Izaias
53 Amche koddlean* aikololea vostuncher konnem bhavarth dovorla?
Jehovan apli xokti* konnank ugddapi kelea?
2 To tachea* mukhar khandea sarko voir sortolo, sukea zomnir mull ghetolo.
Ami taka polloitat tednam, tachea bhitor kainch sobitkai vo vorteponn dixtti poddona.
Toxench taka polloun ami tachea vatten voddonk, tachem rup titlem sobit na.
3 Lokamnim taka kainch valor naslolea bhaxen lekhlo ani taka pois kelo,
Dukh ani duens mhunnttlear kitem tem to bore bhaxen zannam aslo.*
Tachem tondd amchea thaun liplolea bhaxen aslem.*
Ami taka kainch valor naslolea bhaxen lekhlo ani tachi beporva keli.
4 Tannem amchim duensam apnnacher ghetlim,
Ani amchem dukh tannem soslem.
Punn ami taka, to pidden bhorlolo, Devan xikxa dilolo ani trasan bhorlolo oso lekhlo.
5 Amchea opradak lagon taka toplo,
Amchea guneanvank lagon taka mostilo.
Amkam xanti mellchi mhunn tannem khast bhogli,
Ani tachea ghaveank lagon ami borim zalim.
6 Ami soglim menddram sarkim bhottokleant,
Dor eklo ap-aplea vatten cholta,
Ani Jehovan amcho sogleanchea guneanvacho bhar tacher ghatla.
7 Tacher zulum kelo, ani tannem soglem soslem,
Punn tannem aplem tondd ugddunk na.
Eka menddrak marunk haddttat toso taka haddlo,
Ani ek menddro apli lhonv tasta tachea mukhar vogi ubo ravta,
Toxem tannem aplem tondd ugddunk na.
8 Zulum ani onʼneai korun tacho jiv kaddlo.*
Punn to konn ani khoim thaun ailo tem* konnem tori zannam zauncho proitn kelo kai?
Taka jiveanchea desantlo kabar korun uddoilo.
Mhojea lokanchea opradank lagon taka jivexim marlo.*
9 Tannem kainch vaitt korunk naslem,*
Ani tachea tonddantlean naddbudʼdhechim utram ieunk nant.
Tori astana, taka noxtteam sangata purunk zago dilo,*
Ani to melo tednam taka girestam* sangata purlo.
10 Punn taka mostunk Jehovachich khuxi asli, taka lagon tannem taka dukh sosunk dilem.
Tunvem tacho jiv patkachea farikponnachi bhett mhunn bhettoilo zalear,
To tachi sonsot* polloitolo ani zaite dis poriant jietolo,
Ani tacheach udexim Jehovachi khuxi purnn zatoli.*
11 Tannem je tras sosle te to polloitolo ani taka dhadosponn mellttolem.
Nitivont aslolo, mhozo sevok aplea gineana vorvim,
Zaitea lokank nitivont zaunk modot kortolo,
Ani to tanche guneanv apleacher ghetolo.
12 Taka lagon, hanv taka zaiteam modem vantto ditolom,
To xoktivont munxam sangata lutticho mhal vanttʼttolo,
Karonn tannem aplo jiv bolidan kelo,*
Ani taka opradeam modlo eklo mhunn mezlo.
Tannem zaiteanchem patok ubarlem,
Ani opradeam pasot to modesti koso zalo.