Izaias
6 Uzia Raza melo tea vorsa hanvem ek dorxon polloilem. Hanvem Jehovak ekdom unch xinvasonar boslolo polloilo. Tachea lamb kopddean akʼkhem Devmondir bhorlolem. 2 Tachea bhonvtonnim* seraf ube asle. Dor ekleak sov pakhotte asle. Tanche modlo dor eklo* don pakhotteamnim aplem tondd dhamptalo, don pakhotteamnim aple paim dhamptalo ani don pakhotteamnim uddttalo.
3 Te eka-mekak oxem mhunnttale:
“Fouzancho Dev Jehova povitr, povitr, povitr asa.
Akʼkhi prithum tache mhoimen bhorlea.”
4 Tanchea vhoddlea avazan* humbrea voile darvontte halʼle, ani akʼkhem ghor* dhunvran bhorlem.
5 Tednam hanvem mhunnttlem: “Mhojer hai!
Karonn hanvem mhojea dolleamnim Razak, fouzancho Dev Jehovak polloila!”
6 Tednam ek seraf uddon mhojea lagim ailo. To chimttean ek ingllo gheun ailo zo tannem vedi voilo kaddlolo. 7 Tannem to mhojea vonttank* lailo ani mhunnttlem:
“Polloi! Ho tujea vonttank lagla.
Tuzo guneanv kaddun uddoila,
Ani tujem patok bhogsolem.”*
8 Uprant, hanvem Jehova oxem mhunntta tem aikolem: “Hanv konnank dhaddum, ani amchea pasot konn voitolo?” Ani hanvem mhunnttlem: “Hanv hanga asam! Mhaka dhadd!”
9 Tednam tannem mhunnttlem, “Voch, ani hea lokank oxem sang:
‘Tumi porot-porot aikotole,
Punn tumkam somzochem na.
Tumi porot-porot polloitole,
Punn tumkam kainch kollchem na.’
10 Hea lokanchem kalliz nibor kor,
Tanche kan bhere kor,
Tanche dolle kuddʼdde kor,
Jea udexim, dolle asonui te pollounk xokchenant,
Ani kan asonui te aikonk xokchenant.
Jea udexim, tanchem kalliz somzonk pavchem na,
Ani porot ieun te bore zaunk pavchenant.”
11 Tednam hanvem mhunnttlem: “Jehova Deva, kednam poriant oxem choltolem?” Tannem mhunnttlem:
“Jea meren xaracho nas zaun tantunt ekui munis urona,
Ani ghoramnim konnuch ravona,
Ani akʼkhea desacho nas zaun to padd zaun urona, tea meren.
12 Jea meren Jehova munxank dhanvddaun pois korina,
Ani padd zalolea desachi poristhiti anikui paxtt zaina, tea meren.
13 “Punn ek dhavo vantto urtolo, ani eka vhoddlea zhadda bhaxen ani oak* zhadda bhaxen taka katrun porot lasoitole, punn fokot tachem mund* soddttole. Ani ek povitr bi* tachem mund zatolem.”