Jonas
4 Punn Jonasak hem matxe pasun avddonk na, ani to samko ragar zalo. 2 Taka lagon, tannem Jehovak magnnem korun mhunnttlem: “Jehova Deva, hanv mhojea desant aslom tednam hanvem zoxem chintlolem toxench zalem nhoi? Takach lagon hanvem Tarshishak pollon voicho proitn kelʼlo. Karonn hanv zannam aslom, tum doie-maien ani kakutin bhorlolo, rokddoch ragar zaina toslo ani visvaxi mogan bhorlolo Dev, ani tuka odruxtt haddche vixim dukh zata. 3 Tor atam Jehova Deva, upkar korun mhozo jiv kadd. Karonn jieunchea poros hanv melom zalear odik borem zatolem.”
4 Jehovan vicharlem: “Tunvem itlo ragar zavop sarkem asa kai?”
5 Uprant Jonas xarachea bhair gelo ani tachea udentek eka zagear vochon boslo. Thoim tannem apleak lagon ek mattov bandlo, ani xarachem kitem zata tem pollounk, tea mattvachea savllek boslo. 6 Tednam Jonasak savlli mellchi ani tache tras unne zaunche mhunn Jehova Devan konkon dudhiachi ek val vaddoili.* Ti konkon dudhiachi val polloun Jonas khub khuxal zalo.
7 Punn dusrea disa fantodder, khorea Devan ek kiddo dhaddlo. To kiddo ti val khaunk laglo ani ti sukli. 8 Uprant suria udelo tednam Devan udente thaun boroch gorom varo sutto-so kelo. Ani khor-khorit votak lagon Jonasak ghunvoll ieunk lagli. To moronn magon oxem mhunnot ravlo, “Jieunchea poros hanv melom zalear odik borem zatolem.”
9 Devan Jonasak vicharlem: “Konkon dudhiache valik lagon tunvem itlo ragar zavop sarkem asa kai?”
Jonasan mhunnttlem: “Hoi, hanvem ragar zavop sarkem asa. Mhaka itlo rag aila ki hanv moronk sodhtam.” 10 Punn Jehovan mhunnttlem: “Jea konkon dudhiachea vali pasot tunvem kainch vavr korunk na, ani tunvem ti vaddounkui na, ji ekech rati bhitor vaddli ani ekech rati bhitor meli, tichea pasot tuka itlem dukh bhoglem. 11 Toxem zalear, hanvem hea vhoddlea Nineve xarachi kakut korchi nhoi kai, jea xarant 1,20,000-am poros chodd lok asat, zankam sarkem ani chuk hantunt* ontor pasun khoborna ani zantunt zaitim zonvaram-i asat?”