Zefania
3 Add voitolea, boxttailʼlea ani zulum kortolea tea xaracher* hai!
2 Tannem adnea pallunk na, xist manun gheunk na,
Tannem Jehovacher visvas dovrunk na, tem aplea Devak lagim soronk na.
3 Tache kunvor gorozta tosle xinv,
Tache neai korpi ratche xikar kortat tosle kole,
Sokallim chabddaunk te ek hadd pasun soddinant.
4 Tache provadi vaitt uloupi ani visvasghat korpi munis,
Tache iadnik povitr vostunk oxudʼdh kortat,
Ani te kaide moddttat.
5 Tachea modem ravpi Jehova nitivont asa, to koslich chuk korina.
Chukonastana sokall zatach,
Toso to dor disa aple nirnnoi kolloita,
Tori astana, onitivont munxak loz disona.
6 “Hanvem raxttrancho nas kelo, tanche konnxeache gopur padd zaun gele.
Hanvem tanche roste kabar kele, thoim thaun konnuch pasar zaina.
Tanchim xaram padd zalim, thoim ekui munis uronk na.
7 Hanvem mhunnttlem, ‘Tum mhoji bhirant dhor ani xist* manun ghe.’
Hea udexim tacho* ravpacho zago nas zaunchona.
—Hanv hea soglea kamancho tache koddlean hixob ghetolonch.*
Punn te vaitt kamam korunk chodduch utsuk asle.
8 Jehova mhunntta, ‘Hanv lutticho mhal gheunk uttʼttolom* tea disa meren,
Tumi mhoji* vatt polloit ravat,
Tancher mhozo soglo rag ani krodh votounk,
Raxttrank ektthaim korcho ani rajeank zoma korcho hanvem nirnnoi ghetla.
Karonn mhoje zolltte urben akʼkhi prithum lason voitoli.
9 Tednam hanv soglea lokanchi bhas bodlun tankam ek xudʼdh bhas ditolom.
Jea udexim te sogle Jehovachea nanvan ulo martole,
Ani ekvottan tachi seva kortole.’*
10 Hanga-thoim ximpoddlole mhoje lok, je mhoje koddem vinoti kortat,
Te Ethiopiechea nhoim-enchea vattarantlean mhojea pasot dennim gheun ietole.
11 Tunvem mhojea add vochon jitlim kamam keleant
Taka lagon, tuka* tea disa loz bhogunk poddchi na,
Karonn tea disa hanv tujea modlea boddai martolea gorvixttank kaddun uddoitolom.
Ani tum porot kednanch mhojea povitr dongrar gorvan vagchem na.
12 Hanv tumchea modem khaltikaiechea ani lhanvikaiechea lokank ravonk ditolom,
Ani te Jehovachea nanvant asro ghetole.
13 Izraelache urlole lok onitivont kamam korchenant,
Fott marchenant, toxench te aplea jiben fosounchenant,
Te khatole-pietole* ani visov ghetole, tankam konnuch bhieoncho* na.”
14 Sionache dhuve, khuxal zaun zoizoikar kor.
Izraela, zoit mellʼllem mhunn vhoddlean bob mar!
Jeruzalemache dhuve, purnn kallzan khuxalbhorit ani sontosbhorit zav!
15 Jehovan tumkam dilʼli khast kaddun uddoilea,
Tujea dusmanak pois kela,
Izraelacho Raza Jehova tujea sangata asa.*
Hea fuddem tuka kednanch odruxttachi bhirant aschina.
16 Tea disa Jeruzalem him utram aikotolem:
“O Siona, bhienaka.
Tuje hat gollonk dinaka.*
17 Tuzo Dev Jehova tujea sangata asa.
Eka bollixtt zhuzarea sarko to tuka salvar kortolo.
To tuka lagon khub khuxal zatolo.
Tuzo mog korta dekhun to xant* ravtolo.
To tuka polloun vhoddlean gaitolo.
18 Tujea porbank ieunk mellona mhunn dukhi asat tankam sogleank hanv ektthaim kortolom.
Te koident opman sostale dekhun tankam ieunk mellonk na.
19 Polloi! Tea vellar tumkam sotaitat tea sogleam add hanv panvl ghetolom.
Je longoddttat tankam hanv salvar kortolom,
Hanga-thoim ximpoddleat tankam hanv ektthaim kortolom.
Jea desamnim tankam loz bhogunk poddli,
Thoim hanv tankam vakhannʼnni mellom-xi kortolom ani tankam famad kortolom.
20 Tea vellar, hanv tumkam porot haddttolom,
Tea vellar, hanv tumkam sogleank ektthaim kortolom.
Hanv tumchea lokank tumchea dolleam mukhar koidentlean porot haddttolom,
Tednam hanv prithume voilea soglea lokam modem tumkam famad kortolom, ani tumkam vakhannʼnni mellom-xi kortolom,” oxem Jehova mhunntta.