Izaias
52 Utth! Siona utth! Ghottai ghe.
Povitr xar Jeruzalema, tuje sobit kopdde ghal.
Karonn atam thaun sunot korunk naslolo ani oxudʼdh munis tujea bhitor sorchona.
2 Jeruzalema, ubem rav, dhulʼl fafudd ani voir ieun bos.
Koident aslolea Sionachea dhuve, tujea golleak bandloleo sanklleo sodd.
3 Jehova oxem mhunntta:
“Kainch farik korinastana tumkam vikle,
Ani atam kainch mol farik korinastana tumkam soddoitole.”
4 Akʼkhea Vixvacho Dhoni Jehova oxem mhunntta:
“Poilim mhoje lok Ejipttant pordexi mhunn ravonk gele,
Uprant Asirien kainch karonn nastana tancher zulum kelo.”
5 Jehova mhunntta: “Atam hanv kitem korum?
Karonn mhojea lokank koslench mol farik korinastana koidi korun vheleat.”
Jehova mhunntta: “Tancher raz choloitat te apleak zoit mellʼllam mhunn boddai martat,
Te dis-bhor mhojea nanvacho opman kortat.
6 Taka lagon, mhoje lok mhojem nanv zannam zaunk pavtole,
Tanchea lagim uloita to hanvuch mhunn tea disa tankam kollon ietolem.
Polloi, to hanvuch!”
7 Tache paim dongrancher kitle mhunn sobit, zo bori khobor haddtta,
Zo xantichi kollounni korta,
Zo borea vostum vixim bori khobor haddtta,
Zo taronnacho sondex kolloita,
Zo Sionak mhunntta: “Tuzo Dev Raza zala!”
8 Aik! Tuje rakhonndar vhoddlea avazan bob martat,
Te sangata mellon khuxalkaien bob martat,
Karonn Jehova Sionak porot haddtta tednam te spoxtt toren polloitole.
9 Jeruzalemachea padd zalʼlea zageamno, sontosbhorit zaiat, sangata mellon khuxalkaien bob marat!
Karonn Jehovan aplea lokank bhuzvonn dilea, tannem aplea lokank soddoileat.
10 Soglea raxttram mukhar Jehovan aplo povitr hat dakhoila,
Prithumechea konnxea-konnxeamnim aslole lok amchea Devan kelʼlim taronnachim kamam* polloitole.
11 Pois vochat, pois vochat, thoim* thaun bhair sorat, oxudʼdh aslolea khoincheach vostuk hat lainakat!
Jehovachea mondirantlim aidonam ubartoleamno,
Tichea thaun bhair sorat ani xudʼdh ravat.
12 Tumkam thoim thaun bhieun vochonk poddchem na,
Toxench tumkam pollonui vochonk poddchem na,
Karonn Jehova tumchea mukhar voitolo,
Ani Izraelacho Dev tumchi rakhonn korunk tumchea fattlean ietolo.
13 Polloi! Mhozo sevok kholaieche somjikaien vagtolo.
Taka ek mhotvachi podvi ditole,
Taka voir kaddttole ani khub man ditole.
14 Zoxim, zaitim zannam taka polloun thottaklim*
—Karonn khoincheach munxachem rup piddʼddear zaunk na titlem tachem rup piddʼddear zalʼlem
Ani khoincheach munxachi zaunk na titli tachi sobitkai piddʼddear zalʼli—
15 Toxinch, raxttram taka polloun thottaktolim.
Raza tachea mukhar aplem tondd bond dovortole,*
Karonn tankam sangonk nant, tosleo vostu te polloitole,
Ani tannim aikonk nant, toslea vostuncher te dhean ditole.