Izaias
63 Ho konn, zo Edoma thaun ieta?
Ho konn, zo Bozra thaun zhogzhogit* kopdde ghalun ieta?
Ho konn, zo sobit kopdde ghalun,
Zobordost xokten cholot ieta?
“To hanvuch, zo nitivontponnan uloita,
Zaka salvar korpachi zobordost xokti asa.”
2 Tuje kopdde tambdde kiteak asat?
Tuje kopdde drakxam maddoupachea zagear kam kortoleachea kopddeam bhaxen kiteak asat?
3 “Hanvem ekleanuch drakxam maddoupachea zagear drakxam maddoileant,
Veg-vegllea desantlea lokam modlo konnuch mhojea sangata naslo.
Mhojea ragan hanv tankam maddoit ravlom,
Mhojea krodhan hanv tankam paim-am ponda chiddʼddoit gelom.
Tanchem rogot mhojea kopddeancher usollʼllem,
Ani taka lagon mhojea soglea kopddeank khotam poddlim.
4 Hanvem sudd gheuncho dis tharaila,
Tem voros lagim pavlam, jednam hanv mhojea lokank soddoitolom.
5 Hanvem hevtten-tevtten polloilem, punn mhaka modot korunk konnuch fuddem ieunk na.
Konnench mhaka tenko diunk na tem polloun hanv ojap zalom.
Tor, hanvem mhojeach hatachea bollan mhaka taronn* dilem,
Ani mhojeach krodhan mhaka tenko dilo.
6 Hanvem mhojea ragan veg-vegllea desantlea lokank maddoun uddoile,
Mhojea krodhacho pelo pivoun, tankam ttaitt kele.
Ani tanchem rogot zomnir varoilem.”
7 Jehovachea visvaxi mogachea kamam vixim hanv sangtolom.
Vakhannʼnni favo aslolea Jehovachea kamam vixim hanv sangtolom,
Karonn Jehovan amchea pasot zaitem kelam.
Aplea kakutik lagon ani vortea visvaxi mogak lagon,
Tannem Izraelachea ghorannea pasot zaiteo boreo vostu keleat.
8 Karonn Devan mhunnttlem: “He mhoje lok, he mhoje put je kednanch visvasghat korchenant.”
Ani to tancho Salvar Korpi zalo.
9 Te trasant astale tednam taka-i tras zatale,
Ani tankam vanchounk tannem aplea sondexkarak* dhaddlo.
Tannem mogak ani doie-maiek lagon tankam soddoile,
Adlea kallar thaun tankam uklun, vengent gheun bhonvlo.
10 Punn te tachea add gele ani tannim tachea povitr xoktek dukhoili.
Taka lagon, to tancho dusman zalo,
Ani tanchea lagim zhogoddlo.
11 Tednam te adlea disancho ugddas korunk lagle,
Devacho sevok Moizesache dis ugddas korun tannim mhunnttlem:
“Aplea lokank ani tanchea gonvlleank doriantlean bhair haddle, to khoim asa?
Zannem taka apli povitr xokti diloli, to khoim asa?
12 Zannem aplea mhoimebhorit hatan Moizesachea uzvea hatak adar dilo, to khoim asa?
Aplem nanv sodankal ugddas dovorchem mhunn,
Zannem lokam mukhar udok doxim kelʼlem, to khoim asa?
13 Uktea moidanar* ghoddo dhanvta toso,
Zo tankam khol doria modlean addkhollonk dinastana choloun gheun gelo,
To khoim asa?
14 Zoso hindd falkeantlea moidanar boson visov gheta,
Toso Jehovachea povitr xokten tankam visov dila.”
Aplea nanvachi mhoima zaunchi mhunn,*
Tum hea toren tujea lokank margdorxon di-it ravlo.
15 Sorgar thaun sokol polloi,
Tujea unch, povitr ani mhoimen bhorlolea* zagear thaun polloi.
Tum mhojer dhean kiteak dina? Tum tuji xokti kiteak dakhoina?
Tuji doia-maia ani kakut khoim geli?
Hem soglem tunvem mhojea thaun addaun kiteak dovorlam?
16 Karonn tum amcho Bap.
Abraham amkam vollkhona zait,
Ani Izrael amkam vollkhona zait,
Tori astana, Jehova Deva tum amcho Bap.
Adlea kallar thaun tunch amcho Soddoupi ani hench tujem nanv.
17 Jehova Deva, tunvem amkam tujea vattevoile koddsoronk kiteak dile?*
Ami tuji bhirant soddun dium poriant, tunvem amchim kallzam itlim nibor zaunk kiteak dilim?*
Tujea sevokam pasot, porot ieo,
Tujem daiz aslolea kullam pasot, porot ieo.
18 Tuzo des thoddea vella pasot tujea povitr lokanchea adhin aslo,
Magir amchea dusmanamnim ieun tuzo povitr zago maddoun uddoilo.
19 Zaitea tempa thaun ami oxe asle, zoxe tunvem amcher kednanch raz cholounk na,
Zoxe tujea nanvan amkam kednanch ulo marunk na.