Izaias
40 Tumcho Dev mhunntta, “Mhojea lokank bhuzvonn di, tankam bhuzvonn di.
2 Jeruzalema lagim doiall toren uloi,*
Tache dukhache dis somple mhunn taka sang,
Tannem aplea patkanchem farikponn dilem,
Jehova koddlean taka tachea patkanchem purnn* farikponn mellʼllem.”
3 Ranvott vattarantlean konn tori ulo korta tacho avaz aikonk ieta:
“Jehova pasot vatt toiar korat!*
Oronnʼnneantlean amchea Deva pasot ek nitt mha-marg korat.
4 Dor ek falkem bhorun kaddat,
Ani dor ek dongor ani porvot ek-sarki zomin korat,*
Voir-sokol aslolo zago ek-sarko korat,
Ani khoddboddit zomin molla sarki korat.
5 Tednam Jehovachi mhoima ugddapi zatoli,
Ani sogle lok ti polloitole,
Karonn Jehovan hem sanglam.”
6 Aik! Konn tori mhunntta: “Kollit kor!”
Dusro vicharta: “Kitem kollit korum?”
“Sogle munis hirvea tonna sarke asat.
Ani tancho visvaxi mog xetantlea fulam sarko asa.
7 Jehovacho svas tancher poddtta tednam,
Hirvem tonn sukta
Ani fulam bavtat.
Khorench, lok hirvea tonna sarke asat.
8 Hirvem tonn sukta
Ani fulam bavtat,
Punn amchea Devachem utor sodankal togta.”
9 Sionak bori khobor haddpi baile,
Unch dongrar choddon voch.
Jeruzalemak bori khobor haddpi baile,
Vhodd tallean ti sang.
Hoi, vhodd tallean sang, bhienaka.
Judachea xaramnim hi kollounni kor: “Ho polloi tumcho Dev!”
10 Polloi! Akʼkhea Vixvacho Dhoni Jehova aple xokten ietolo,
Ani tacho hat tachea pasot raz kortolo.
Polloi! Dev aplea sangata inam gheun ieta,
Zo disvoddo to farik kortolo, to tachea mukhar asa.
11 Eka gonvllea bhaxen to aplea hinddachi kallji ghetolo.
Aplea hatamnim to menddurleank ektthaim kortolo,
Ani tankam aplea vengent ubartolo.
Poram kaddlolea menddrank to sovkas-sovkas vhortolo.
12 Doriachem udok aplea hatant gheun konnem mezlam?
Vetan* mollob konnem mezlam?
Map gheun prithumechi dhulʼl konnem zokhlea?
Dongor ani porvot,
Tagddi gheun konnem zokhleat?
13 Jehovachi povitr xokti konnem mezlea?*
Solʼlo diupi zaun, konn taka solʼlo diunk xokta?
14 Somjikai melloun gheunk, to konnank mellʼllo?
Vo neai korunk taka konn xikoita?
Konn taka ginean dita,
Vo khore somzonnechi vatt dakhoita?
15 Polloi! Soglim raxttram tachea mukhar baldentlea udkachea eka thembea sarkim asat,
Tim tagddecher matlolea dhulʼli sarkim asat.
Polloi! To zunveank dhulʼl zalʼle porim ukolta.
16 Lebanonantlim soglim zhaddam pasun vedicher zollounk pavchimnant,
Ani hulpailʼli bhett diunk thoinchim ranvotti zonvaram pasun unnim poddttolim.
17 Soglim raxttram tachea mukhar ostitvant naslolea sarkim,
Tachea nodrent tim kainch nhoi, tankam kainch mol na.
18 Tumi Devak konnam lagim sor kortole?
Oxem kitem asa, jem tachea sarkem asa?
19 Kola aslolo kamdar murti* toiar korta,
Ani xett tika bhailean bhangar kaddtta,
Ani tichea pasot chandicheo sorpolleo* korta.
20 Vo ek munis bhett diunk ek oslem zhadd vinchun kaddtta,
Jem kusona.
Uprant to vochon kola aslolea eka kamdarak sodhta,
Zo thir ubi urta tosli murti toiar korunk xoktolo.
21 Tumkam khoborna kai?
Tumi aikonk na kai?
Survatek thaun tumkam sangonk naslem kai?
Prithumechi buniad ghatloli tednam thaun aslolea puraveacher tumi dhean diunk na kai?
22 Zo gol prithume voir ravta,
Tachea mukhar prithumer jietolim soglim tollam sarkim asat.
To mollbak mov ani patoll kopddea sarko posraita,
Ravonk tannlolea tombu sarko to taka posraita.
23 To vhoddlea-vhoddlea odhikareank sokol uddoita,
Prithumechea neai korpeank* kainch nhoi korun soddtta.
24 Te atanch roilolea rompea sarke asat,
Tankam atanch vomplole,
Tanchim mullam azun ghott zaunk naslim,
Punn tancher varo marta ani te suktat,
Ani vadoll ieun pola bhaxen tankam uboun vhorta.
25 Povitr Dev mhunntta: “Tumi mhaka konnam sangata sor kortole? Mhojea sarko anik konn asa?
26 Tumche dolle voir ubarun mollbak polloiat.
Him soglim noketram konnem rochleant?
Tannench, zo tankam mezun ek fouz koxi fuddem dhaddtta.
Tanchea modlea dor ekleak nanvan ulo korta.
Taka aslolea zobordost takotik lagon ani ojapache xoktek lagon,
Tanche modlo, dor eklo ap-aplea zagear asta.*
27 Jakoba, tum oxem kiteak mhunntta? Izraela, tum oxem kiteak uloita?
‘Mhoji vatt Jehova koddlean liplea,
Deva koddlean mhaka kosloch neai mellona’?
28 Tuka khobor na? Tunvem aikonk na?
Prithumer sogleo vostu Rochpi Jehova, sasnachea sasnak Dev zaun asa.
To kednanch thokona vo taka kednanch puro zaina.
Tachea somjikaiecho konnancheanuch thav lavunk zaina.
29 Thokloleank to xokti dita,
Ani boll nasloleank toch ghottai dita.
30 Bhurge thoktole ani tankam puro zatolem,
Ani tornatte addkhollon poddttole,
31 Punn je Jehovacher bhorvonso dovortat, tankam novean xokti mellttoli.
Te ghonni bhaxen pakhotte posraun voir uddttole.
Te dhanvtole punn thokchenant,
Te choltole punn tankam puro zaunchem na.”