Izaias
54 Jehova mhunntta: “Bhurgeank zolm diunk na te vanz baile, khuxalkaien bob mar!
Ballontiniche vollvolle kednanch sosunk poddonk na te baile, sontosbhorit zaun khuxalkaien bob mar!
Karonn jea bailecho ghov* tichea sangata asa, tea bailechea putam poros,
Soddun dilʼle baileche put* chodd asat.”
2 “Tuzo tombu vaddoi.
Tujea vhoddlea tombuche kopdde anikui posrai.
Fatti-fuddem polloinaka, tombucheo dorio lamb kor,
Ani tujea tombuche khuntte ghott kor.
3 Karonn tum uzvean ani davean posortoli.
Tuji sonsot raxttrank aplea tabeant ghetoli,
Ani te padd zaun gelʼlea xaramnim porot ravonk lagtole.
4 Bhienaka, karonn tuka lojek ghalchenant.
Ani tum tukach kainch valor naslolea bhaxen somzonaka, karonn tuka niraxi zaunk poddchem na.
Tujea tornattponnar tuka ji loz bhogchi poddli, ti tum visortoli,
Tum vidva aslolean tuka zalʼlea opmanacho tuka porot kednanch ugddas ieunchona.”
5 “Tuzo Vorto Rochnnar* tuzo ghov* zaun asa,
Tachem nanv fouzancho Dev Jehova,
Izraelacho Povitr Dev tuzo Soddoupi zaun asa.
Taka akʼkhea prithumecho Dev mhunnttole.
6 Soddun dilʼle ani dukhant buddlole bailek apoitat toxi,
Tornattponnar kazar zalʼle ani uprant ghovan nakarlole bailek apoitat toxi, Jehovan tuka apoili,” oxem tuzo Dev mhunntta.
7 “Thoddeach vella pasot hanvem tuka soddun dilʼli,
Punn vhodd doien hanv tuka porot haddttolom.
8 Ragan bhoron thoddea vella pasot hanvem tujea thaun mhojem tondd lipoilem,
Punn hanv tuji kakut kortolom, karonn mhozo visvaxi mog sodankal urta,” oxem Jehova mhunntta zo tuzo Soddoupi zaun asa.
9 “Mhaka hem Noah-achea disam sarkench asa.
Prithum buddtte vorvim porot kednanch buddchina mhunn hanvem soput ghetlolo toso,
Hanv porot kednanch tujer ragar zaunchom na vo porot kednanch tuka khast launchom na mhunn soput ghetam.
10 Karonn dongor nanch zatole
Ani porvot haltole,
Punn tujea pasot aslolo mhozo visvaxi mog kednanch na zaunchona,
Ani hanvem kelʼlo xanticho korar kednanch moddchona,” oxem Jehova mhunntta zo tuji kakut korta.
11 “Khontin buddlole, vadollant boddoilʼle ani bhuzvonn mellonk naslole baile,
Hanv tuje fator ghott chunean* bosoitolom,
Ani safair fatramnim* tuji buniad ghaltolom.
12 Hanv tujea xarache vonttiche gopur rubi fatramnim,*
Tuje darvontte chokchokta toslea fatramnim,*
Ani tujeo sogleo ximo moladik fatramnim bandtolom.
13 Tuje sogle put Jehovan xikoilole astole,*
Ani tankam bhorpur xanti mellttoli.
14 Nitivontponn tuka thir kortolem.
Konnuch tujer zulum korchona,
Tuka kiteachich bhirant dischina ani tum bhieun thorthorchina,
Karonn kitench bhirankull tujea lagim pasun ieunchem na.
15 Konnem-i tujer akromonn kelear,
Tem hanvem dilʼlea hukumak lagon aschem na.
Tuje lagim zhogddonk ietat te hartole.”
16 “Polloi! Funk marun inglle pettoita,
Ani tacher dhatuchim hotʼtearam toiar korta,
Tea kam korpeak* hanvench rochla.
Ani padd korun uddounk hanvench tea nas korpi munxak rochla.
17 Tujea add ubarlolea khoincheach hotʼtearak zoit mellchem na,
Tujer arop ghalta ti dor ek jib fotting mhunn dison ietoli.
Hench Jehovachea sevokanchem daiz zaun asa,
Ani hanvuch tankam nitivont mhunn tharaita,” oxem Jehova mhunntta.