Korintkarank Poili Chitt
8 Atam hanv murteank bhettoilʼlea jevnnachea vostum vixim tumkam boroitam: Amkam sogleank hea vixim ginean asa mhunn ami zannant. Ginean amkam gorvan bhorta, punn mog amkam ghottai dita. 2 Apleak umkeach vixoi-acher ginean asa oxem konnankui dista zalear, khorem mhunnttlear, tea vixoi-acher taka asonk zai titlem ginean na. 3 Punn konnui Devacho mog korta zalear Dev taka vollkhota.
4 Atam ami murteank bhettoilʼlea jevnnachea vostum vixim uloum-ia. Murteo sonvsarant kainch nhoi, ani ekleach Devak soddun anik konnuch dev na mhunn ami zannant. 5 Sorgar vo prithumer, dev mhunnttlole zaite asat, ani lok mhunnttat toxem, zaite “dev” ani zaite “somi” asat. 6 Punn khorem mhunnttlear amkam ekuch Dev asa, mhunnche Bap, sogleo vostu tachea thaun asat ani ami tachea pasot asat. Ani ekuch Somi asa, mhunnche Jezu Krist, sogleo vostu tachea udexim asat ani ami pasun tacheach udexim asat.
7 Punn, sogleankuch hem ginean na. Adim murteanchi bhokti kortolea modlea thoddeank, tim murteank bhettoilʼlem jevonn jevtat tednam apunn murteanchi bhokti kortat oxem tankam dista, ani tanchem ontoskornn oskot asa dekhun tem boxttovta. 8 Punn jevonn amkam Devachea lagim haddunk xokona. Ami jevnant zalear amkam kainch luksonn zaina, ani ami jevtat zalear amkam kainch faido zaina. 9 Punn vinchun kaddunk tumkam asa to hokʼk, oskot asat tim addkhollon poddttat tea toren uzar korina zaunk chotrai dhorat. 10 Karonn oskot aslolo ek munis tujea sarkea ginean asloleank murteanchea mondirant jevta to polloita zalear, taka pasun murteank bhettoilʼleo vostu khaunk dhir mellchona kai? 11 Tor tujea gineanak lagon oskot aslolo munis kabar zata. Hoi, tuzo toch bhav zachea pasot Krist melo. 12 Tumi tumchea bhav-bhoinninchea add patok kortat tednam ani tanchem oskot aslolem ontoskornn dukhoitat tednam, tumi Kristachea add patok kortat. 13 Tea pasot, jevnnak lagon mhozo bhav addkhollon poddtta zalear, hanv porot kednanch mas khaunchoch na. Hea udexim mhaka lagon mhozo bhav addkhollon poddchona.