Izaias
10 Dusreank tras zata tosle nem-kaide kortat,
Dusreank jieunk kotthin zata toslim formonnam martat, tancher hai!
2 Te goribank tancho hokʼk diunk nakartat,*
Te adar nasloleank neai dinant,
Te vidvam koddem asa tem kaddun ghetat
Ani onathank* luttʼttat.
3 Tumkam hixob diunk poddttolo* tea disa tumi kitem kortole?
Poisulʼlean tumcher nisontton ieta tednam,
Modot magonk tumi konnam koddem dhanvtole?
Tumi tumchi girestkai* konnam lagim soddun voitole?
4 Tumchea mukhar anik kainch vatt aschina,
Ek tor tumi koideam modem chiddʼddon poddlole astole vo moddeam modem moron poddlole astole.
Hem soglem* polloun Devacho rag thondd zaunk na,
Punn tankam marunk tannem aplo hat azunui ubarlolo asa.
5 “Polloi! Asiriekar,*
To mhozo rag dakhouncho danddo zaun asa,
Ani tachea hatant aslolo danddo hanv khast lavunk uzar kortam!
6 Hanv taka, mhojea add gelam tea* raxttra add dhaddttolom,
Tea lokam add dhaddttolom zannim mhaka rag haddla.
Tankam purnn toren luttunk ani rostea voilea matie bhaxen maddounk,
Hanv taka hukum ditolom.
7 Punn tachem mon dusreach kodden astolem
Ani tachem kalliz veglleoch ievzonneo kortolem.
Karonn to raxttram kabar korunk sodhta,
Thoddeach raxttrancho nhoi, punn zaitea raxttrancho nas korunk sodhta.
8 Karonn to mhunntta:
‘Mhoje sogle kunvor raza nhoi kai?
9 Kalno, Karkemisha bhaxen nhoi kai?
Hamath, Arpada bhaxen nhoi kai?
Ani Samaria, Damaska bhaxen nhoi kai?
10 Hanvem oslim rajeam tabeant ghetleant jim valor naslolea devanchim bhokti kortalim,
Zanchea lagim Jeruzalem ani Samaria poros chodd kantoilʼleo murteo asleo!
11 Samaria ani tachea murteanchem hanvem jem kelem,
Tench hanv Jeruzalem ani tachea murteanchem korchona kai?’
12 “Sion Dongrar ani Jeruzalemant Jehova aplem soglem kam purnn korta tednam to* Asiriechea razak, tachea ghomonddi kallzak ani gorvan bhorlolea nodrek lagon khast laitolo. 13 Karonn to mhunntta,
‘Hanv hem mhojea hatachea bollan
Ani mhojea zannvaien kortolom, karonn hanv zannvaien bhorlolom.
Hanv veg-vegllea desancheo ximo kaddun uddoitolom,
Ani tanche theve luttʼttolom,
Eka xoktivont munxa bhaxen hanv thoim ravtoleank mhojea adhin kortolom.
14 Ek munis ghontterant hat ghalun tantiam kaddtta,
Tosoch hanv veg-vegllea desantlea lokanchi girestkai kaddun vhortolom.
Ani eklo soddun dilʼlim tantiam ektthaim korta,
Toso hanv prithumer aslolem soglem ektthaim kortolom!
Konnuch aple pakhotte fafuddchona, aplem tondd ugoddchona vo chivchivchona.’”
15 Kuradd uzar korta tachea poros kuradd vhodd zaunk xokta kai?
Khorvot uzar korta tachea poros khorvot vhodd zaunk xokta kai?
Boddi vapurtolea munxak, boddi halounk xokta kai?
Vo danddo gheun bhonvta tea munxak, danddo ubarunk xokta kai?
16 Taka lagon khoro Dhoni, fouzancho Dev Jehova,
Tachea* ghott-mutt munxank oskot kortolo,
To tachi mhoima ujeant lasoun, tacho gobor korun uddoitolo.
17 Izraelacho Uzvadd uzo zatolo,
Ani tacho Povitr Dev agttem zatolo;
Tem agttem pettʼttolem ani tachem ranvotti tonn ani kantteanchim jhilkuttam ekach disa bhitor kabar korun uddoitolem.
18 Dev tanchea ranachi ani follanchea bagechi mhoima kabar kortolo.
Ek duent munis oskot zait voita, tea bhaxen te zatole.
19 Tachea ranantlim urlolim zhaddam itlim unnim astolim ki
Ek bhurgo pasun tim mezunk xoktolo.
20 Tea disa Izraelache urlole lok,
Ani Jakobachea ghoranneantle vanchon urlole lok,
Tachi anik modot gheunchenant zannem tankam marlole,
Tachea bodlek, te Izraelacho Povitr Dev,
Jehovachi modot ghetole ani takach visvaxi ravtole.
21 Fokot thoddech lok, Jakobache urlole lok
Xoktivont Deva lagim porot ietole.
22 O Izraela, tuje lok
Doria voilea renvenchea konnam sarke mezunk zainant title aslear pasun,
Tanchea modle fokot mutt-bhor* lok porot ietole.
Devan tujea lokanchem nisontton tharailam,
Ani beginuch neai* tankam buddtte bhaxen buddoitolo.
23 Hoi, Akʼkhea Vixvacho Dhoni, fouzancho Dev Jehovan tharailʼlea pormonnem,
Akʼkho des purnn toren nas zatolo.
24 Taka lagon, Akʼkhea Vixvacho Dhoni, fouzancho Dev Jehova mhunntta: “Sionant ravtolea mhojea lokamno, Asiriekarak bhienakat, zo Ejiptta bhaxen tumcher boddi ubartalo ani tumcher danddo martalo. 25 Karonn thoddeach vellan mhozo krodh xant zatolo. Uprant, tancho* nas korunk mhozo rag pettʼttolo. 26 Fouzancho Dev Jehova taka chabkamnim martolo, zoxem tannem Oreb khoddpa lagim Midianak haroilʼlo tednam kelʼlem. Ani tannem apli boddi Ejipttacher ubarloli toso to apli boddi doriacher ubartolo.
27 Tea disa, tujea khandar dovorlolem tachem vojem,
Ani tujea maner dovorlolem tachem zum kaddttole,
Ani telak lagon tem zum moddun uddoitole.”
28 Tannem Aiathacher akromonn kelam,
To Migronantlean pasar zala.
Mikmashant tannem aplem samon dovorlam.
29 Tannim vhanvtem udok par korun Gebant rat sarli,
Bhirantin Ramantle lok thorthortat
Ani Sauluchea Gibea xarantle lok pollon gele.
30 O Galimachea dhuve, vhoddlean bob marun rodd!
O Laisha, dhean di!
O Anathoth, dukhan bob mar!
31 Madmenacho lok pollon gela.
Gebimant ravtolea lokamnim dusrea koddem asro ghetla.
32 Aichea disa to Nobant ravtolo.
To Sionachea dhuvechea dongrak,
Jeruzalemachea porvotak mutt dakhoun dhomki dita.
33 Polloi! Khoro Dhoni, fouzancho Dev Jehova,
Oxe toren khande katrun uddoitolo ki vhoddlo avaz zatolo,
To lamb-lamb zhaddam katrun uddoita,
Ani unch aslolim zhaddam sokol haddtta.
34 Ranantlim datt jhilkuttam to kuradden* katorta,
Ani ek xoktivont zhuzari Lebanonak haroitolo.