Hezekia Jehova lagim magnnem korunk laglo. Tannem mhunnttlem: 16 “Izraelacho Dev, fouzancho Dev Jehova, tum zo Kerubim voir* bosla, tum prithumechea soglea rajeam modem ekloch khoro Dev zaun asa. Tunvench sorg ani prithum rochlea. 17 Jehova Deva, mhaka kan diun aik! Jehova Deva, tuje dolle ugodd ani amkam polloi! Senakeriban tuka, khorea Devak tomnne marunk jem boroilam, tacher dhean di. 18 Jehova Deva, Asiriechea razamnim soglea desank ani aplea svotachea desak pasun kabar korun uddoilam hem khorem. 19 Tannim tanchea devank pasun ujeant uddoile ani te tancho nas korunk pavle. Karonn te dev nhoi, punn munxanchea hatamnim kelʼleo fatracheo ani lakddacheo vostu asleo. 20 Punn atam, Jehova amchea Deva, tachea hatantlim amkam salvar kor, jea udexim tum Jehova, ekloch Dev zaun asa mhunn prithume voilea soglea rajeank kollttolem.”
21 Tednam Amozacho put Izaiasan, Hezekiak ho sondex dhaddlo: “Izraelacho Dev Jehova oxem mhunntta, ‘Asiriecho Raza Senakeriba vixim tunvem mhojea lagim magnnem kelʼlem dekhun, 22 Senakeriba add Jehovan oxem sanglam:
“Sionachi ankvar dhuv tuka kainch valor naslolea bhaxen lekhta, ti tujeo moskoreo korta.
Jeruzalemachi dhuv tokli haloun tuka hansta.
23 Tunvem konnank tomnno marla, ani tum konnam add uloila tem tori tum zannam?
Konnam add mhunn tunvem tallo ubarla?
Gorvan bhoron tum konnank dolle dakhoita?
Izraelachea Povitr Devak!
24 Tujea sevokam udexim ho sondex dhaddun tunvem Jehovak tomnno marla:
‘Hanv mhojim hixob naslolim rotham gheun
Dongranchea tengxer choddttolom,
Lebanonachea poisulʼlea vattaram meren voitolom.
Hanv tachim vhoddlim-vhoddlim cedar-achim* zhaddam ani borim-borim juniper-achim* zhaddam katrun uddoitolom.
Hanv tachea sogleam-von unch dongrancher ani sogleam-von datt ranamnim bhitor sortolom.
25 Hanv baim-eo martolom ani tanchem udok pietolom,
Ani mhojea paim-am tolla hanv Ejipttache vhall* sukoitolom.’
26 Tunvem hem aikonk na? Khub poilinch hanvem ho nirnnoi ghetlolo.*
Xekddeamnim vorsam adim hachi toiari kelʼli.*
Atam hanv tem ghoddoun haddttolom.
Tum kilʼleanchim xaram, fatranchi ras korun soddttolo.
27 Tantunt ravtole lok kainch adar naslolea bhaxen zatole,
Te bhietole ani lojent poddttole.
Te mollar aslolea zhaddam-peddam bhaxen, ani hirvea tonna bhaxen zatole,
Te ghora voir* aslolea tonna bhaxen zatole, jem udentechea varean korpon voita.
28 Tum kednam uttʼttha-bosta, kednam ieta-voita,
Tum mhojer kednam ragar zata tem hanv zannam.
29 Karonn tuzo krodh ani tum gorozta to avaz mhojea kanam meren pavla.
Hanv tujea nakant gori ghaltolom ani tujea tonddank logom* ghaltolom,
Ani tuka voddun hanv teach vatten vhortolom, zoim thaun tum ailʼlo.”
30 “‘Oxem ghoddttolench mhunn hanv tuka* hi khunna ditam: Hea vorsa tumi apxinch upzota* to dano khatole. Fuddlea vorsa to dano poddon kirlota tem tumi khatole. Punn tisrea vorsa tumi vomptole ani lunvtole, toxench tumi drakxanche molle roitole ani tachim follam khatole. 31 Judachea ghoranneantle je lok vanchon urtat, te pallam ghetole ani follam ditole. 32 Je lok urleat te Jeruzalemantlean bhair ietole, ani je vanchtat te Sion Dongra voilean bhair sortole. Fouzancho Dev Jehova tache urbek lagon hem ghoddoun haddttolo.
33 “‘Taka lagon, Jehova Asiriechea raza vixim oxem mhunntta:
“To hea xarant ieunchona,
To ek pasun bann soddchona,
To ddhal gheun akromonn pasun korchona,
Vo vonott bandun gherav pasun ghalchona.’”
34 Jehova mhunntta: ‘To jea vatten aila, teach vatten porot voitolo,
To hea xarant ieunchona.
35 Hanv mhojea nanva pasot ani mhozo sevok Davida pasot,
Hea xarachi rakhonn kortolom ani tem salvar kortolom.’”
36 Uprant, Jehovacho dut Asiriekaranchea tombunt gelo ani tanchea 1,85,000 soinikank tannem jivexim marle. Lok sokallim fuddem utthle tednam sogleak moddim poddleant tim tannim polloilim. 37 Tednam Asiriecho Raza Senakerib thoim thaun gelo. To porot Nineve gelo ani thoim ravlo. 38 Ek dis to aplo dev Nisrokachea mondirant man bagoun tachea paim-am poddttalo tednam, tachech put Adramelek ani Sharezeran taka tolvarin jivexim marlo, ani uprant te Ararat desant pollon gele. Ani tacho put Esarhadon Senakeribachea zagear raza zalo.