Izaias
2 Amozacho put Izaiasan, Juda ani Jeruzalema vixim hem dorxon polloilem:
2 Xevottachea disamnim*
Jea dongrar Jehovachem ghor asa,
To soglea dusrea porvotam poros unch stapon zatolo,
Ani soglea dongram poros voir ubarlolo astolo,
Ani soglim raxttram tache lagim lotton ietolim.
3 Zaitea desantle lok ietole ani mhunnttole:
“Ieiat, ami Jehovachea dongrar choddom-ia,
Jakobachea Devachea ghorant vochom-ia.
To amkam tacheo vatto xikoitolo,
Ani ami tache vatten choltolim.”
Karonn Sionantlean kaido,*
Ani Jeruzalemantlean Jehovachem utor bhair sortolem.
4 To veg-vegllea raxttrantlea lokanchi zhoddtti kortolo,
Zaitea desantlea lokanche vad-vivad suttave kortolo.
Te apleo tolvari moddun zotam kortole,
Ani aplea bhaleancheo koiteo* kortole.
Ek raxttr dusrea raxttra add porot anik tolvar ubarchem na,
Toxench, te porot kednanch zhuz pasun korunk xikchenant.
5 Jakobachea ghorannea, ieo,
Ami Jehovachea uzvaddant cholom-ia.
6 Deva, tunvem tujea lokank, Jakobachea ghoranneak soddun dila,
Karonn udentecheo zaiteo vostu tannim apnnaileat,
Te Filistevkaram bhaxen jadu kortat,
Ani tancho des pordexianchea bhurgeamnim bhorla.
7 Tanche lagim zaiti chandi ani bhangar asa,
Ani hixob naslole theve asat.
Tancho des ghoddeamnim bhorla,
Ani tanche lagim hixob na titlim rotham asat.
8 Tancho des valor naslolea devamnim bhorla.
Te apleach hatanchea kama mukhar,
Ani apleach bottamnim toiar kelʼlea murteam mukhar man bagoitat.
9 Hea toren munis apleakuch unnea dorjeacho korta ani aplich loz korun gheta.
Tum tankam bhogxinaka.
10 Jehovachea krodhak lagon ani tachea mhoimevont vorteponnak lagon
Khoddpamnim vochat ani tumkam dhulʼlint lipoiat.
Tea disa, fokot Jehovachich vakhannʼnni zatoli.
12 Karonn to fouzancho Dev Jehovacho dis.
To dis gorvixttancher ani gorvan fulʼloleancher,
Sogleancher, mhotvachea ani sadea munxancher,
13 Lebanonachea soglea unch ani vhoddlea cedar* zhaddancher,
Ani Bashanachea soglea oak* zhaddancher,
14 Soglea unch dongrancher
Ani soglea vhoddlea porvotancher,
15 Dor eka vhoddlea gopuracher ani dor eke ghott vontticher,
16 Tarshishachea soglea tarvancher
Ani sobit vhoddeancher to ieta.
17 Tednam munxachea gorvacho churo zatolo,
Tacho soglo ghomondd denvtolo.*
Tea disa fokot Jehovachich vakhannʼnni zatoli.
18 Valor naslole dev purnn toren nanch zatole.
19 Jednam Jehova mhoimebhorit vorteponnan ietolo
Ani apli bhirant posraitolo,
Jednam to prithumek bhirantin koddkoddaitolo,
Tednam lok khoddpanchea dholimnim
Ani zomnichea fonddamnim vochon liptole.
20 Tea disamnim lok apleo chandicheo ani bhangracheo murteo
Jeo tannim puza korunk toiar kelʼleo,
Teo chichundream ani pakheam mukhar uddoitole.
21 Ani lok khoddpanchea dholimnim
Ani tollpanchea khanchimnim ghustole,
Karonn Jehova aplea mhoimebhorit vorteponnan ietolo
Ani apli bhirant posraitolo,
To prithumek bhirantin koddkoddaitolo.
22 Tumcheach boreak lagon, munxacher visvas dovrop soddun diat,
To fokot nakachea puddantlo svas zaun asa.
Tacher dhean diunk, to konn?