Izaias
61 Akʼkhea Vixvacho Dhoni Jehovachi povitr xokti mhojer asa,
Karonn lhanvikank bori khobor porgottunk Jehovan mhaka makhla.
Dukhovlolea kallzanche ghave bandunk,
Koideank suttka porgottunk,
Ani bondkhonnint asloleanche dolle ugoddttole mhunn sangonk, tannem mhaka dhaddla.
2 Jehovachem doiechem voros,
Ani amchea Devacho sudd gheuncho dis porgottunk,
Dukh kortolea sogleank bhuzvonn diunk tannem mhaka dhaddla.
3 Siona pasot dukh kortoleank,
Gobrachea bodlek sobit munddaso* diunk,
Dukhachea bodlek sontosachem tel diunk,
Niraxi monachea bodlek vakhannʼnnechi nhesonn diunk tannem mhaka dhaddla.
Tankam nitivontponnache vhoddle-vhoddle rukh mhunnttole,
Jehovan lailʼle rukh, jea vorvim tachi mhoima zatoli.*
4 Adim padd zaun gelʼle zage te porot bandun kaddttole,
Khub tempa thaun osadd poddlole zage te novean bandtole,
Ani nisontton zalʼlim xaram porot bandun kaddttole,
Hoi, pillgean-pillge thaun padd zalʼle zage te sarke kortole.
5 “Porke lok ietole ani tujea hinddache gonvlli zatole,
Pordexi lok tuje xetkar ani tujea drakxanchea molleant kam korpi zatole.
6 Punn tumkam Jehovache iadnik mhunnttole,
Te tumkam amchea Devache sevok mhunnttole.
Tumi raxttranchi girestkai uzar kortole,
Ani tumi tanchea mhoime* vixim boddai martole.
7 Lojechea bodlek, mhojea lokank dobrad vantto mellttolo,
Opmanachea bodlek, tankam aplo vantto mellʼllo mhunn te khuxalkaien bob martole.
Hoi, tankam tanchea desant dobrad vantto mellttolo.
Tanchi khuxalkai sasnachea-sasnak urtoli.
8 Karonn hanv Jehova, neai-acho mog kortam,
Chori korop ani onitivontponn, hancho hanv dves kortam.
Hanv visvaxiponnan tankam tancho disvoddo ditolom,
Ani hanv tanchea sangata sasnacho korar kortolom.
9 Tanchea sonstik* soglim raxttram,
Ani tanchea pillgenk veg-vegllea desantle lok vollkhotole.
Tim Jehovan besanv ghatloli sonsot* mhunn,
Tankam polloitat tim soglim vollkhotolim.”
10 Hanv Jehovak lagon khuxal zatolom.
Mhozo akʼkho jiv, mhojea Devak lagon khuxal zatolo.
Karonn tannem mhaka taronnache kopdde ghatleat.
Zoso ek novro iadnika bhaxen munddaso bandta,
Ani zoxi ek vhokol bhangar ani her vostu* ghalun nhesta,
Toxench tannem mhaka nitivontponnacho kott* ghatla.
11 Zoxi prithum biank kombreo futtʼtta toxi korta,
Ani zoxi bag vomploleo bio kirloita,
Teach bhaxen, Akʼkhea Vixvacho Dhoni Jehova,
Nitivontponn ani vakhannʼnni soglea raxttram mukhar vaddoitolo.